Kelewenu 10 - Kazambale lé Sebe Sauunu 1979

Piɛri valé Kɔɔnéi

¹ Gɔné do a Sézaré wa laama Kɔɔnéi. É a sunyayɔsoru ’lɛzan nya Itali munu palu gi.

² Mi ’ko a Bale lé zisɔlɛzan nya, yé yee valé élé kɔngimunu faa éé kanaan Bale lee. Éé blɛ kiɛre kɛla nyanégyɛmunu lɛ, ’té éé bazoroan Bale lɛ yifaama.

³ Yiri tɛnlale nya é Kazambale lé lanje do ye wéiin yuɛzi gi, yé ’bɛ wɔra a va, yé ’bɛ lé a lɛ léé: Kɔɔnéi.

⁴ É ’bɛ nagini téiin kana nya é gi yé é léé: Anzan, mɛ léé? Yé lanje lé a lɛ léé: Kazambale ilé blɛ kɛlɛle ye yé é ilé bazorole ’ma, yé wo i sele dɔ a gi.

⁵ Sin, ’i munu nwunvɔ Jopé yé ’wo da Simɔn lé wa laama Piɛri, a nya.

⁶ É a é nyanale Simɔn do lé é ke zérigyɛzan nya, a va. Alé kɔn a wɛyi sɔnɔ.

⁷ Lanje lé é we fe a lɛ bɛ, a gole tɔɔn, Kɔɔnéi é wuomunu fié laa yé a lee sunya do lé é ke Bale lé zisɔlɛzan nya, é ’bɛ pa wo va

⁸ yé dé é we ’ko faa zuo fe wo lɛ faa, é wo nwunvɔ Jopé.

⁹ ’Bɛ é tu kini dé munu ’ko a zia yé wo bɔ aan wo Jopé sɔnɔ, ’té Piɛri go kɔn nwiin é yiéyi bazorole we ma.

¹⁰ Lɔrɔ a a gyɛna, yé é sɔ a lɛ léé, é fɛ ble. Bléyian va lé wa alé fɛblele kɛlɛna é si é pɔlɛ gi.

¹¹ É la lɛ ye é sole yé fɛ do lé é ke bélé sɔ blɛn zo é yerele é sun ziɛn ma, é zun yé é tua tɛrɛ vazia.

¹² Tɛrɛlawinu faa koo, tawoplɛlawinu koo, lagi mianénu koo, wa yee fɛ ’ko gi.

¹³ Dére do lé a lɛ léé: Piɛri, ’i nwa, ’i wi gyɛ, ’bé ble.

¹⁴ Naa, Piɛri léé: Gba, Mizambale, maa ’ka tan fɛ lɛrɛlɛrɛ valé fɛ tiridɔle vinin ble lɛ do lo.

¹⁵ A gɔnɔ fiézan nya é dére ’ko ’ma é ziin: Fɛ lé Kazambale a fe léé, a gi a é bɔle, té bé ye fɛ tiridɔle nya lo.

¹⁶ ’Bɛ kɛlɛ fɔɔ gɔnɔ yaa, ’bɛ zuo tɔɔn, fɛ ’ko go la gi é ziin.

¹⁷ Fɛ lé Piɛri a ye yuɛzi gi, bléyian va lé é a é gi bɔrɔna a ma léé, dé a gi lé nɔɔ? ’té munu lé Kɔɔnéi wo nwunvɔ, ’té wo Simɔn lé kɔn ma laa kɔɔn, ’té wo bɔ kɔn ’léé.

¹⁸ Yé wa ta laa dére biéle nya léé, dé fɛkona lé Simɔn Piɛri ke é nyanalee?

¹⁹ Piɛri a é gi bɔrɔna aan wo yuɛzi ’ko ma, Kazambale Léli lé a lɛ léé: Bé ye, mi yaa a i ta laana.

²⁰ ’I nwa, ’i zun, yé ’i go wo va tegele. Maabozen ɛ wo nwunvɔ i lɛ.

²¹ Amalé Piɛri zun, yé é lé munu ’konu lɛ léé: Mi lé ka ke a ta laana, maa lé. Dé ka bɔ wee?

²² Wo lé a lɛ léé: Kɔɔnéi lé ke sunyayɔsoru ’lɛzan nya, mi tegele lé éé kanaan Bale lee, a nya, ’té Juifinu faa ke a ma we zin fena bɛ, Bale we fe a lɛ lanje sauun do lɔlu nya léé, ’é mi nwunvɔ i laana léé, ’i go alé kɔn ’léé, yé ’é i dérenu ’ma. Amalé ko da.

²³ Piɛri wo bɛn si yé wo yii a va. ’Bɛ é tu kini é nwa yé yee valé ’bɛnu go. Bwenu lé wo ke Jopé, wo va mi kenu go a pa lɛ.

²⁴ A yi fiézan nya wo bɔ Sézaré. Kɔɔnéi é lelenu valé é béé bozennu laa é kyɛn yé wo vo Piɛri lɛbɛnna.

