Kelewenu 13 - Kazambale lé Sebe Sauunu 1979

¹ Balelayemunu valé Kazambale lé we paa mi gi munu ana Antiɔs lé léglizi gi, Banabas koo, Siméɔn lé wa laan Nijɛɛ, yee koo, Sirɛne mi Lusius koo, Manaɛn lé wo tin gbɔrɔnama Érɔd nya ékeva, yee koo, Sɔl koo, woo lé.

² Wa Mizambale bɔna bléyian va, ’té woo lɔrɔ sɔn‐o, Léli Sauun léma: ’Ka Banabas valé Sɔl pa é yɛrama, nyanama lé maa wo laa a ma, wolé a pale we gi.

³ Lɔrɔ sɔnle valé bazorole zuo, wo bɛnu pla wo ta, yé wo zi nɔ wo lɛ yé wo go.

Nwunvɔmunu we fe Sipri tɛrɛ la

⁴ Léli Sauun Banabas valé Sɔl pa zia, yé wo go Sélusi. ’Bɛna lé wo vɔ ’yitagoro gi yé wo go wɛyi worona tɛrɛ lé wa laama Sipri, a ta.

⁵ Wo bɔ Salamine, yé wo Kazambale dére fe Juifinu lé bazorokɔn gi. Jan a wo va wo bɔavazan nya.

⁶ ’Bɛ zuo wo gié yee wɛyi worona tɛrɛ faa la fɔɔ yé wo bɔ Pafo. Ana lé wo yokɛlɛzan do ye; é a viébalelayezan nya, Juifi mi nya, wa laama Baa‐Jézu.

⁷ É a gbɔrɔnama bɛgizan va. ’Bɛ a gikinizan nya, wo ’bɛ laama Sɛgius Pɔlus. Yé ’bɛ a a va léé, ’é Bale dére ’ma, amalé é Banabas valé Sɔl laa.

⁸ Naa, Élimas, ’bɛ gi léé, yokɛlɛzan, é dɔ Pɔlnu ma Kazambale lé we gi sɛrɛle gbɔrɔnama bɛgizan tɔné gi we ma.

⁹ Yé Sɔl lé wa laama é ziin Pɔl, Léli Sauun a kun yé é yuɛ vo gɔnézan va téiin yé é léé:

¹⁰ Dabli gɔnɔ faa kɛlɛ gɔné, misaangɔné, yosɔlɛgɔné, we tegelenu faa nyanézan. I ’ka dan daan lɛ Mizambale lé we tegelenu gi sɛrɛle ma loo?

¹¹ Sin, Mizambale bɛ a i ta; i kɛla yuɛwiizan nya yé bléyi kenu nya i ’ka dan yiri ye lɛ lo. Tɔɔn, a yuɛ gi gunu dɔra, yé é vo é bɛ danna fɛnu lɛ, yé é vo mi laana léé, wo dɔ ’é ’lɛ.

¹² We lé é kɛlɛ, gbɔrɔnama bɛgizan a ye aan wo, a gi vuru Mizambale lé we lé wa paan munu gi, a we ma, yé é pa Bale lé we ta.

Pɔl valé Banabas go Antiɔs lé ke Pisidi tɛrɛ la, ana

¹³ Pɔl valé é bɔlunu vɔ ’yitagoro gi Pafo, yé wo go Pɛɛje, Panfili tɛrɛ la. ’Bɛna lé Jan si wo va yé é go Jérusalɛm é ziin.

¹⁴ Wo si Pɛɛje yé wo kun tawole ma yé wo bɔ Antiɔs, Pisidi tɛrɛ la. Flinyi nya wo wɔra bazorokɔn gi yé wo nyana.

¹⁵ Bélidɔwe valé balelayemunu lé sɛbɛ tafele zuo, bazorokɔnzannu mi nwunvɔ wo lɛ a fele wo lɛ we gi léé: Ko bwenu, dé é sɔ ka lɛ léé, ka we pla munu lɛ, ’ka fe ma.

¹⁶ Pɔl nwa yé é bɛ nwa yé é léma: Izraɛl munu, ’kaa lé ka kanaan Kazambale lee, ’ka tɔné dɔ.

