Kelewenu 16 - Kazambale lé Sebe Sauunu 1979

Timoté go Pɔl valé Silas va

¹ ’Bɛ zuo yé wo go Dɛɛbe valé Lisitre. ’Bɛna mi Jézu zuomi do ana, wa laama Timoté. A bu a Krétiɛn Juifi le nya yé a ti a Grɛki mi nya.

² Lisitre bwenu valé Ikonium bwenu gɔné ’ko ma we zin fe.

³ É sɔ Pɔl lɛ léé, ’wo go a nya, yé é a si yé ana Juifinu lé we ma lé é a gane dɔ. Naa, wo faa a gi dɔɔ léé, a ti a Grɛki mi nya.

⁴ Wa giéna aan wo flanu ta, we lé nwunvɔmunu valé Jérusalɛm mi segelenu a bɛ pa ékema, wa zuo fe bwenu lɛ léé, ’wo a ta tawo.

⁵ Léglizigimunu dɔ gligli Bale lé we gi, yé wo ’léé gi vo gyɛna yi faa do do ma.

Pɔl Masédɔane mi ye yuɛzi gi

⁶ Léli Sauun Kazambale dére fele Azi tɛrɛ la yi ga wo lee aan wo, wo gié Friji valé Galasi tɛrɛ la.

⁷ Wo bɔ aan wo Mizi tɛrɛ sɔnɔ, wa a va léé, wo go Bitini tɛrɛ la. Naa, Jézu Léli ’ka ’bɛ nyi si lɛ wo lɛ lo.

⁸ Wo Mizi tɛrɛ kini yé wo go Troas.

⁹ É béli Pɔl we do ye yuɛzi gi; Masédɔane mi do a é dɔle yé ’bɛ zanté vɔ Pɔl lɛ léé: ’I da ’i bɔ ko va Masédɔane.

¹⁰ Pɔl lé yuɛzi yele zuo, ko a a va léé, ko go Masédɔane, ’té é a ko gi léé, Mizan a ko laana léé, ko Wenéné fe ’bɛna.

Lidi bli nɔla

¹¹ Ko si aan wo Troas, ko vɔ ’yitagoro gi yé ko go tegele Samotras, yé ’bɛ é tu kini ko zun Néapolis.

¹² Ko si ’bɛna yé ko go Filip, yee ɛ ke Masédɔane fee do la kuru ’léé blɛn nya. É a é plale Rom munu wuo. Yé ko yi kenu kɛlɛ fla ’ko la.

¹³ Flinyi nya, ko si fla yé ko go yuu ba gi. É a ko gi léé, bazorona do ana ’bɛna. Ko nyana, yé ko we fe lomu lé wo ke é zénle ékeva ana, wo lɛ.

¹⁴ Le do ana bɛ, wa laama Lidi, é a tɔmunu lé sɔdanzan nya yé é si Tiatii. Le ’ko éé kanaan Kazambale lee, yé é tɔné dɔ ko lɛ. Mizambale a bli lɛ so, we lé Pɔl a fe, a ’male we gi.

¹⁵ Yee koo, é lelenu koo, dé ko wo batizéwo faa é lé ko lɛ léé: Dé ka a ye léé, an bli a Mizambale lɛ, ’ka da ’ka nyana an va. Yé é ko tunu we kiɛre fele nya.

Wo Pɔl valé Silas vɔ bokɔn gi Filip

¹⁶ Dé ko a gona bazorona, ko kee mi wuole do nya. Ménésan yo do a lezan ’ko gi. É tɔnɔfɛ blɛn ye ézannu lɛ ’mone dɔle we ma.

¹⁷ É gole sia ko valé Pɔl zuo, ’té éé siaan léé: Munu ’ko a Loruzan Bale wuomunu nya, yé wa misiéwegi zi gɔɔna ka lɛ.

¹⁸ É we ’ko kɛlɛ yi kiɛre nya. Pɔl wɔlɛ gi nyaa é ma alé we ma, yé é nɔla yé é lé yo lɛ léé: Maa lé i lɛ Jézu Krist tɔ gi léé, ’i si a gi, yé é si lezan gi é nya do.

