Kelewenu 21 - Kazambale lé Sebe Sauunu 1979

Pɔl go Jérusalɛm

¹ Ko si wo va aan wo, ko vɔ ’yitagoro gi, yé ko go Kɔs tegele. ’Bɛ é tu kini, ko go Rode. Yé ko si ’bɛna yé ko go Patara.

² Yé ko ’yitagoro do ye, ’té é a gona Fénisi tɛrɛ la, yé ko vɔ a gi, yé ko go.

³ Dé ko yuɛ dɔ Sipri wɛyi worona tɛrɛ ma, ko ’bɛ vo ko bɛbolazia yé ko go gole nya Siri tɛrɛ vazia yé ko zun Tii; ana lé wo kɔnénu si ’yitagoro gi.

⁴ Ko Jézu zuomunu ye ’bɛna yé ko yi sɔrafié kɛlɛ ’bɛnu va. Kazambale Léli we fe zuomunu ’konu lɔlu nya yé wo lé Pɔl lɛ léé, té é go Jérusalɛm lo.

⁵ Naa, ko yi sɔraazan nya ko zi sia yé wo faa go ko dɔ lɛ zia, wo koo, wo nanu koo, wolé nénu koo, fɔɔ ko gane gi gana fla ma. Yé ko zun ko powuo ta wɛyi gɔ la yé ko bazoro.

⁶ ’Bɛ zuo, ko ko ke yai vɔ yé ko é vɔ ’yitagoro gi, yé wo é go wo pa gi.

⁷ Ko si Tii, yé ko bɔ Tolémais. ’Bɛ fla ’ko ta lé ko si ’yitagoro gi. Ko we bwenu va ’bɛna yé ko yi do kɛlɛ wo va.

⁸ Dé tu kini ko go, yé ko bɔ Sézaré. Ko go wenénéfezan Filip lé kɔn ’léé yé ko yii ’bɛna; mi sɔrafiéo, é a wo va mi do nya.

⁹ A lu ziɛn a blɛnnu nya yé woo balelawe fé.

¹⁰ Ko yi kiɛre kɛlɛ ’bɛna, yé balelayezan do lé wa laama Agabu, ’bɛ si Judé,

¹¹ yé ’bɛ bɔ ko ma. É Pɔl lé kyɛsidi si, yé ébo ganenu valé ébo bɛnu yere a nya yé é léé: We lé Léli Sauun a fe, yee lé é ke ’ko: Mi lé é ke kyɛsidi ’ko zan nya, fɛan zo lé maa anbo yere ’ko, a zo duo lé Juifinu é dan azan yere lɛ Jérusalɛm yé wo dan a pa lɛ bɛn bɛnu lee.

¹² Ko we ’ko ’ma aan wo, ko koo, ana munu koo, ko zanté vɔ Pɔl lɛ léé, té é go Jérusalɛm lo.

¹³ Yé é a zi pa léé: Mɛ zoɛ we lé ka ke a kɛlɛna an lɛ ’koo? ’té ka wuvɔa ’té ka an bli gi kyɛ dɔaa? Dé wo an yereoo, dé an ga Jérusalɛm Mizan Jézu tɔ lé we maoo, an ma a é ’lɛrɛle é kyɛn.

¹⁴ É ’ka aan wo a nyi sina ko lɛ lo, bɛwemalé ko ’ka we bɛ fe lɛ a lɛ é dɛrɛ lo, yé ko léé: Mizambale lé blibɔmawe ’é kɛlɛ ma.

¹⁵ Yi ’konu zuo, ko kolé kɔnénu pa yé ko go Jérusalɛm.

¹⁶ Jézu zuomunu ke si Sézaré yé ko go wo nya é ziin, yé wo go ko nya mi lé wa laama Ménasɔn, a va; ko dan yii lɛ a va, azama. Ménasɔn ’ko é si Sipri wɛyi worona tɛrɛ la. É a Jézu zuozan nya é kyɛn.

Pɔl go we lɛ Jak va

¹⁷ Ko bɔ aan wo Jérusalɛm, bwenu ko bɛn si gi nanale nya.

¹⁸ ’Bɛ é tu kini, ko valé Pɔl go Jak va. Yé mi segelenu faa zén ékeva ’bɛna.

¹⁹ Dé Pɔl we wo va faa, wenu lé Kazambale a kɛlɛ bɛn bɛnu méléna alé nyanama ma, é a faa zuo fe wo lɛ.

²⁰ Wa ’ma aan wo, wo Kazambale tɔ zin bɔ yé wo lé a lɛ léé: Ko bwe, fɛan zo lé Juifi kiɛre bli vo Jézu lɛ, ’té woo bélidɔwe kɛla wo sɔbɛla nya bɛ, bé nagini do.

²¹ Wa ’ma léé, Juifinu lé wo ke bɛn bɛnu méléna, bii a we paana wo gi léé, ’wo sɔn vɔ Moizi ma, yé i lé wo lɛ léé, té wo nunu gane dɔ lo, yé té wo ’wo tranu gɔnɔlawenu kɛlɛ lo.

