Kelewenu 11 - Kazambale lé Sebe Sauunu 1979

Piɛri we zuo fe Krétiɛnnu lɛ Jérusalɛm

¹ Nwunvɔmunu valé bwenu lé wo ke Judé tɛrɛ la, wa ’ma léé, bɛn bɛnu pa Kazambale dére ta.

² Yé dé Piɛri go Jérusalɛm, Krétiɛnnu lé wo gane ke é dɔle, wo ’wo ’namawe fe a lɛ léé:

³ Mɛmalé i go munu lé wo gane ’ka é dɔle lo, wo va, yé i fɛ ble wo vaa?

⁴ Yé bɛan zo lé we ’konu bɔ, Piɛri kun a gi fele ma wo lɛ.

⁵ É léma: Maa a turu Jopé; bléyian va lé maa a bazorona an si an pɔlɛ gi yé maa fɛ ye yuɛzi gi. Fɛ do lé é ke bélé sɔ blɛn zo, ’té é ke é yerele é sun ziɛn ma, é si la gi yé é zun yé é tua an vazia.

⁶ An yuɛ a sɔ ’ko va flee ’té maa a naginina, yé tɛrɛlawinu koo, bwigiwinu koo, tawoplɛlawinu koo, lagi mianénu koo, an wo ye.

⁷ Yé maa dére do ’ma, yé é lé an lɛ léé: Piɛri, ’i nwa, ’i wi gyɛ, ’bé ble.

⁸ Naa, maa léé: Gba, Mizambale, fɛ tiridɔle valé fɛ lɛrɛlɛrɛ ’ka tan wɔra lɛ an ’léé do lo.

⁹ A gɔnɔ fiézan nya, maa dére ’ko ’ma é ziin la gi, yé é léé: Fɛ lé Kazambale a fe léé, a gi a é bɔle, té bé ye fɛ tiridɔle nya lo.

¹⁰ ’Bɛ kɛlɛ fɔɔ gɔnɔ yaa, a zuo wo go wo nya la gi é ziin.

¹¹ Yé ’bɛna tɔɔn, munu yaa lé wo si Sézaré, ’té wo wo nwunvɔ an lɛ, wo bɔ kɔn lé, maa ke a gi, a ’léé.

¹² Kazambale Léli lé an lɛ léé, ’ko go wo nya tegele. Ko bwenu suiɛdo ’ko, wo go an pa lɛ, yé ko wɔra Kɔɔnéi lé kɔn gi.

¹³ Yé we lé é bɔ Kɔɔnéi ma kɔɔn, é a zuo fe ko lɛ. Fɛan zo lé é lanje ye élé kɔn gi, yé ’bɛ da a va, yé ’bɛ we fe a lɛ léé: ’I mi pa zia Jopé, yé ’wo da Simɔn Piɛri nya,

¹⁴ yé we lé bé kɛla yé bii valé ilé kɔngimunu faa é si we gi, é dan a fe lɛ i lɛ, Kɔɔnéi a zuo faa fe ko lɛ.

¹⁵ Dé maa kun wefele ma, Léli Sauun vɔ wo ta, bélé é vɔ ko ta é vinin fɛan zo a zo.

¹⁶ Yé Mizan dére sele dɔ an gi; é a fe léé: Jan mi batizéwo ’yi nya, naa, wo dan ka batizéwo lɛ Léli Sauun nya.

¹⁷ Ko lé, ko bli vo Mizan Jézu Krist lɛ, blɛ lé Kazambale a kɛlɛ ko lɛ, dé é yee blɛ duo kɛlɛ wo lɛ, de lé ke maa nya yé an dɔa Kazambale ma plɛplɛɛ?

¹⁸ Bale lé munu we ’ko ’ma aan wo, wo bli vo drɔɔ, yé wo Kazambale tɔ zin bɔ a fele nya léé: Kazambale bli nɔlale nɔ é ziin bɛn bɛnu lɛ, wo vole é yuɛma we gi.

Léglizi lé ke Antiɔs

¹⁹ Kleblele lé é bɔ munu ma Étiɛne lé we zuo, é wo sɔɔla fɛfaana yé wo go fɔɔ Fénisi tɛrɛ koo, Sipri tɛrɛ koo, Antiɔs koo, wona, yé wo dére fe Juifinu saa ɛ lɛ.

²⁰ Naa, wo va mi kenu lé wo ke Sipri tɛrɛ la munu valé Sirɛne munu nya, wo da Antiɔs, yé wo we fe Grɛkinu lɛ é ziin, yé wo Mizan Jézu lé wenéné fe ’bɛnu lɛ.

²¹ Mizambale bɛ zin a wo ta yé munu kiɛre dɔ wo dére ta, yé ’bɛnu nɔla Mizan va.

²² Jérusalɛm léglizigimunu we ’ko ’ma yé wo Banabas nwunvɔ Antiɔs.

²³ É bɔ aan wo yé é Kazambale lé zin ye wo ta, a gi nana yé é we pla wo lɛ léé: ’Ka vo é yerele Mizan ma bli do nya.

²⁴ Naa, Banabas a mi zin nya, Léli Sauun vɔlazan nya, blipazan tegele nya, yé fɛkona mi gu blɛn zén Mizan va.

²⁵ A zuo Banabas go Taase Sɔl gini lɛ.

²⁶ É a ye aan wo é goan Antiɔs. Wo vo ’bɛna lɛɛ do; dé léglizigimunu zén ékeva ’té wa ’bɛnu va yé wo vo we paana mi kiɛre gi. Antiɔs lé wo zuomunu tɔ pa Krétiɛn é vinin.

²⁷ ’Bɛ bléyi va, balelayemunu si Jérusalɛm yé wo da Antiɔs.

²⁸ Wo va mi do lé wa laama Agabu, é nwa, yé é we fe Kazambale Léli nya léé, lɔrɔ blɛn é dan dɔ lɛ tɛrɛ faa la. Yé wezen lé, é bɔ minwiinzan Klode bléyi va.

²⁹ Zuomunu ’wo dére pa do léé, fɛ lé mi do éé bɔa a yele lɛ, ’wa pa bwenu lé wo ke Judé tɛrɛ la, wo lɛ zia, bɔ wo va fɛnu nya.

³⁰ Yé wa kɛlɛ a zo, yé wa pa Banabas valé Sɔl lee yé ’bɛnu go a nya yé wa nɔ léglizi gi mi segelenu lɛ.