Kelewenu 23 - Kazambale lé Sebe Sauunu 1979

¹ Pɔl vo webolikinimunu ginina téiin, yé é lee: An bwenu, an tawo Kazambale ’lɛ fɔɔ yi ’ko nya ’té anlé wevasibli ’ka we dɔa an nwiin lo.

² Munu lé wo ke é dɔle Pɔl sɔnɔ, Balebanmunu ’lɛzan Ananias lé wo lɛ léé: ’Ka bla é lɔlu ta.

³ Yé Pɔl lé a lɛ léé: Kɔnguru fu, Kazambale é dan i bla lɛ. I a é nyanale anlé we blena bélidɔwe yɛrama, yé ’té i bélidɔwe sɛra a fele nya munu lɛ léé, ’wo an blaa?

⁴ Munu lé wo ke é dɔle a sɔnɔ, wo lé a lɛ léé: I Kazambale banmunu ’lɛzan sɔnɔaan?

⁵ Yé Pɔl léé: An bwenu, maa ’ka a gi dɔɔ lɛ léé, é a Balebanmunu ’lɛzan nya lo, naa, wa gyɛ sɛbɛ gi léé: Té i dére naané fe ilé munu nwiinzan ma lo.

⁶ Pɔl a gi dɔɔ léé, munu lé wo ke é zénle ékeva bɛ, wo gi a é bɔile fié; a lɛ do a Sadusémunu nya, yé a lɛ do a Farizimunu nya; yé é siaa webolikinimunu ’lɛ léé: An bwenu, maa a Farizimi nya, Farizimi be nya. An bli a mi nwale gale va lɛ, amalé wo ke anlé we blena ’ko.

⁷ Dé Pɔl we ’ko fe, za nwa Farizimunu valé Sadusémunu méléna yé wo gi bɔi fié.

⁸ Naa, Sadusémunu léé, gamunu ’ka nwaan monomono lo. Yé é ziin, wo léé, lanje valé mi léli ’ka lo. Yé Farizimunu léé, fɛ fié ’ko ana webozen nya.

⁹ Yé wo vo siaana plɛplɛ yé Farizimunu va sɛbɛgifemi kenu nwa yé wo vo za vɔna plɛplɛ yé wo léé: Ko ’ka wenaané do kpen ye lɛ mi ’ko ma lo. Dé mi léli ɛ we fe a lɛɛ? taa, dé lanje léé?

¹⁰ Zɔdɔle gi gyɛ wo méléna yé sunyanuzan segele kana léé, dé munu ’ko é da Pɔl wi kini ékema, amalé é sunyanu pa zia Pɔl sile wo worona we gi, yé wo go a nya kɔn plɛplɛ gi.

¹¹ É béli Mizan bɔra Pɔl va, yé é léé: ’I bli ta dɔ plɛplɛ. I anlé we fe Jérusalɛm fɛan zo ’ko, a zo duo lé é a lé bé fe Rom.

Wo Pɔl ma we ble

¹² Dé tu kini, Juifinu wo gi pa do balekunle nya léé, wo ’ka dan fɛ ble lɛ lo yé wo ’ka dan ’yi mini lɛ lo, fɔɔ ’té wo Pɔl gyɛ é wo.

¹³ Munu lé wo Pɔl ma we ’ko ble, wo ’léé gié mi yɔ fié ta.

¹⁴ Yé wo go Balebanmunu segelenu valé mi segelenu va, yé wo lé wo lɛ léé: Ko bale kun léé, ko ’ka dan fɛ do kpen ble lɛ lo fɔɔ, ’té ko Pɔl gyɛ é wo.

¹⁵ Sin, ka valé webolikinimunu, ’ka go sunyanuzan segele va, ’ka fe a lɛ léé, ’é da Pɔl nya ka va, ka a a va léé, ka alé we nagini tegele. Naa, ko ma a é ’lɛrɛle léé, ko a gya a bɔle ka va ’lɛ.

¹⁶ Pɔl buru be a ’ma aan wo léé, wo Pɔl ma we ble, é go kɔn plɛplɛ gi a zuo fe lɛ Pɔl lɛ.

¹⁷ Pɔl sunyayɔsoru ’lɛzan do laa, yé é léé: ’I go pɛniɛ ’ko nya sunyanuzan segele va. É sɔ a lɛ léé, é we do fe a lɛ.

