Kelewenu 14 - Kazambale lé Sebe Sauunu 1979

Pɔl valé Banabas go Ikonium

¹ Pɔl valé Banabas a Ikonium aan wo, wo wɔra ’bɛna Juifinu lé bazorokɔn gi. Wo we fe fɛan zo, amalé Juifinu kiɛre valé Grɛkinu kiɛre wo bli vo a lɛ.

² Juifi mi kenu lé wo bli ’ka we ’ko lɛ lo, wo bɛn bɛnu bli nwa léé, ’wo wenyané kɛlɛ bwenu lɛ.

³ Wo mɔn Ikonium duowo, yé wo we fe ’wo bli ta plɛplɛ nya, ’té wo bli a Mizan lɛ, yé ’bɛ dɔ élé zin dére zuo, yé ’bɛ a se kɛlɛ wo lɛ léé, wo we blɛnblɛnnu valé gyɛzorowenu kɛlɛ.

⁴ Yé flamunu gi bɔi fié. A kenu dɔ Juifinu zuo yé a pɔnénu dɔ nwunvɔmunu zuo.

⁵ Bɛn bɛnu valé Juifinu valé wo nwiinmunu, wo bli kɛlɛ do yé wo nwa nyané pale Pɔl valé Banabas ta we ma, é valé wo gyɛle gɔlɛ nya we ma.

⁶ Pɔl valé Banabas a gi dɔɔ aan wo, yé wo fwi yé wo go Likaoni tɛrɛ lé flanu ta, Lisitre valé Dɛɛbe, wo valé wo zi tɛrɛnu la.

⁷ Yé wo Wenéné fe ’bɛna.

Wo gɔlɛ vuli Pɔl va Lisitre

⁸ Mi do a é nyanale Lisitre. A ganenu ’ka plɛplɛ lo. Wa yaa é gane gale nya. É ’ka tan ta do kpen vinin wo lɛ lo.

⁹ É tɔné dɔ Pɔl dére lɛ. Yé Pɔl a nagini téiin yé é a ye léé, alé blipale é bɔa a bélile lɛ,

¹⁰ yé é we fe plɛplɛ yé é léé: ’I nwa, ’i drɔ i gane ta. Yé é nwa fɔrɔle nya, yé é tawo.

¹¹ We lé Pɔl a kɛlɛ bɛ, munu ’bɛ ye aan wo, wo siaa Likaoni dére gi léé: Balenu lé, wobo ma nɔla mi nya yé wo da ko va, woo lé.

¹² Wo Banabas tɔ laa Zéus. Pɔl ɛ ke wefezan nya, amalé wa laa Eɛmɛs.

¹³ Zéus bangikɔn a fla gɔrɔ ’léé sɔnɔ yé Zéus banzan da dirigɔnénu valé yilivwinu nya ’bɛna. É sɔ yee valé munu lɛ léé, ’wo saraka bo.

¹⁴ Nwunvɔzannu Banabas valé Pɔl, wo we ’ko ’ma aan wo, wo ’wolé sɔnu fia yé wo vlan buru fiéfié munu worona, siaale nya léé:

¹⁵ Éé, munu! Mɛmalé ka ke we ’ko zoɛ kɛlɛnaa? Ko é ziin, ko a blaminu nya bélé ka zo. Ko da wenéné ɛ fe lɛ ka lɛ. Ko da we pla lɛ ka lɛ léé, ’ka si fɛ pla ’konu zuo yé ’ka nɔla Bale yuɛmale va. ’Té la koo, tɛrɛ koo, wɛyi koo, fɛnu faa lé ke wo gi koo, é wo kɛlɛ bɛ, yee lé.

¹⁶ É li é vinin, Bale ’ko zi nɔ bɛn faa lɛ léé, ’wo ’wobo lé zi sia,

¹⁷ naa, duowo wezin kɛlɛle ka lɛ ma lé éé a nagɔɔn‐an ka lɛ yifaama léé, ’yee ɛ ke ana. Éé lɛɛ paan ka lɛ zia yé éé kalé féi dɔa di, yé éé fɛblele no ka lɛ kiɛre yé éé ka faan gi nanale nya.

¹⁸ Dére ’konu nya lé wo munu lé saraka bole wo lɛ yi ga, naa, a yi gale kɛlɛ plɛplɛ.

¹⁹ ’Bɛ zuo, Juifinu si Antiɔs valé Ikonium yé wo da Lisitre yé wo ’bɛna munu ye ’wozé nya yé wo Pɔl gyɛ gɔlɛ nya. É dɔ wo gi léé, é ga, yé wa gana yé wo goan fla gini ma.

²⁰ Naa, zuomunu a zi lɛ sɔɔ yé é nwa, yé é go fla. Dé ’bɛ é tu kini, yee valé Banabas go Dɛɛbe.

²¹ Wo wenéné fe aan wo ’bɛ fla la yé wo mi kiɛre ye Jézu zuomunu nya, wo nɔla yé wo go Lisitre koo, Ikonium koo, Antiɔs koo, wona é ziin.

²² Yé wo zuomunu bli ta dɔ plɛplɛ, yé wo we pla wo lɛ léé, ’wo dɔ Bale lé we gi gligli, yé wo léé, é a lé ko wɔra nyané kiɛre blele nya Kazambale lé fuatɛrɛ la.

²³ Wo mi segelenu dɔ léglizinu faa do do gi. Bazorole valé lɔrɔ sɔnle zuo wo wo bɛ pa Mizambale lé wo bli ke a lɛ bɛ, a lee.

Pɔl valé Banabas go ’wo pa gi Antiɔs, Siri tɛrɛ la

²⁴ ’Bɛ zuo, yé wo gié Pisidi tɛrɛ la yé wo bɔ Panfili tɛrɛ la.

²⁵ Yé wo dére fe Pɛɛje yé wo go Atali.

²⁶ Ana mi lé wo vɔ ’yitagoro gi, yé wo go Antiɔs, fɛana lé léglizigimunu wo bɛ vo Kazambale lé zin lee é vinin, nyanama lé wo si a pale lɛ sɔɔna, a pale we gi bɛ, yee fla ’ko ta lé wo go.

²⁷ Wo bɔ aan wo, wo léglizigimunu zén ékeva. Yé we faa lé Kazambale a kɛlɛ wo nya, é valé fɛan zo lé Kazambale zi lɛ so bɛnnu lɛ yé wo wɔra alé we gi, wa zuo fe ’bɛnu lɛ.

²⁸ Yé wo mɔn ’bɛna zuomunu va.