Kelewenu 15 - Kazambale lé Sebe Sauunu 1979

Wo we ’wuo dɔ Jérusalɛm

¹ Mi kenu si Judé, yé ’bɛnu we paa bwenu gi léé: Dé wo ’ka ka gane dɔ lɛ bélé fɛan zo lé Moizi a fe, a zo lo, ka ’ka bɔa sile lɛ we gi lo.

² Yé wo valé Pɔlnu zé dére ’ka bɔ lɛ ékema lo, yé é kinin za blɛn nya wo worona. Amalé bwenu léé, dé é a ’bɛ zo ’wo go a gi laa. Yé Pɔl valé Banabas koo, wo é va mi kenu koo, wo go Jérusalɛm nwunvɔmunu valé mi segelenu va, we ’ko yuɛ gi bole we ma.

³ Léglizigimunu wo dɔ zia yé wo go yé wo gié Fénisi valé Samari tɛrɛ la, yé wo bɛn bɛnu bli nɔlale lé we zuo fe ’bɛna bwenu lɛ, amalé ’bɛnu faa gi nana é baba.

⁴ Wo bɔ aan wo Jérusalɛm, léglizigimunu koo, nwunvɔmunu koo, mi segelenu koo, ’bɛnu wo bɛn si yé we faa lé Kazambale a kɛlɛ wo nya, wa zuo fe.

⁵ Yé Farizimi kenu lé wo bli ke Jézu lɛ, wo nwa, yé wo léé, é a lé wo bɛn bɛnu gane dɔ, yé ’wa fe wo lɛ léé, ’wo Moizi lé bélidɔwe kɛlɛ.

⁶ Nwunvɔmunu valé mi segelenu zén ékeva léé, ’wo we ’ko yuɛ gi bo.

⁷ Za blɛn vɔle zuo, Piɛri nwa yé é lé wo lɛ léma: An bwenu, ka a gi dɔɔ léé, ana mɔn Kazambale kaa vabo yé é an si léé, bɛn bɛnu ’wo Wenéné ’ko ’ma an ’léé yé wo bli vo a lɛ.

⁸ Yé Kazambale lé, é munu bli dɔɔ, é Léli Sauun vɔ wo ta bélé fɛan zo lé é a vɔ kaa ta, a zo, alé wo sile tɔmase nya.

⁹ É ’ka kaalé we kɛlɛ lɛ é yɛrama yé é ’bɛnu zé kɛlɛ é yɛrama lo. É wo bli kɛlɛ sauun bli pale ma.

¹⁰ Sin, mɛmalé ka a Kazambale gi danna, kɔné blɛn dɔle nya Jézu zuomunu nwiin? Kɔné ’ko sile ko valé ko tranu kele é kyɛn.

¹¹ Naa, kaa bli a a lɛ léé, Mizan Jézu lé zin ma lé kaa dan si lɛ we gi, bélé wo zo.

¹² Munu faa lé wo ke é zénle ékeva bɛ, wo vo é tadɔle, yé wo ’wo tɔné dɔ Banabas valé Pɔl lɛ. Gyɛzorowenu faa valé we blɛnblɛnnu faa lé Kazambale a kɛlɛ wo nya bɛn bɛnu méléna, wa zuo fe wo lɛ.

¹³ Dé wo nyaa wefele nya, Jak kun ézé fele ma yé é léma:

¹⁴ An bwenu, ’ka tɔné dɔ an lɛ. Fɛan zo lé Kazambale bɛnnu nagini sin yé é mi lɛ do si wo va yé é ’é tɔ pa wo ma, yee lé Simɔn a fe bɛ.

¹⁵ ’Bɛ valé balelayemunu dére kɛlɛ do, fɛan zo lé é ke é gyɛle Kazambale lé sɛbɛ gi, a zo; é léé:

¹⁶ ’Bɛ zuo, maa dan da lɛ é ziin, yé David lé sɔkɔn lé é dia bɛ, maa dan a nwa lɛ, Maa dan a sɛrɛlenu ma’lɛrɛ lɛ, yé maa dan a dɔ lɛ loru é ziin,

¹⁷ Mi pɔnénu lé Mizambale naginile we gi, É valé bɛnnu faa lé, an tɔ ke wo ma, wo nya. Mizambale lé é we ’konu kɛlɛ,

¹⁸ Yé é wo dɔɔ a pélisia bléyi va, yee ɛ fe.

¹⁹ Bɛwemalé, é dɔ an gi léé, bɛn bɛnu va munu lé wo nɔla Kazambale va, té wo we tɔntɔn dɔ wo nwiin lo.

²⁰ Naa, ’wo sɛbɛ gyɛ wo lɛ léé: Fɛ lé wa no miyilinu lɛ, ’té é kɛlɛ é lɛrɛlɛrɛ, té wa ble lo; té wo pɛnpɛnné gyɛ lo; winu lé fɛ fɔnɔ wo bɔrɔ gi yé wo ga, té wo ’bɛnu ble lo; té wo wi nyɛ ble lo.

