Kelewenu 22 - Kazambale lé Sebe Sauunu 1979

¹ An bwenu valé an tinu, ’ka tɔné dɔ an lɛ. Maa dan we fe lɛ we sile an nwiin we gi.

² Wa ’ma aan wo léé, é a Ébru dére vɔna, wo tadɔ bléiin. Yé Pɔl léma:

³ Maa a Juifi mi nya. Wo an yaa Taase, Silisi tɛrɛ la. Yee fla ’ko ta lé an tin yé Gamaliɛl kaa tranu lé bélidɔwe paa an gi tegele. ’Té Kazambale lé we a an bli gi blɛn, bélé fɛan zo lé é a ka bli gi blɛn kyɔ, a zo.

⁴ Munu lé wo ke tawona yee Jézu zuo zi dɛrɛ ’ko ta, an nyané pa wo ta fɔɔ yé wo ga. Gɔnénu koo, lomu koo, an gɔgɔbale vɔ wo ma yé an wo vɔ bokɔn gi.

⁵ Balebanmunu ’lɛzan valé mi segele palu a anlé wenayezan nya léé, webozen lé maa ke a fena. Yé ’bɛnu sɛbɛnu nɔ an lɛ kaa bɔlunu Juifinu lé wo ke Damas, wozé nya. Yé an go ’bɛna léé, munu lé wo ke ana, yé ’an wo kun yé ’an da wo nya Jérusalɛm, welɛdɔle wo gi we ma.

⁶ Bléyian va lé an ke zia, ’té an bɔ Damas sɔnɔ, é yiéyi tɔɔn, san blɛn do si la gi yé é diri an zi.

⁷ Maa dia tɛrɛ va, yé maa dére do ’ma, yé ’bɛ lé an lɛ léé: Sɔl, Sɔl, mɛmalé i nyané paan an taa?

⁸ Yé maa léé: Anzan, de lé ke i nyaa? Yé é lé an lɛ léé: Maa a Nazarɛtzan Jézu lé, i ke nyané pana a ta, a nya.

⁹ Munu lé wo ke an va, wo san ’ko ye, naa, mi lé é we fe, wo ’ka ’bɛ dére ’ma lɛ lo. Yé maa léé:

¹⁰ Anzan, maa kɛla kaa? Yé Mizan lé an lɛ léé: ’I nwa, ’i go Damas, yé we faa lé é a lé bé kɛlɛ, wo dan a fe lɛ i lɛ ana mi.

¹¹ San ’ko bile plɛplɛ zi an ’ka fɛna ye lɛ lo. Amalé munu lé wo ke an va, wo kun an bɛ ma, yé wo go an nya Damas.

¹² Yé mi do ana Damas, wa laama Ananias, éé bélidɔwe kɛla tegele, yé Juifinu faa lé wo ke é nyanale Damas, wa ma we zin fé;

¹³ ’bɛ da an va yé ’bɛ lé an lɛ léé: An bwe Sɔl, i yuɛ ’é fuo ma. A bléyi duo nya, an yuɛ fuo yé maa a ye.

¹⁴ Yé é léé: Ko tranu zé Bale i si a va léé, ’i élé blibɔmawe dɔɔ, yé ’i Mi Tegele ye, yé ’i yeebozen dére ’ma.

¹⁵ Naa, i dan kɛlɛ lɛ alé wenayezan nya yé fɛnu lé i wo ye, é valé wenu lé i wo ’ma, i dan wo zuo fe lɛ munu faa lɛ.

¹⁶ Yé sin, i a mɛ fɛ lɛbɛnnaa? ’I nwa, ’wo i batizéwo yé ’i Mizan tɔ laa yé ilé wenyanénu é si i lee.

Bale Pɔl nwunvɔ bɛn bɛnu va

¹⁷ An bɔ aan wo é ziin Jérusalɛm, maa a bazorona aan wo Balebangikɔn gi, an si an pɔlɛ gi,

¹⁸ yé an Mizan ye, yé é lé an lɛ léé: ’I nwa é kele; ’i si Jérusalɛm é nya do. Anlé we lé i dan a fe lɛ wo lɛ, wo ’ka dan a nyi si lɛ lo.

¹⁹ Yé maa léé: Mizan, wobozen a gi dɔɔ léé, maa go giéle nya bazorokɔnnu gi, ’té munu lé wo bli vo i lɛ, ’té maa wo vɔa bokɔn gi, ’té maa wo blaan plén nya nuu.

²⁰ Bléyian va lé wo ilé wenayezan Étiɛne gyɛ, ’té maabozen ana, ’té ’bɛ sɔ an lɛ é baba, yé an yuɛ pa a gyɛmunu lé sɔnu va.

²¹ Yé é lé an lɛ léé: ’I go. Maa dan i pa lɛ zia baa bɛn bɛnu va.

Pɔl vo sunyanuzan segele lee

²² Munu vo ’wo tɔné dɔna Pɔl lɛ fɔɔ dé é dére ’ko fe tɔɔn, yé wo ’wo dére nwa léé: ’Ka ’bɛ zo mi si tɛrɛ la! A yara ’ka a yara léé, é vo é yuɛma lo.

²³ Yé wo siaa, yé wo ’wolé sɔnu vuli yé wo vo tɛrɛ nwɛɛnna loru.

²⁴ Sunyanuzan segele léé, ’wo go Pɔl nya kɔn plɛplɛ gi yé ’wa bla wɛsɛné nya, yé wean ma lé wo siaa a ta a zo yé ’é a gi dɔɔ.

²⁵ Wa yere aan wo é blale we gi, sunyayɔsoru ’lɛzan lé ke ’bɛna, Pɔl lé a lɛ léé: A se a ka lɛ léé, Rom sitoyén lé, we ’ka é dɔle a nwiin lo, ka ’bɛzan bla wɛsɛné nyaa?

²⁶ Sunyayɔsoru ’lɛzan dére ’konu ’ma aan wo é go sunyanuzan segele va yé é lé ’bɛ lɛ léé: Mɛ we lé bé kɛlɛ bɛɛ? Mi ’ko a Rom mi nya.

²⁷ Yé sunyanuzan segele da, yé é lé Pɔl lɛ léé: I a Rom mi nyaa? Bé fe an lɛ. Yé é we: Iin.

²⁸ Yé sunyanuzan segele léma: Gɔɔli kiɛre sɛrɛle nya lé an kɛlɛ sitoyén nya. Yé Pɔl léé: Naa, wo an yaa a nya.

²⁹ Tɔɔn, munu lé wa gona kɔɔn a bla lɛ, wo si a ma, yé sunyanuzan segele a gi dɔɔ aan wo léé, Pɔl a Rom mi nya, kana zén a gi a yerele we ma.

Pɔl a webolikinimunu ’lɛ

³⁰ ’Bɛ é tu kini, é sɔ sunyanuzan segele lɛ léé, we lé Juifinu a dɔ a nwiin ’é a gi ’ma tegele. Yé é lé wo lɛ léé: ’wo balenu fuo a ma. Yé é Balebanmunu segelenu valé webolikinimunu faa zén ékeva. ’Bɛ zuo é léé, ’wo da Pɔl nya, yé wa dɔ wo worona.