²⁵ Piɛri da aan wo, Kɔɔnéi go a si lɛ zia yé é dia ’é bli la a wuo.

²⁶ Naa, Piɛri a nwa yé é léé: ’I nwa; maa é ziin, maa a mi nya.

²⁷ Wo we fe aan wo ’wo ke lɛ, yé wo wɔra, yé Piɛri mi kiɛre ye é zénle ékeva.

²⁸ Piɛri lé wo lɛ léé: Ka a gi dɔɔ léé, a yi a é gale ko Juifinu lee léé, té ko nana ’bɛn bɛnu va lo. Yé té ko wɔra wolé kɔn gi lo. Naa, Kazambale a gɔɔn an lɛ léé, té maa mi do kpen ye é tiridɔle valé é lɛrɛlɛrɛ lo.

²⁹ Bɛwemalé, dé ka an laa maa ’ka an dale za vɔ lɛ lo. Sin, maa laa ka lee léé, mɛmalé ka munu nwunvɔ an laanaa?

³⁰ Kɔɔnéi léma: A yi ziɛn lo, dé maa a bazorona yiri tɛnlale plɛplɛ nya tɔɔn, mi do lé sɔ nyananyana ke a ta, é bɔra an va, yé é léé:

³¹ Kɔɔnéi, Bale ilé bazorole ’ma yé ilé blɛ kɛlɛle sele dɔ Kazambale gi.

³² Amalé ’i mi pa zia Jopé, yé ’é go Simɔn Piɛri laa. É a é nyanale zérigyɛzan Simɔn lé kɔn ’léé, wɛyi sɔnɔ.

³³ Tɔɔn, yé maa munu nwunvɔ i lɛ yé i da; ’bɛ a é zima. Sin, ko faa a Bale ’lɛ; we faa lé Kazambale a fe i lɛ, ’bé fe ko lɛ, ko ’ma.

Piɛri we fe Kɔɔnéi lé kɔn gi

³⁴ Yé Piɛri kun wefele ma yé é léé: Wezen lé, maa a ye léé, Kazambale ’ka mi naginian é kɔlɛ ma lo.

³⁵ Naa, bɛn faa gi, mi lé éé kanaan Bale lee, ’té ’bɛzan éé we tegele kɛla, yee ɛ sɔ a lɛ.

³⁶ É dére pa Izraɛl munu lɛ zia yé é wenéné ’ko fe wo lɛ léé, mi é vo drɔɔ Jézu Krist lé we ma. Yee ɛ ke mi faa zan nya.

³⁷ Batizé lé Jan alé we fe, we lé a péli sia ’bɛ é zuo Galilé tɛrɛ la, yé é bɔ fɛfaana Judé tɛrɛ la, ka ’bɛ gi dɔɔ.

³⁸ Kazambale Léli Sauun valé plɛplɛ zén Nazarɛtzan Jézu ta fɛan zo, ka ’bɛ gi dɔɔ. Kazambale a Jézu va, amalé é gié flanu ta wezin kɛlɛle valé munu lé wo ke é plale yonufaatagɔné wuo, wo faa bélile nya.

³⁹ We faa lé é a kɛlɛ Juifinu lé tɛrɛ la valé Jérusalɛm, ko a anayemunu nya. Wa gyɛ é dunle nya yili la.

⁴⁰ Kazambale a nwa a yi yaazan nya yé é a bɔra a gi yé munu a ye,

⁴¹ naa, mi faa kaan lo; wenayezannu lé Kazambale wo si a va é kyɛn, wo ɛ ye, ’bɛ gi léé, ko lé, ko fɛ ble yé ko ’yi mini a va a nwale gale va zuo, ko lé.

⁴² Yé Jézu a pa ko ’léé léé, ko we fe munu lɛ yé ko fe léé, ’yee lé Kazambale ’é kɛlɛ mi yuɛmalenu valé migalenu lé weblezan nya.

⁴³ Balelayezannu faa a ma we fe léé, dé miomian bli vo a lɛ, Bale é dan wo ma we vo lɛ wolé wenyané ma a tɔ lé we ma.

Bɛn bɛnu Léli Sauun ye

⁴⁴ Piɛri a dére ’konu fena bléyian va, Léli Sauun vɔ munu faa lé wo ke ’wo tɔné dɔna a dére lɛ, wo ta.

⁴⁵ Blipamunu faa lé wo gane ke é dɔle, ’té wo da Piɛri va bɛ, wo gi vuru léé, Kazambale blɛ kɛlɛ Léli Sauun nya bɛn bɛnu lɛ.

⁴⁶ Naa, wo dére bɛnu valé Kazambale tɔ zin fele ’ma wo ta.

⁴⁷ Yé Piɛri léé: Munu lé wo Léli Sauun ye bélé kozé zo ’naan, wo ’ka wo batizéwo loo?

⁴⁸ Yé é léé: ’Ka wo batizé wo Jézu Krist tɔ gi. Yé wo zanté vɔ Piɛri ma léé, ’é yi kenu kɛlɛ ’wo va.