Kelewenu 17 - Kazambale lé Sebe Sauunu 1979

Tɛsalɔnik fla bɔ gyɛ

¹ Pɔl valé Silas gié Anfipoli valé Apoloni yé wo bɔ Tɛsalɔnik. Juifinu lé bazorokɔn do a ’bɛna.

² Pɔl wɔra ana fɛan zo lé éé a kɛla yifaama, a zo. Flinyi yaa nya éé we fé wo lɛ, ’té éé Bale lé sɛbɛ gi vɛɛsénu bɔraan wo lɛ,

³ a gɔɔnle wo lɛ we gi léé, é a lé Krist é nyané ble yé é nwa gamunu va. Yé é léé: Jézu lé, maa ke alé we fena ka lɛ, yee lé ke Krist nya.

⁴ Wo va mi kenu dɔ dére ’ko ta, yé wo péli vɔ Pɔl valé Silas va. Yé é ziin, Grɛki mi kiɛre lé wo ke Juifinu lé bazorona, é valé lɛamalomu kiɛre, ’bɛnu a wo va é ziin.

⁵ Naa, Juifinu a maawona Pɔlnu va yé wo fla gwɛmazan kenu si yé wo wo pa ’wo va. Yé wo munu zén ékeva, yé wo fla bɔ gyɛ. Yé wo go guli nya wo bli gi Jazɔn lé kɔn ’léé, yé wo Pɔl valé Silas nagini ’bɛna, gole wo nya we gi munu va.

⁶ Yé wo ’ka wo ye lɛ lo, yé wo Jazɔn valé bwe kenu gana yé wo go wo nya minwiinmunu ’lɛ siaale nya léé: Munu lé wo tɛrɛ faa sɛrɛ wo da é ziin ’ko,

⁷ yé Jazɔn wo si élé bɛn nya. Woo Sézaa lé bélidɔwenu lɛgaanma yé wo léé, minwiinzan blɛn bɛ ana, Jézu nya.

⁸ Dére ’konu ma lé flamunu valé wo nwiinmunu dɔ wo gane la.

⁹ Yé wo ’ka daan lɛ Jazɔn valé mi pɔnénu ma lo fɔɔ yé ’bɛnu bɛfɛ vo wo lee ’bɛnu tabofɛ nya.

Pɔl valé Silas go Béré

¹⁰ É béli tɔɔn yé bwenu Pɔl valé Silas pa zia Béré. Dé ’bɛnu bɔ ’bɛna wo go Juifinu lé bazorokɔn gi.

¹¹ Juifinu ’ko, ’bɛnu bli a é zima é mini Tɛsalɔnik munu zé ta. ’Bɛnu dére ’ko nyi si é kele yé ’bɛnu vo Bale lé sɛbɛ gi ginina yi do do ma, we lé wa fena ’wo lɛ, dé weboen léé? yé wa ye.

¹² Wo va mi kiɛre bli vo a lɛ, é valé Grɛki gɔné kiɛre valé wolé lɛamalomu nya.

¹³ Tɛsalɔnik Juifinu a ’ma aan wo léé, Pɔl a Kazambale dére fena Béré é ziin, wo da ’bɛna munu bli sɛrɛ lɛ léé, ’bɛnu ’é nwa wo ma.

¹⁴ ’Bɛna tɔɔn bwenu Pɔl pa zia wɛyi mazia, yé Silas valé Timoté vo Béré.

¹⁵ Munu lé wo go Pɔl dɔ lɛ zia wo go a nya fɔɔ Atɛne. Yé wo nɔla wo pa gi yé Pɔl we pa wo ’léé léé: ’Ka go, ’ka fe Silas valé Timoté lɛ léé, ’wo da an va é kele.

¹⁶ Pɔl a wo lɛbɛnna aan wo Atɛne yé é fla ’ko ta ye é sɔɔlale miyilinu nya, é vo guli danna é bli gi.

¹⁷ Amalé é we fe Juifinu lɛ bazorokɔn gi, é valé munu lé wo ke Juifinu lé bazorona, wo nya. Yé munu lé woo keeé wo nya flɛ gi yi faa do do ma bɛ, éé we fé ’bɛnu lɛ é ziin.

