Kelewenu 20 - Kazambale lé Sebe Sauunu 1979

Pɔl go Masédɔane valé Grɛk tɛrɛ la

¹ Fla bɔgyɛwe nyaale zuo Pɔl Jézu zuomunu zén ékeva. Dé é nyaa we plale nya wo lɛ faa, é wo yai vɔ, yé é si wo va yé é go Masédɔane tɛrɛ la.

² É gié ’bɛlé tɛrɛ la, we kiɛre plale nya zuomunu lɛ.

³ ’Bɛ zuo yé é go Grɛk tɛrɛ la, ana lé é mɔn moné yaa. Pɔl a gona vɔna ’yitagoro gi bléyian va, gole Siri tɛrɛ la we ma, é a ’ma léé, Juifinu a ’é ma we blena. Amalé é go zi bɛ ta yé é gié é pa gi zia Masédɔane tɛrɛ la.

⁴ Munu lé yee valé ’bɛnu ke gona Azi tɛrɛ la, ’bɛnu tɔ lé ke ’ko: Bérézan Pirus be Sopatɛɛ koo, Tɛsalɔnikzannu Arisaak valé Ségɔn?-?dus koo, Dɛɛbezan Gaius koo, Timoté koo, woo valé Azi mi Tisik valé Trofim koo, woo lé.

⁵ Munu ’ko, wo gié ko ’lɛ yé wo ko lɛbɛn Troas.

⁶ Buru lé lévɛn ’ka a va lo, alé fɛti yinu zuo ko vɔ ’yitagoro gi Filip. ’Bɛ zuo yi soru yé ko bɔ wo ma Troas, yé ko yi sɔrafié kɛlɛ ’bɛna.

⁷ Flɛyi yi vinin nya, ko zén ékeva Taboyi lé buru blele we ma. Pɔl léé, dé tu kini é dan go lɛ yé é vo we fena zuomunu lɛ, yé é mɔn élé we fena fɔɔ yé tu la pa.

⁸ Loru kɔnné lé ko ke é zénle ékeva a gi bɛ, kyɛbɔnu ana kiɛre.

⁹ Pɛniɛ lé wa laama Yutikus é a é nyanale taasi yaazan lé fɛnɛti ta; dé Pɔl a mɔnna wefena gɔnézan ’ko yi gyɛ fɔɔ yé é vo tɔɔtɔɔ yé é si taasi yaazan lé fɛnɛti ta yé é dia. Wo kun a ma bléyian va, ’té é a é gale.

¹⁰ Naa, Pɔl zun yé ’bɛ bua a ta yé ’bɛ a sia é bɛ gi yé ’bɛ léé: Té ka ’bɛ gi bɔrɔ pa lo; é dɔ ’é gi.

¹¹ Yé é go taasi nwiin é pa gi yé é Taboyi lé buru bɔi yé é a ble, yé é mɔn we fena é ziin, fɔɔ yé tu kini. ’Bɛ zuo yé é go.

¹² Wo go pɛniɛ nya é yuɛma, yé ’bɛ wo tɔrɔ paa é baba.

Pɔl si Troas yé é go Milɛ

¹³ Pɔl vo bɛ yé ko vɔ ’yitagoro gi, yé ko go Asɔs vazia, ana lé ko dan Pɔl sia lɛ é ziin. É a a va léé, é go é gane la, amalé é a fe ko lɛ a zo.

¹⁴ Ko valé Pɔlnu kee aan wo Asɔs, é vɔ ko va ’yitagoro gi yé ko go Mitilɛne.

¹⁵ Ana lé ko zi sia é ziin wɛyi ta, yé ’bɛ é tu kini ko bɔ Sio yara. Yé ’bɛ é tu kini ko bɔ Samɔs, yé a yi ziɛnzan nya ko bɔ Milɛ.

¹⁶ Pɔl léé, é dan gié lɛ Éfɛz ta; ’é ’ka dɔa ’bɛna lo, té é yi sɛrɛ é pla Azi tɛrɛ la lo. É yara pa tawole ta, dé é bɔa bɔle lɛ Jérusalɛm Pantekot fɛti kɛlɛyi ’lɛɛ? azama.

Pɔl we fe Éfɛz léglizi gi mi segelenu lɛ

¹⁷ Naa, duowo, bléyian va lé Pɔl a Milɛ é munu pa zia léé, ’wo go Éfɛz léglizi gi mi segelenu laa.

¹⁸ ’Bɛnu da aan wo a va, é lé ’bɛnu lɛ léé: É sia an dayi vinin ma Azi tɛrɛ la fɔɔ kyɔ, maa a we kɛlɛna fɛan zo ka va, ka a gi dɔɔ.

¹⁹ Maa a Mizambale lé nyanama pana bo kɛlɛle kiéné valé an yuɛyi zénle nya, ’té Juifinu an gi daan an ma we blele nya.