¹⁹ Wuole zannu a ye aan wo léé, ’wolé tɔnɔyémafɛ san wo lee, wo Pɔl valé Silas kun yé wo wo gana flɛ gɔnɔ gi ’wo nwiinmunu vazia.

²⁰ Yé wo go wo nya weblezannu va, yé wo lé wo lɛ léé: Munu ’ko, wo kolé fla bɔ gyɛ. Wa Juifinu nya.

²¹ Ko a Rom munu nya, yé gɔnɔlawenu lé wa yi ga ko lee léé, té ko wo nyi si lɛ lo, yé té ko wo kɛlɛ lo, yee lé wa fena ko lɛ.

²² Munu nwa wo ma é ziin yé weblezannu wolé sɔ si wo ta, yé wo lé munu lɛ léé: ’Ka wo bla plén nya.

²³ Wo wo bla ’sɛ ’sɛ ’sɛ yé wo wo vɔ bokɔn gi yé wo lé bokɔnzan lɛ léé: ’I yuɛ pa wo va é zima.

²⁴ Dé bokɔnzan ’bɛ ’ma, é wo vɔ bwati ɛ gi ’té, yé é wo gane vɔ yili gi.

²⁵ Tu méléna, Pɔl valé Silas a bazorona ’té woo lɛrɛ vɔa Kazambale tɔ zin fele nya, ’té bokɔngimunu a maan.

²⁶ Tɔɔn yé tɛrɛ manyɔɔn plɛplɛ fɔɔ yé bokɔn gane manyɔɔn. A bléyi duo nya, kɔn lɛ faa so yé bokɔngimunu faa ma gɔgɔbalenu kini.

²⁷ Yé bokɔnzan vuo. É bokɔn lɛnu yé aan wo é sole, é dɔ a gi léé, bokɔngimunu vlan si, amalé élé gwɔun so a gi ébo gyɛle we ma.

²⁸ Naa, Pɔl siaa dére plɛplɛ nya léé; Té i wenyané kɛlɛ ibo lɛ lo. Ko faa ana ’ko.

²⁹ Bokɔnzan kyɛbɔ ma laa, yé é wɔra é kele yé é dia é manyɔɔnle nya Pɔl valé Silas wuo.

³⁰ É wo bɔra yé é léé: Anzannu, maa kɛla kaa yé an si we gii?

³¹ Pɔl valé Silas lé a lɛ léé: ’I bli vo Mizan Jézu lɛ, yé i dan si lɛ we gi, bii valé ilé kɔngimunu nya.

³² Yé wo Mizan dére fe yee valé élé kɔngimunu faa lɛ.

³³ A bléyi duo nya é béli bokɔnzan go wo nya é va yé é wo tuonanu paa yé wo yee valé élé munu batizéwo ana bɛ.

³⁴ É go wo nya élé kɔn gi yé é fɛblele nɔ wo lɛ, yé yee valé élé munu faa gi nana bli vole Kazambale lɛ we ma.

³⁵ ’Bɛ é tu kini, weblezannu sunyanu pa zia léé, ’wo go a fe bokɔnzan lɛ léé, ’é munu ’ko bɔra.

³⁶ Yé bokɔnzan lé Pɔl lɛ léé: Weblezannu munu pa zia a fele we gi léé, an ka bɔra, amalé sin, ’ka bɔra ’ka go drɔɔ.

³⁷ Naa, Pɔl lé sunyanu lɛ léé: Wo ’ka kolé we ble lɛ lo; ko lé ko ke Rom munu nya, wo ko bla plén nya mi faa yuɛ va, ’bɛ zuo wo ko vɔ bokɔn gi, yé sin ’naan, wo léé, wo ko bɔra kyeen gii? ’Bɛ nyi ’ka sié lo. Woboen ’é da ko bɔra.

³⁸ Sunyanu we ’konu fe weblezannu lɛ. Weblezannu a ’ma aan wo léé, wa Rom munu nya, kana zén wo gi.

³⁹ Wo da Pɔlnu bli dɔrala lɛ, yé wo wo bɔra yé wo zanté vɔ wo lɛ léé, ’wo si fla ’wo go.

⁴⁰ Wo bɔra aan wo bokɔn gi, wo go Lidi lé kɔn ’léé. Yé wo bwenu ye, yé wo we pla wo lɛ. ’Bɛ zuo yé wo go.