²² Ko kɛla kaa? Wa gi dɔɔ léé, i da, bɛwemalé munu é dan zén lɛ ékeva wezen nya.

²³ Bɛwemalé, wean ko dan a fe lɛ i lɛ, bé kɛlɛ. Mi ziɛn lé wo bale kun, wa ko va. ’I go wo nya,

²⁴ ’ibo kɛlɛ tegele wo va, ’i wo nwun puiɛle ma banwo, yé ’wo wo nwun puiɛ. ’Ko zo lé wenu lé wa ’ma i ma, wo faa dan a gi dɔɔ lɛ léé, wa vié nya, yé wo dan a ye lɛ léé, i bélidɔwe kɛla.

²⁵ Bɛn bɛnu lé wo bli vo Jézu lɛ, ko ko ’wuo gi bɔrɔ yé ko léé, é a lé wo daan miyili banwinu koo, wi nyɛ koo, winu lé wo fɛ fɔnɔ wo bɔrɔ gi yé wo ga koo, le ginile koo, wo ma, yé ko ’bɛnu faa gyɛ sɛbɛ ta a zo.

²⁶ Yé ’bɛ é tu kini Pɔl munu ’ko si, yé ébo kɛlɛ tegele, yé é wɔra wo nya Balebangikɔn gi, yian nya lé wo kɛlɛle tegele lɛ é dan sɔɔ lɛ, é valé yian é a lé wo da Bale blan nya do do, é a fe wo lɛ.

Wo Pɔl kun Balebangikɔn gi

²⁷ Yi sɔrafié nyaala nya, Azi tɛrɛ la Juifinu Pɔl ye aan wo Balebangikɔn gi, wo munu faa nwa yé wo Pɔl kun siaale nya léé:

²⁸ Izraɛl munu, ’ka da bɔ ko va. Mi lé éé we fé munu koo, bélidɔwe koo, fɛkona koo, wo faa ma munu faa lɛ fɛfaana, yee lé ke ’ko. É go Grɛkinu nya é ziin Balebangikɔn gi yé é fɛna sauun ’ko sɛrɛ.

²⁹ Naa, wo Éfɛz mi Trofim ye Pɔl va fla yé é dɔ wo gi léé, Pɔl go a nya Balebangikɔn gi.

³⁰ Flamunu faa dɔ wo gane ta, yé wo si fɛfaana vlan nya yé wo zén ékeva, yé wo Pɔl kun Balebangikɔn gi yé wo bɔra béera a ganale nya yé wo goan yé wo kɔn lɛ tan é nya do.

³¹ Wa kwa kulina aan wo léé, ’wa gya, yé sunyanuzan segele a ’ma léé, Jérusalɛm munu a é dɔle wo gane ta.

³² ’Bɛna tɔɔn, ’bɛ élé sunyanu si, é valé sunyayɔsoru ’lɛzannu nya, yé ’bɛnu go wo va vlan nya. Wo sunyanuzan segele valé sunyanu ye aan wo tɔɔn, wo daan Pɔl blale ma.

³³ Yé sunyanuzan segele bié yé ’bɛ Pɔl kun, yé é léé, ’wo foliɛwɔlɛbale fié vɔ a ma. Yé é a laa wo lee léé: De ɛ ke a nyaa? É mɛ we ɛ kɛlɛɛ?

³⁴ Naa, mi gu va mi kenu siaa dére do nya yé a kenu siaa dére bɛ nya, yé wo ke aan wo wena kooo bɛ, é ’ka bɔa we do kpen ’male lɛ tegele lo. Amalé é lé élé sunyanu lɛ léé: ’Ka go a nya kɔn plɛplɛ gi.

³⁵ Pɔl bɔ aan wo sikalié ta, munu a a va léé, ’wa gyɛ, amalé sunyanu a sia yé wa pa ’wo ta loru.

³⁶ ’Té munu a a zuo siaale nya léé: ’Ka gyɛ!

Pɔl ézé fe

³⁷ Bléyian va lé wo go Pɔl nya kɔn plɛplɛ gi, Pɔl lé sunyanuzan segele lɛ léé: I bɔalɛ i zi nɔ an lɛ yé maa we do fe i lɛɛ? Sunyanuzan segele lé a lɛ léé: I Grɛki dére vɔaa?

³⁸ Éjipiti mi lé é nwa minwiinzannu ma, ’té ana ’ka tan mɔn lɛ lo, ’té é go kyeenwomunu baa fié nya nyéné saa lé fɛna, yeean ke i nya loo?

³⁹ Pɔl lé a lɛ léé: Maa a Juifi mi nya. Maa si Taase, Silisi tɛrɛ la. Fla lé a tɔ ke blɛn, maa a atazan nya. Ilé zanté, ’i zi nɔ an lɛ an we fe munu lɛ.

⁴⁰ Yé sunyanuzan zi nɔ a lɛ, yé é dɔ sikalié ta loru yé é bɛ nwa tɔmase nya. Yé munu faa vo é tadɔle, yé Pɔl we fe wo lɛ Ébru dére gi, yé é léma: