Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Kelewenu 18 - Kazambale lé Sebe Sauunu 1979


Pɔl go Korɛnt
( 1 Kor 1:1–9 ; 2:1–5 )

1 ’Bɛ zuo Pɔl si Atɛne yé é go Korɛnt.

2 É Juifi mi do ye ana mi, wa laama Akilas; wa yaa Pɔnt. Klode Juifinu faa béli dɔ léé, ’wo si Rom, amalé Akilas valé é na Prisil si é dɛrɛ Itali tɛrɛ la. Yé Pɔl pa wo va.

3 Wo faa panyanama ke aan wo do, yé é nyana wo va yé wo nyanama pa ékeva. Wa sɔkɔn kɛlɛzannu nya.

4 Flinyi faa do do ma, Pɔl éé we fé bazorokɔn gi, ’té éé kwa kulian léé, é Juifinu valé Grɛkinu bɔn‐in kini.

5 Naa, Silas valé Timoté si aan wo Masédɔane, Pɔl daan we bɛnu ma yé ébo nɔ Kazambale dére saa fele lɛ, yé é vo we fena Juifinu lɛ léé, Jézu ɛ ke Krist nya.

6 Juifinu dɔ a ma plɛplɛ yé wo vo a sɔnɔna. Pɔl élé sɔnu gi puo yé é lé wo lɛ léé: Ka nyɛ ’é vo kabo nwiin ma. Ka nyɛ lé we ’ka an nwiin lo. É sia bléyi ’ko va, ’an goo bɛn bɛnu va.

7 É si ’bɛna yé é go Juifinu lé bazorozan do lé wa laama Jutus, a va. Alé kɔn valé bazorokɔn bɛ a é vɔle é ke ta.

8 Naa, bazorokɔnzan Krisipus valé élé kɔngimunu faa wo bli vo Mizan lɛ. Yé Korɛnt mi kiɛre lé wo Pɔl lé wefele ’ma kɔɔn, wo bli vo Jézu lɛ é ziin, yé wo wo batizéwo.

9 Mizan lé Pɔl lɛ yuɛzi gi é béli léé: Té i kana lo. ’I we fe; té i tadɔ lo.

10 Maa a i va, yé mi do kpen ’ka dan é bɛ mane lɛ i ma wenyané kɛlɛle i lɛ we gi lo. ’I we fe. Anlé mi a fla ’ko la kiɛre.

11 É nyana ana lɛɛ do moné suiɛdo Kazambale dére paana Korɛnt munu gi.

12 Bléyian va lé Galiɔn ke Akai lé gbɔrɔnama nya, Juifinu nwa bli do nya Pɔl ma, yé wo go a nya weblekɔn gi yé wo léé:

13 Mi ’ko, é a munu tununa léé, ’wo Bale bɔ a bɔbɛ lé é ’ka bélidɔwe yɛrama lo, a nya.

14 É dɔ Pɔl gi léé, ’é we fé, naa, Galiɔn lé Juifinu lɛ léé: Juifinu, dé mi do weple kɛlɛ, ɛɛ, dé é we lɛrɛlɛrɛ kɛlɛ, dé ka da alé we nya an va, maa dan an tɔné dɔ lɛ ka lɛ ’bɛ we ma, naa,

15 dé ka a zavɔna dérenu koo, tɔnu koo, kalé bélidɔwe koo, ’bɛ wenu ta, ’té kazé we bɛ. É ’ka sɔ lɛ an lɛ léé, an kɛlɛ ’bɛ zo wenu blezan nya lo.

16 Yé é wo bɔra weblekɔn gi.

17 Yé wo faa bazorokɔnzan Sositɛne kun yé wa bla weblekɔn ’léé. Yé Galiɔn ’ka we lɛ wo zi lo.


Pɔl nɔla Antiɔs

18 Pɔl mɔn é ziin Korɛnt. ’Bɛ zuo yé é bwenu yai vɔ yé é vɔ ’yitagoro gi yé é go Siri tɛrɛ la, ’té wo valé Prisil valé Akilasnu ɛ ke. Pɔl bale kun, amalé dé é bɔ Sansré wa nwin puiɛ.

19 Wo bɔ Éfɛz, yé Pɔl Akilas valé Prisil vo bɛ. É wɔra bazorokɔn gi, yé é we fe Juifinu lɛ,

20 yé ’bɛnu lé a lɛ léé: ’I mɔn ko va. Naa, é ’ka a nyi si lɛ lo;

21 é wo yai vɔ yé é léé: Fɛti lé é dan bɔ lɛ Jérusalɛm bɛ, maa kɛla kpɔ. Dé é sɔ Kazambale lɛ, maa dan da lɛ ka va é ziin. Yé é vɔ ’yitagoro gi Éfɛz.

22 Yé é zun Sézaré, ’bɛ zuo yé é go Jérusalɛm. Dé é we léglizigimunu va faa, é go Antiɔs.

23 Pɔl yi kenu kɛlɛ aan wo Antiɔs, é zi sia yé é gié Galasi valé Friji tɛrɛ la Jézu zuomunu faa dɔle nya plɛplɛ.


Apolɔs we fe Éfɛz

24 Juifi mi do ana wa laama Apolɔs, wa yaa Alézandri; é a wefezan zima nya yé é Kazambale lé sɛbɛ gi wenu dɔɔ é zima, yé é da Éfɛz.

25 Wo Mizan lé zi ta wenu paa a gi é kyɛn, yé é Jézu lé we fe munu lɛ é fuu nya é ta, yé é Jézu lé we paa wo gi tegele, dɔlé té é Jan lé batizé saa ɛ dɔɔ.

26 É wefele pélisia Jézu lé we nya bazorokɔn gi munu faa yuɛ va. Akilas valé Prisil a dére ’ma aan wo, wa si yé wo go a nya ’wo va, yé wa bɔn gi taa kini tegele Kazambale lé we nya.

27 Dé é a a va léé, ’é gié Akai, bwenu bɔ a va we ’ko ma, yé wo sɛbɛ gyɛ ’bɛna zuomunu lɛ léé, ’wa si wolé bɛn nya. É bɔ aan wo ’bɛna, munu lé Kazambale zin kɛlɛ wo lɛ léé, wo bli pa Jézu gi, é bɔ wo va é baba.

28 Yé é za vɔ Juifinu va é fuu nya é ta mi faa yuɛ va, a nagɔɔnle nya Kazambale lé sɛbɛ gi léé, Jézu a Krist nya.

Alliance Biblique de Cote d'Ivoire 1979

British & Foreign Bible Society
ကြှနျုပျတို့နောကျလိုကျပါ:



ကြော်ငြာတွေ