¹⁸ Sunyayɔsoru ’lɛzan pɛniɛ si, yé é go a nya sunyanuzan segele va yé é lé ’bɛ lɛ léé: Bokɔngizan Pɔl an laa, yé é lé an lɛ léé, an da pɛniɛ ’ko nya i va yé é we do fe i lɛ.

¹⁹ Sunyanuzan segele kun pɛniɛ bɛ ma yé é si a nya munu ma sɛ, yé é we ’ko gi laa a lee léé: Mɛ we lé i da a fe lɛ an lɛɛ?

²⁰ ’Bɛ lé a lɛ léé: Juifinu ’wo gi pa do léé, wa fe i lɛ léé, ’i da Pɔl nya tɛlɛ webolikinimunu va, fɛan zo lé i dan we laa lɛ a lee tegele, a zo.

²¹ Té i tɔné dɔ wo lɛ lo. Wo vamunu ’léé gié mi yɔ fié ta, yé wo dan a mabɛn lɛ; wo gi pa do yé wo bale kun léé, wo ’ka dan fɛ do ble lɛ lo, yé wo ’ka dan ’yi mini lɛ lo fɔɔ ’té ’wo Pɔl gyɛ é wo. Sin, wo ma’lɛrɛle nyaa, yé wa ilé a nyi sile ɛ lɛbɛnna.

²² Sunyanuzan segele lé pɛniɛ lɛ léé: We lé bé fe an lɛ, té bé fe mi do kpen lɛ lo. ’Bɛ zuo yé é a pa zia.

Wo Pɔl pa zia gbɔrɔnama Félis va

²³ ’Bɛ zuo yé é sunyayɔsoru ’lɛzan fié laa, yé é lé wo lɛ léé: ’Ka ka ma’lɛrɛ, sunya wuru do koo, wisoolamunu yɔ yaa wɔlɛ vu koo, sa?-?vulizannu wuru do koo, ’ka fe wo lɛ léé, ’wo ’wo ma’lɛrɛ. Dé kɔn tadɔ tétété, ka valé wonu é dan go lɛ Sézaré.

²⁴ ’Ka wisoonu si Pɔl zé nya é ziin yé ’é bɔ drɔɔ gbɔrɔnama Félis va.

²⁵ Yé é sɛbɛ gyɛ ’ko zo:

²⁶ Mi blɛn, gbɔrɔnama Félis, an we i va. Klode Lisias ɛ ke sɛbɛ ’ko gyɛna i lɛ.

²⁷ Juifinu mi ’ko kun, yé wa gyɛna bléyian va, maa da sunyanu nya yé maa a si wo lee; maa a ’ma léé, é a Rom mi nya, azama.

²⁸ É sɔ an lɛ léé, maa a tɔfemawe gi ’ma, yé an go a nya wolé webolikinimunu va.

²⁹ Yé maa a ye léé, wa tɔ fe wolé bélidɔwe kenu ɛ ma. É ’ka wenyané do kpen kɛlɛ lɛ, yé dé ga léé, dé bokɔn léé, yé é a ye ’bɛ we ma lo.

³⁰ Maa a ’ma aan wo léé, wa ma we ble, amalé maa a pa i lɛ zia ’ko, yé maa lé a tɔfezannu lɛ léé, é a lé wa ma we fe i lɛ woboan. I yaima.

³¹ Bélidɔwe lé é a fe sunyanu lɛ, a yɛrama lé wo Pɔl si yé wo go a nya é béli fɔɔ Antipatris.

³² ’Bɛ é tu kini wo valé wisoolazannu zi sia é ziin, yé gane la sunyanu go wo pa gi Jérusalɛm wolé kɔn plɛplɛ ’léé.

³³ Wo bɔ aan wo Sézaré, wisoolazannu sɛbɛ nɔ gbɔrɔnama lɛ, yé wo Pɔl nagɔɔn a lɛ.

³⁴ Dé gbɔrɔnama sɛbɛ ta fe faa é lé wo lɛ léé: Pɔl a tɛrɛ kyɛn la mi nyaa? É a ’ma aan wo léé, é a Silisi tɛrɛ la mi nya,

³⁵ é léé: Dé i tɔfemunu da an dan ilé we ’ma lɛ. Yé é wo béli dɔ léé, ’wa vɔ Érɔd lé weblekɔn gi.