Kelewenu 12 - Kazambale lé Sebe Sauunu 1979

Wo Jak gyɛ yé wo Piɛri vɔ bokɔn gi

¹ ’Bɛ bléyi nya minwiinzan Érɔd kun nyané pale ma léglizi gi mi kenu ta,

² yé é Jan bwe Jak gyɛ gwɔun nya.

³ É a ye léé, ’bɛ sɔ Juifinu lɛ, amalé é Piɛri kun é ziin, buru lé lévɛn ’ka a va lo, ’bɛ yinu ta.

⁴ É a kun faa yé é a vɔ bokɔn gi; é a bɛ pa sunyanu palu ziɛn lé wo ke mi vu ta suiɛdo, wo lee, ’té é a a gi léé, é dan Taboyi fwila lɛ Piɛri nya munu lɛ.

⁵ Sunyanu vo ’wo yuɛ pana Piɛri ta bokɔn gi yé léglizigimunu ’ka daan lɛ a ma bazorole ma Kazambale lɛ lo.

Piɛri si bokɔn gi

⁶ Yi lé Érɔd é dan alé we kɛlɛ lɛ, ’bɛ tasi nya é béli, Piɛri a yi gyɛna sunya fié méléna, ’té gɔgɔbale fié a é vɔle a ma, ’té kɔn tabin sunyanu a é dɔle bokɔn ’léé, yuɛ pana bokɔn ta.

⁷ Tɔɔn Mizambale lé lanje do da yé san bi bwati gi. Lanje Piɛri vuo é bɛ diale nya a sɛe gi yé é léé: ’I nwa é nya do. Gɔgɔbalenu si Piɛri bɛ ma yé wo dia.

⁸ Yé lanje lé Piɛri lɛ léé: ’Ilé kyɛsidi dɔ yé ’ilé sawala wo, yé ’bɛ a kɛlɛ a zo. Lanje lé é ziin a lɛ léé: ’Ilé sɔ zén i ta yé ’i da an zuo.

⁹ Piɛri bɔra yé é go a zuo. Piɛri ’ka a gi dɔɔa léé, we lé lanje ke a kɛlɛna é a webozen nya lo. É dɔ a gi léé, nyɛfla we lé.

¹⁰ Wo gié aan wo bokɔn tabinzan vininzan koo, a fiézan koo, wo ta, yé wo bɔ foliɛwɔlɛ duoli lé dé mi bɔ a ma ’té é bɔ fla, a ma, yé ’bɛ é lɛ so wo ’lɛ é boan. Wo bɔra yé wo go fla worona zi do ta. Tɔɔn, yé lanje si Piɛri va.

¹¹ Piɛri bɔn gi kini aan wo yé é léma: Maa a ye sin léé, Mizambale élé lanje pa zia webozen nya yé é an si Érɔd lee, yé we faa lé Juifinu ke a lɛbɛnna, é an si ’bɛ faa lee.

¹² É ’wuo gi bɔrɔ aan wo yé é go Jan Maak bu Mari lé kɔn ’léé, ana lé mi kiɛre ke ékeva bazorona.

¹³ É duoli gyɛ yé nyanamapa le do lé wa laama Rode, é da yé é tɔné dɔ.

¹⁴ É Piɛri dére dɔɔ, yé a gi nanale zi é ’ka kɔn lɛ so lɛ lo; é go vlan nya é zuo zia yé é léé: Piɛri a kɔn ’léé.

¹⁵ Wo lé a lɛ léé: Gwe a i ’wuo gii? Naa, é léé: Wezen lé, Piɛri lé.

¹⁶ Yé wo léé: Alé lanje lé. ’Té Piɛri a duoli gyɛle ma duowo. Wo kɔn lɛ so, wa ye aan wo, wo gi vuru.

¹⁷ Piɛri é bɛ vɔ wo lɛ léé, ’wo tadɔ, yé fɛan zo lé Mizambale a bɔra bokɔn gi, é a zuo fe wo lɛ yé é léé: ’Ka a fe Jak valé bwenu lɛ. A zuo é bɔra yé é go fɛbɛna.

¹⁸ Dé tu kini sunyanu vo é dɔle wo gane la, ’té wa fé léé, dé Piɛri go kyɛɛn?

¹⁹ Érɔd léé, ’wa gini, yé wo ’ka a ye lɛ lo. Érɔd we laa kɔn tabin sunyanu lee, yé é munu béli dɔ léé, ’wo wo gyɛ. ’Bɛ zuo é si Judé tɛrɛ la yé é go nyana lɛ Sézaré.

Érɔd gale

²⁰ Tii munu koo, Sidɔn munu koo, we a wo valé Érɔdnu méléna. Naa, wo ’wolé tɛrɛ la fɛblelenu yé yee Érɔd lé tɛrɛ la, amalé wo gi pa do yé wo go Érɔd wuozan Blasitus va. Wo Érɔd muun pa Blasitus ta, yé Blasitus a nyi si, yé ’bɛ go zanté vɔ lɛ Érɔd lɛ léé, wo léé, ilé zanté, ka valé ’wonu ’é vo ékeva drɔɔ.

²¹ Érɔd yi do dɔ, yé ’bɛ yi nya é élé fuasɔnu zén ’é ta yé é nyana élé webleblin ta yé é we pla wo lɛ é yuɛ tanale nya.

²² Munu siaa léé: Bale dére bɛ, mi dére ’ka ’bɛ nya lo.

²³ É ’ka Kazambale tɔ bɔ lɛ we ’ko gi lo, amalé a bléyi duo nya Mizambale lé lanje do a gyɛ. Yé klé a ble yé é ga.

Banabas valé Sɔl

²⁴ Naa, munu vo Kazambale dére nwɛɛnna, yé a lɛ vo sina duowo.

²⁵ Banabas valé Sɔl da wean ma Jérusalɛm, dé a kɛlɛle lɛ sɔɔ, wo si Jérusalɛm yé wo go Jan Maak nya wo va.