²⁰ Ka a gi dɔɔ léé, wenu lé wo ka ma we nyian wo, an ’ka a gɔ do kpen yɔɔ lɛ ka ma lo. An we fe ka lɛ yé an we paa ka gi gɔrɔ la valé kɔnnu gi, té kana ’ka an gi lo,

²¹ yé an we fe Juifinu valé Grɛkinu lɛ léé, ’wo bli nɔla Kazambale vazia yé ’wo bli vo Kozan Jézu Krist lɛ.

²² Yé lao, ka ye, Kazambale Léli an nyunu léé, ’an go Jérusalɛm. Wean é dan bɔ lɛ an ma ana mi, maa ’ka a gi dɔɔa lo.

²³ Naa, fla faa la Léli Sauun lé an lɛ léé, gɔgɔbalenu valé nyanéblelenu a an lɛbɛnna.

²⁴ Naa, an ’ka we do kpen kɛla anlé tɛrɛla we ma, bélé fɛan zo lé a we a an lee, a zo lo. We fié lé ke an bli gi, yee lé é ke ’ko: zi lé Mizan a gɔɔn an lɛ, maa lé a ta tawole lɛsɔɔle gi nanale nya a do; nyanama lé Mizan Jézu a nɔ an lɛ, Bale lé zin lé Wenéné fele nya, ’bɛ lɛsɔɔle a do, woo lé ke bɛ; an ma we bɛ ’ka lo.

²⁵ Yé sin, maa gi dɔɔ léé, ka ’ka dan an yara ye lɛ é dɛrɛ lo, ’kaa lé, maa gié Kazambale lé plale mi nwiin lé wefele nya ka faa méléna, ka lé.

^26-27 We lé Kazambale a kɛlɛ é kyɛn kazé nya, maa a faa fe ka lɛ, yé an ’ka a do kpen yɔɔ lɛ ka ma lo, bɛwemalé kyɔ maa lé ka lɛ léé, ka va mi do kpen nyɛ lé we ’ka an nwiin lo.

²⁸ Bɛwemalé, ’ka yuɛ pa kabozen valé trubɛ palu gimunu faa lé Léli Sauun ka kɛlɛ wo tabinzannu nya, wo va. Mizan lé léglizigimunu lé é wo lɔ ébo nyɛ nya bɛ, Bale ka kɛlɛ wo tabinzannu nya léé, ’ka fɛblele nɔ wo lɛ.

²⁹ Maa gi dɔɔ léé, an gole zuo, glau nyanénu é dan wɔra lɛ ka méléna, yé wo ’ka dan trubɛgimi do kpen vo lɛ lo.

³⁰ Yé maa gi dɔɔ léé, ka va mi kenu é dan nwa lɛ yé wo dan zirizowenu paa lɛ munu gi, yé Jézu zuomunu é dan zén lɛ wo zuo.

³¹ Lɛɛ yaa gi maa ’ka daan lɛ we plale ma ka lɛ lo, é béli koo, é yiéyi koo, maa vo we plana ka faa do do lɛ an yuɛyi zénle nya. ’Bɛ sele ’é dɔ ka gi ma. Bɛwemalé ’ka vo é vuole.

³² Laona, an ka vo Kazambale lee, é valé alé zin dére lee; mi lé é bɔalɛ, é ka tin yé é tɔnɔfɛ nɔ ka lɛ é va, munu faa lé é wo pa é yɛrama, wo va bɛ, maa ka vo ’bɛzan lee.

³³ An bli ’ka bɔ lɛ mi lé gɔɔli koo, alé kyan koo, alé sɔnu koo, wo do ma lo.

³⁴ Kabozen a gi dɔɔ léé, fɛnu lé maa valé an vamunu mawe ke wo gi, an bɛ panyanama nya lé maa wo ye.

³⁵ Maa a nagɔɔn ka lɛ bɛ faa ma léé, nyanama ’ko zo pale nya lé é a lé wo bɔ mi tɔɔtɔɔnu va. Yé Mizan dérenu sele ’é dɔ ka gi ma, yeebozen a fe léé: Fɛ nɔle lé gi nanale mini fɛ yele zé ta.

³⁶ Wefele ’ko zo zuo, é zun é powuo ta yé é bazoro wo faa va.

³⁷ Yé wo faa zén wuvɔle va yé wo faa vɔ Pɔl bɔrɔ ma, ’té woo bɛ giéan a ma.

³⁸ We bɛ ’ka ’na lɛ wo ma lo; a felé é a wo léé, wo ’ka dan ’é yara ye lɛ é dɛrɛ lo, yee ɛ ’na wo ma é mini we pɔnénu faa ta. Yé wo go a dɔ lɛ zia fɔɔ yé wo bɔ ’yitagoro ma.