¹⁷ ’Kaa Izraɛl munu ’ko, kaalé Bale kaa tranu si a va ézé nya. Bléyian va lé wo ke é nyanale Éjipiti tɛrɛ la, Bale wo bɛn kɛlɛ blɛn yé é wo fwi ’bɛna é bɛ plɛplɛ nya.

¹⁸ É wo pa bwi la, ’bɛ bɔ lɛɛ yɔ fié sɔnɔ.

¹⁹ É bɛn sɔrafié gyɛ Kanaan tɛrɛ la; ’bɛ zuo yé é ’bɛnu lé tɛrɛ nɔ wo lɛ wozé nya.

²⁰ É sia ’bɛ ma, ’bɛ bɔ lɛɛ wuru fié yɔ fié wɔlɛ vu sɔnɔ. ’Bɛ zuo é weblemunu nɔ wo lɛ, fɔɔ yé é bɔ balelayezan Samuɛl zé bléyi ma.

²¹ Yé wo ’wo nwiinzan ma laa. Yé Kazambale Kis be Saul nɔ wo lɛ lɛɛ yɔ fié wuo. É a Bɛnjamɛn bɛn gimi do nya.

²² ’Bɛ zuo, é ’bɛ si ana, yé é David dɔ wo nwiinzan blɛn nya, yé é ’bɛlé we fe ’ko zo léé: Mi lé an gi bli ke a gi, maa ye, Izai be David lé. É dan anlé blibɔmawe faa kɛlɛle lɛ sɔɔ lɛ.

²³ David kulu gi lé Kazambale misiéwegizan do bɔra Izraɛl munu lɛ, blivolɛdére lé é a fe wo lɛ, a yɛrama. Yee lé ke Jézu nya.

²⁴ ’Bɛ dale ’lɛ Jan we fe Izraɛl munu faa lɛ léé, ’wo bli nɔla yé ’wo wo batizéwo a tɔmase nya.

²⁵ Dé Jan lé tɛrɛla lɛsɔɔle bɔ é pu, é léé, é dɔ ka gi léé, ’yee a mian nya, ’yee ’ka ’bɛzan nya lo. Naa, ka ye, mi lé é dan ’é zuo, a yara ’ka ’é yara lé ’é ’bɛzan lé sawala bale fuo lo.

²⁶ An bwenu, ka lé ka ke Abraam kululazannu nya, ka lé ka kanaan Kazambale léé, wo misiéwegidére ’ko pa kaanu ɛ lɛ zia.

²⁷ Naa, Jérusalɛm munu valé wo nwiinmunu wo ’ka Jézu dɔɔ lɛ lo. Balelayemunu dére lé, wa ta fé flinyi faa nya, wo ’ka ’bɛ gi ’ma lɛ lo yé wo yee sɛbɛgiwe lɛ sɔɔ we dɔle Jézu nwiin nya.

²⁸ Wo ’ka we do kpen ye lɛ a ma a gyɛwe nya lo, naa, wa fe Pilat lɛ léé, ’é a gyɛ duowo.

²⁹ A ma we faa lé wa gyɛ sɛbɛ gi, wa kɛlɛle lɛ sɔɔ aan wo, wa si yiliblan ta yé wa pa gɔlɛkoro gi.

³⁰ Naa, Kazambale a nwa gamunu va.

³¹ Munu lé yee valé ’bɛnu si Galilé tɛrɛ la yé wo go Jérusalɛm ’bɛnu nya, ébo nagɔɔn ’bɛnu ɛ lɛ yi kiɛre wuo, yé ’bɛnu ɛ kɛlɛ alé wenayemunu nya munu va.

³² Ko da wenéné ’ko fe lɛ ka lɛ; yee lé ke léé, blivolɛdére lé Kazambale a fe kaa tranu lɛ,

³³ Kazambale a lɛ sɔɔ, kaa lé kaa ke wolé nénu nya, kaa lɛ, Jézu nwale gamunu va nya, we lé ke é gyɛle Lɛrɛvɔ sɛbɛ a kuru fiézan gi, a yɛrama; wo léé: Bii ɛ ke an be nya. Maa i yaa kyɔ.

³⁴ É a nwa gamunu va, léé, té é kɛlɛ fɛ vɔnle nya lo, yee lé é a fe dére ’ko nya léé: Zin drɔɔ bozennu lé, Maa wo ma blivolɛdére fe David lɛ, Maa dan wo kɛlɛ lɛ ka lɛ.

