Kelewenu 19 - Kazambale lé Sebe Sauunu 1979

Pɔl a Éfɛz

¹ Apolɔs ke aan wo Korɛnt, Pɔl gié yirinwana bɛbolazia yé é bɔ Éfɛz, Azi tɛrɛ la. Yé é bɔ ’bɛna zuomunu kenu ma yé é lé ’bɛnu lɛ léé:

² Ka bli pa aan wo Bale lé we gi ’naan, ka Léli Sauun yee? Wo lé a lɛ léé: Dé Léli Sauun ana, ko ’ka tan ’bɛ we ’ma lɛ lo. Yé é léé:

³ Batizé kyɛn nya lé wo ka batizéwoo? Yé wo léé: Jan zé lé.

⁴ Yé Pɔl léé: Jan munu batizéwo wo bli nɔlale tɔmase nya, yé é lé munu lɛ léé, ’wo bli vo mi lé é dan da lɛ ’é zuo bɛ, a lɛ; ’bɛ gi léé, Jézu.

⁵ Dére ’konu ta lé wo wo batizéwo Mizan Jézu tɔ gi.

⁶ Pɔl é bɛ pla aan wo wo ta, Léli Sauun vɔ wo ta, yé wo we fe dére bɛnu gi yé wo balelawe fe.

⁷ Dé wa mi vu ta fiéé? a zo.

⁸ ’Bɛ zuo Pɔl wɔra bazorokɔn gi yé é we fe munu faa yuɛ va. Moné yaa wuo é Kazambale lé plale mi nwiin lé wenu fe wo lɛ, yé é we fe fɛan zo, munu ’ka wo dɔnama ye lɛ é dɛrɛ lo.

⁹ Naa, wo va mi kenu bli vo plɛplɛ, yé wo ’ka dɔ lɛ a ta lo. Yé wo vo Mizan lé zi ma we lɛrɛlɛrɛ fena mi faa yuɛ va, amalé é si wo va yé é zuomunu si wo va. Yé é vo we paana ’bɛnu gi yi faa do do ma Tiranus lé lɛkɔlu la.

¹⁰ É vo ’bɛ kɛlɛna lɛɛ fié, yé munu faa lé wo ke é nyanale Azi tɛrɛ la, Juifinu valé Grɛkinu nya, wo Mizan dére ’ma.

¹¹ Yé Kazambale gyɛzorowe dɛrɛnu kɛlɛ Pɔl bɛ nya,

¹² yé sɔnu valé misɔrɔnu lé wa mane a kɔlɛ ma, wo go wo nya yé wa mane gyɛgyɛmunu ma, ’té gyɛnu éé sié ’bɛnu ma, ’té yonu éé sié wo gi.

Séva benu lé we

¹³ Yokɛlɛ Juifinu lé wo ke dɔwomunu nya, wo Mizan Jézu tɔ laale gi dan munu lé yonu ke wo gi, wo ta, a fele nya léé: Jézu lé, Pɔl alé we fe, ko a we fena ka lɛ ’bɛ tɔ gi.

¹⁴ Munu lé wo ke we ’ko kɛlɛna, wa Séva benu sɔrafié nya. Séva ’ko a Juifi mi nya, yé é a é ziin Balebanzan segele nya.

¹⁵ Yé yo lé Séva benu lɛ léé: Maa Jézu dɔɔ, yé mi lé Pɔl ke a nya, maa ’bɛ dɔɔ, naa, ka a de ɛ nyaa?

¹⁶ Yé yoagizan baa wo ta yé é mini wo lɛ, yé é nyané pa wo ta fɔɔ yé wo bɔra kɔn gi vlan nya, ’té wa é porole ’té wa é tuole nuu.

¹⁷ Juifinu faa valé Grɛkinu faa lé wo ke é nyanale Éfɛz, wo we ’ko ’ma yé kana zén wo faa gi, yé wo Mizan Jézu tɔ zin bɔ.

¹⁸ Munu lé wo bli vo Jézu lɛ, wo va mi kiɛre da yé wenu lé wa kɛlɛ, yé wa fe munu faa yuɛ va.

¹⁹ Yokɛlɛmi kenu da wolé sɛbɛpanu nya, yé wa kyɛ ble munu faa yuɛ va. Sɛbɛnu vlɛ a gɔɔlifu baa yɔ do wɔlɛ soru.

²⁰ ’Bɛ zo lé Mizan dére nwɛɛn yé a ’lɛ dɔ Mizan lé plɛplɛ lé we ma.

Éfɛz bɔ gyɛ

²¹ We ’konu giéle zuo, é dɔ Pɔl gi léé, ’é go Jérusalɛm, yé é gié Masédɔane tɛrɛ valé Akai tɛrɛ lazia. Yé é lé é bli gi léé: Dé an si ’bɛna, é a lé maa Rom ye é ziin.