²¹ É sia ka tranu bléyi va, fla do do faa la mi kenu éé Moizi lé we fé munu lɛ, yé woo alé sɛbɛ ta fé yifaama flinyi nya bazorokɔnnu gi.

Wewuodɔmunu sɛbɛ pa zia

²² Nwunvɔzannu koo, mi segelenu koo, léglizigimunu faa koo, é sɔ wo lɛ léé, ’wo mi kenu si ’wo va ’ko, yé ’wo wo nwunvɔ Antiɔs Pɔl valé Banabas va. Jud lé wa laama Baasabas, ’bɛ a do, yé Silas a do, wo lé wo wo si; munu ’ko lé we a tegele bwenu yuɛ gi.

²³ Sɛbɛ lé wa pa wo lee, a gi lé ke ’ko: ’Kaa bɛn bɛnu va munu lé ka ke ko zuanénu nya, ’té ka ke Antiɔs koo, Siri valé Silisi tɛrɛ la koo, ko we ka va. Ko nwunvɔzannu valé mi segelenu lé ko ke ka bwenu nya, ko ɛ ke sɛbɛ ’ko pana ka lɛ zia.

²⁴ Ko a ’ma léé, mi kenu lé wo si ko va, ’té ko ’ka wo nwunvɔ lɛ lo, wo gi bɔrɔ pa ka ma wo dérenu nya yé wo ka gi vuru ka ma.

²⁵ Ko dére pa do yé é sɔ ko lɛ léé, ko mi kenu si ko va yé ko wo pa ko blibɔmamunu Banabas valé Pɔl va yé wo go ka va.

²⁶ Pɔl valé Banabas ’wo bli si wolé tɛrɛla lɛ Kozan Jézu Krist tɔ lé we ma.

²⁷ Amalé ko Jud valé Silas si yé ko wo nwunvɔ ka va yé wo dan we duo fe lɛ ka lɛ wo ’léé.

²⁸ Naa, é sɔ Léli Sauun lɛ, yé é sɔ é ziin ko lɛ léé, té wo kɔné bɛ dɔ ka nwiin lo, fɔɔ yee lé é ke tegele, yee lé ke ’ko:

²⁹ Té ka miyili banwi ble lo; té ka wi nyɛ ble lo; winu lé wo fɛ fɔnɔ wo bɔrɔ gi yé wo ga, té ka wo ble lo; té ka pɛnpɛnné gyɛ lo; fɛnu lé ke ’ko, dé ka yuɛ pa kabo va wolé we ma ka kɛla é zima. Ka yaima.

³⁰ Mi ziɛn ’ko, dé wo we léglizigimunu va faa yé wo go Antiɔs, ana lé wo munu zén ékeva yé wo sɛbɛ nɔ wo lɛ.

³¹ Wa ta fe aan wo, bwenu gi nana tɔrɔpaawe lé wa ’ma a gi, a ma.

³² Jud valé Silas lé wo ke balelayemunu nya, wo we pla munu lɛ, yé wo wo bli ta dɔ plɛplɛ we kiɛre fele nya.

³³ Yi kenu giéle zuo, bwenu zi nɔ wo lɛ yé wo go drɔɔ é ziin, munu lé ’bɛnu wo nwunvɔ yi la, ’bɛnu va.

³⁴ Naa, é sɔ Silas lɛ léé, ’é vo ana, yé é vo ana.

³⁵ Pɔl valé Banabas vo Antiɔs we paana munu gi, yé mi kiɛre pa wo va yé wo valé ’bɛnu vo Mizan lé wenéné fena Antiɔs munu lɛ.

Pɔl valé Banabas kini ékema

³⁶ Yi kenu gié. ’Bɛ zuo Pɔl lé Banabas lɛ léé: ’Ko go é ziin fla faa lé ko Mizan dére fe ana yi la bɛ, wona, yé ko bwenu tagini, yé dé wa kaa? yé ko gi dɔɔ.

³⁷ É sɔ Banabas lɛ léé, ’wo go Jan Maak nya.

³⁸ Naa, mi lé é diéra wo zuo ’té wa Panfili, yé a bɛ ’ka go lɛ wo zuo wolé nyanama pana lo, é dɔ Pɔl gi léé, té ’bɛzan é go ’wo va lo.

³⁹ A ta zavɔle ’na fɔɔ yé é wo kini ékema. Banabas Maak si yé yee valé ’bɛ go yé wo vɔ ’yitagoro gi yé wo go Sipri wɛyi worona tɛrɛ la.

⁴⁰ Yé Pɔl Silas si yé ’bɛnu é go. Yé bwenu wo bɛ vo Mizambale lé zin lee.

⁴¹ Wo gié Siri valé Silisi tɛrɛ la, yé wo léglizigimunu dɔ gligli.