³⁵ Bɛwemalé, é lé é ziin fɛ bɛna léé: I ’ka dan a nyi si lɛ léé, ilé Mi Sauun é vɔn lo.

³⁶ Naa, dé é a David zé nya, é Kazambale bɔ ’bɛlé blibɔmawe kɛlɛle nya élé tɛrɛla gi, yé é ga yé é go é tranu va yé é vɔn.

³⁷ Naa, mi lé Kazambale a nwa gamunu va, ’bɛzan ’ka vɔn lɛ lo.

³⁸ Ko bwenu, ’ka we ’ko ’ma ma. Mi ’ko lé we ma lé wo mi ma we vole lé we fe ka lɛ.

³⁹ We faa lé Moizi lé bélidɔwe ’ka bɔa wo sile lɛ mi nwiin lo, yee mi ’ko lé é ke Jézu nya, dé miomian bli vo a lɛ, ’bɛzan zé é dan si lɛ é nwiin yee Jézu lé we ma.

⁴⁰ Bɛwemalé ’ka yuɛ pa kabo va, we lé wa gyɛ balelayemunu lé sɛbɛ gi, dé é da bɔ ka ma; wo léé:

⁴¹ ’Kaa serelebofɛmazannu, ’ka nagini Yé ka gi ’é vuru ma, yé ka ta ’é saan munu lee ma; Naa, an dan nyanama do pa lɛ kazé bléyi va; Nyanama lé, dé wa zuo fe ka lɛ, ka ’ka dan pa lɛ a ta lo, yee lé.

⁴² Wa bɔrana aan wo, munu lé wo lɛ léé: Dé flinyi bɛ bɔ, ’ka yee we duo fe ko lɛ.

⁴³ Munu lé wo zén ékeva, wo bɔra aan wo, Juifinu kiɛre koo, munu lé wo ke Juifinu lé bazorona, wo koo, wo go Pɔl valé Banabas zuo yé ’bɛnu we fe wo lɛ yé ’bɛnu we pla wo lɛ léé, ’wo kun Kazambale lé zin ’ko ma plɛplɛ.

⁴⁴ Yee flinyi bɛ bɔ aan wo, é vo sɛ yé flamunu faa ’é zén ékeva Kazambale dére ’male we gi.

⁴⁵ Juifinu mi gu ye aan wo, wo maawo Pɔlnu va yé wo we lɛrɛlɛrɛnu fe Pɔl ma yé wa dére nɔla, yé wa sɔnɔ.

⁴⁶ Pɔl valé Banabas we fe wo lɛ bli ta plɛplɛ nya yé wo léma: É a lé wo Kazambale lé we fe ka lɛ é vinin. Naa, sin, ka sɔn vɔ a ma yé kabo lé we ka gyɛ léé, a yara ’ka léé, ka wɔra vole é yuɛma lé a glɛ ’ka lo, a gi lo. Amalé ko dan go lɛ bɛn bɛnu va.

⁴⁷ Mizambale ko béli dɔ yee ɛ zo; é léé: Maa i dɔ bɛnnu lé kyɛsan nya, Maa i dɔ léé, ’i misiéwegidére fe fɔɔ tɛrɛ glɛ sina.

⁴⁸ Bɛn bɛnu we ’ko ’ma aan wo, wo gi nana. Wo Mizan dére zin tɔ bɔ. Munu faa lé Bale a fe é kyɛn léé, wo dan vo lɛ é yuɛma lɛɛfaama a glɛ ’ka lo, wo bli vo we ’konu lɛ.

⁴⁹ Mizan dére nwɛɛn ana tɛrɛ faa la.

⁵⁰ Naa, yarakinilomu lé wo ke Juifinu lé bazorona koo, fla mi blɛnnu koo, Juifinu wo bli nwa yé wo wo nyunu léé, ’wo nyané pa Pɔl valé Banabas ta. Yé wo wo bin wolé tɛrɛ la.

⁵¹ Pɔl valé Banabas ’wo gane ma vungoi puo wo ma yé wo go Ikonium.

⁵² Naa, Léli Sauun Jézu zuomunu kun, ’té wo gi éé nanaan saawo.