²² Yé a bɔavazannu fié, Timoté valé Éras, é wo pa zia Masédɔane tɛrɛ la yé yeebozen vo yi kenu kɛlɛna é ziin Azi tɛrɛ la.

²³ ’Bɛ bléyi va, we blɛn do bɔ Balebɔzi ’ko lé we ma.

²⁴ Gɔɔlifufolizan do ana wa laama Démétrius; éé Diane bankɔnnénu kɛla gɔɔlifu nya, ’té alé nyanamapamunu éé gɔɔli kiɛre yé a ma.

²⁵ É élé nyanamapamunu zén ékeva, é valé é bɔlunu gɔɔlifufolizannu nya, yé é léé: An béénu, maa léma: ka gi dɔɔ léé, nyanama ’ko ma lé kaa kaazé tɔnɔ yé.

²⁶ Yé ka a yé ’té ka a maan léé, Pɔl ’ko a munu ’wuo sɛrɛna. É mi kiɛre bɔn gi kini yé é wo bli nɔla a fele nya léé, balenu lé mi a kɛlɛ é bɛ nya, ’bɛnu ’ka balenu nya lo. É ’ka we ’ko kɛlɛna Éfɛz dona lo, naa, é vo sɛ yé é a kɛlɛ Azi tɛrɛ faa la.

²⁷ We lé ke we ’ko gi naané yee lé ke ’ko: dé kolé nyanama kɛlɛ boawe nya munu yuɛ gi, ’bɛ a do; dé baleda Diane bankɔn vo é pla, ’bɛ a do; le lé Azi munu valé tɛrɛlamunu faa a bɔa bɛ, dé é kɛlɛ boazan nya, ’bɛ a do; we lé ke é naané, yee lé ke bɛ.

²⁸ Wo dére ’konu ’ma aan wo wo bli fli é baba yé wo kun siaale ma léé: Éfɛz munu lé Diane a blɛɛn!

²⁹ Fla faa dɔ é gane ta. Wo faa ’wii vian nya ékeva yé wo go zén‐ékevakɔn gi. Masédɔane mi fié lé wo ke Pɔl lé tawo béénu nya, Gaius valé Arisaak, wo wo gana wo méléna.

³⁰ É sɔ Pɔl lɛ léé, ’é go wo va, naa, zuomunu a yi ga a lee.

³¹ Yé Azi tɛrɛ la minwiinmunu kenu lé wo ke a béénu nya, ’bɛnu we pa a lɛ zia léé, alé zanté, té é go zén‐ékevakɔn gi lo.

³² Mi kenu a siaana dére do nya, yé a kenu a siaana dére bɛ nya. Munu lé wo zén ékeva, wa é dɔle ’wo gane ta, yé wean ma lé wo da ékeva, wo kiɛre boen ’ka a gi dɔɔa lo.

³³ Yé wo Alézandre bɔra a gi wo méléna yé Juifinu a nyunu é ’lɛzia. Yé é sɔ Alézandre lɛ léé, ’é we fe munu lɛ, amalé é bɛ nwa a tɔmase nya.

³⁴ Wa gi dɔɔ aan wo léé, é a Juifi mi nya, wo faa vo siaana dére do nya lɛrɛ fié wuo léé: Éfɛz munu lé Diane a blɛɛn!

³⁵ Yé wolé sɛkrétɛɛ wo tadɔ yé é léé: Éfɛz munu, Diane bankɔn valé alé miyili lé é si la gi, mi kyɛn ɛ ’ka a gi dɔɔa léé, Éfɛz munu ɛ ke ’wo yuɛ pana wo ta loo?

³⁶ We ’ko ’ka zavɔwe nya lo. Bɛwemalé é a lé ’ka tadɔ. Té ka zén we va wooo é pla lo.

³⁷ Ka da munu ’ko nya ’ko, yé wo ’ka kolé bale sɔnné sɛrɛ lɛ lo, yé wo ’ka kolé baleda sɔnɔ lɛ lo.

³⁸ Dé é sɔ Démétrius valé élé nyanamapamunu lɛ léé, ’wo mi tɔ fé, webleyinu ana yé weblezannu ana. ’Wo wo tɔ fe ma.

³⁹ Dé we bɛ ana, dé kazé zén‐ékevayi bɔ yé ka ’bɛ fe.

⁴⁰ Ko a bli sina kobo lɛ léé, wo nwale ko nwiinmunu ma we dɔ ko nwiin kyɔ. We tegelean ’bɛ ke ana yé ko zén ékema ’bɛ ma kyɔ, ’bɛ we ’ka lo.

⁴¹ Dérenu ’ko zuo é wo kini ékema.