¹⁸ Migivuruzannu palu fié lé wo wo laama épikuri valé sitoisi, wo va mi kenu kun wefele ma a lɛ. Yé wo va mi kenu léé: Boawefezan ’ko, é a mɛ we ɛ fenaa? Yé dé wo va mi bɛnu a ’ma léé, é a Jézu valé mi nwale gale va lé we ɛ fena, wo léé: É dɔ ko gi léé, é a bale bɛnu ɛ lé we fena.

¹⁹ Yé wo Pɔl si yé wo goan wolé weblena Aréopaze gɔ nwiin yé wo léé: We dɛrɛ lé i a paana munu gi lao bɛ, bé gi fe ko lɛ, ko ’ma.

²⁰ Naa, givuruwe dɛrɛnu lé i ke a fena, é sɔ ko lɛ léé, ko wo gi ’ma.

²¹ We dɛrɛ fele valé we dɛrɛ ’male ɛ ke Atɛne munu faa valé wolé fla bɛnnu panyanama nya yifaama.

²² Pɔl nwa Aréopaze méléna yé é léé: Atɛne munu, maa a ye léé, kalé balenu sɔ ka lɛ é baba.

²³ Maa a giéna aan wo kalé fla, yé fɛnu lé ka wo bɔa, dé maa wo nagini maa balebanna do ye, yé ka a gyɛ a ta léé: Bale lé, munu ’ka a dɔɔa lo, a banna lé. Fɛ lé ka a bɔa, ’té ka ’ka a dɔɔa lo, yee lé maa ke alé we fena ka lɛ.

²⁴ Bale lé é tɛrɛ valé é tafɛnu faa kɛlɛ, é a Lazan valé Tɛrɛzan nya. É ’ka nyanaan kɔnnu lé mi a dɔa, wo gi lo.

²⁵ Yee Bale ’ko mawe ’ka fɛ do kpen gi yé munu a kɛlɛ a lɛ wo bɛ nya lo. Vole é yuɛma koo, flinle koo, fɛ faa koo, yee ɛ wo no fɛ faa lɛ.

²⁶ Bale a kɛlɛ léé, munu faa pun sina ’é kɛlɛ do, yé ’wo nyana tɛrɛ la fɛfaana. Yé é wo lɛɛnu glɛ dɔ, yé é munu nyanana glɛnu dɔ.

²⁷ É sɔ a lɛ léé, ’wo Mizan nagini yé wo kwa kuli a yele ma wo bɛ danle nya. Dɔlé té Bale ’ka é sile ko faa do do ma baa lo.

²⁸ Vole é yuɛma koo, kɔɔle koo, bélile koo, ko wo ye yee Bale ɛ va. Yee lé kalé lɛrɛvɔmi kenu a fe é ziin léé: A va lé ko gɔnɔ ke.

²⁹ Bɛwemalé, dé ko a Kazambale dɔgɔnɔ nya, té é dɔ ko gi léé, Bale a bélé kyan koo, gɔɔli fu koo, gɔlɛ lé munu a nyaa gi kini valé nyanama pale nya koo, wo zo lo.

^30-31 Bléyian va lé munu ke wo tanyila, Kazambale ’ka wolé wenyané pa lɛ é ’wuo gi we nya lo. É yi do dɔ, ’bɛ yi nya wo dan tɛrɛlamunu faa lé we ble lɛ tegele. Mi lé é a dɔ weblezan nya, é ’bɛzan nwa gamunu va, yee ɛ ke munu faa lé tɔmase zin nya léé, Kazambale a dɔ weblezan nya. Amalé, lao, é munu faa béli dɔ fɛfaana léé, ’wo ’wo bli nɔla ma.

³² Wa ’ma aan wo léé, é a mi gale nwale lé we fena, mi kenu a ma we nana, yé mi kenu léé: Ko dan ko tɔné dɔ lɛ i lɛ yé ko we ’ko ’ma yi bɛ nya.

³³ Yé Pɔl si wo méléna.

³⁴ Naa, mi kenu pa a va duowo yé wo bli vo Jézu lɛ. Aréopaze mi Dénis koo, lezan lé wa laama Damaris koo, é valé mi kenu koo, woo lé.