SEBE LÉ JUD A GYE (Épitre de Jude) 1 - Kazambale lé Sebe Sauunu 1979

Weale lé

¹ ’Kaanu lé Tibale ka laa, ’té ka sɔ a lɛ yé é ka tadɔ Jézu Krist zé nya bɛ, maa we ka va. Maa Jud lé an ke Jézu Krist lé luugɔnéné nya, Jak bwe nya, maa ɛ ke sɛbɛ ’ko pana ka lɛ zia.

² Nyanai zénle koo, vole drɔɔ koo, sɔlɛle koo, wo gi ’é gyɛ ka méléna ma.

Weblele valé viéwe paamigizannu

³ An béé zinnu, é sɔ an lɛ turu léé, maa sɛbɛ gyɛ ka lɛ, sile we gi lé ke kaa faa zé nya, alé we ma. Yé sin an bli a an nyununa léé, ’maa kɛlɛ, we plale ka lɛ we ma, léé, Kazambale lé we lé wa nɔ Kazambale lé munu lɛ gɔnɔ do lɛɛ faa zé nya, ’ka a ta guli dan.

⁴ Naa, mi kenu wɔra ka méléna ka ma blaané pale nya; Bale lé zi ma wenyané fezannu lé wo nya; woo kolé Bale lé zin nɔlaan we vɔnle nya, ’té woo sɔn vɔa Kaazan do kpen lé é ke Mizan Jézu Krist nya, a ma. Ga lé sɛbɛ a fe é kyɛn, é a é dɔle wo nwiin.

⁵ We lé é kɛlɛ Izraɛl munu lɛ, ka a gi dɔɔ é zima, naa, duowo, maa a a sele dɔna ka gi. Mizambale Izraɛl munu si Éjipiti tɛrɛ la, yé ’bɛ zuo wo vamunu lé wo bli ’ka é pale lo, é wo gyɛ. Yee kaan loo?

⁶ Lanjenu lé we sele ’é dɔ ka gi é ziin; wo ’ka dɔ lɛ ’wo dɔna lo, yé wo sɔn vɔ ’wobozen nyanana ma yé Kazambale wo yere gɔgɔbalenu lé wo ’ka kinié monomono lo, wo nya, yé é wo tadɔ gunuti tiritirinu va, alé wolé we blele we gi yi blɛn nya. Yee kaan loo?

⁷ Yé Sɔdɔm koo, Gɔmɔɔ koo, wo sɔnɔ flanu koo, wolé we sele ’é dɔ ka gi é ziin. Wenyané lé lanjenu a kɛlɛ, wo yee wenyané duo kɛlɛ; gɔnénu go gɔnénu va, yé lomu go lomu va, ’té woo pɛnpɛnné gya; sin wo kyɛ a blena, kyɛ lé é ’ka dirian monomono lo, a va; Bale we ’ko kɛlɛ léé, dé munu wo ye, yé wo bɔn‐in ’é kini yé wo ’ka we kɛla bélé wozé zo lo. We ’ko sele ’é vo ka gi ma.

⁸ Naa, duowo, nyɛgyɛmunu lé wo da ka méléna bɛ, wo ’wobo kɔlɛ tiri dɔa, ’té woo minwiinzannu yé wo yuɛ gi boamunu nya, ’té woo laifuanu sɔnɔan.

⁹ Yé lanjenu faa ’lɛzan Misɛl boen ke aan wo za kɛlɛna yonufaatagɔné va Moizi kɔlɛ ta, é ’ka dɔ lɛ a gi léé, é sɔnɔdére fe a ma lo, naa, é we dɔ é wo a nwiin léé: Mizambale ’é ilé we ble ma.

¹⁰ Naa, munu ’ko, wozé a é yɛrama. We lé wo ’ka a gi dɔɔa lo, yee lé woo a ma we fé sɔnɔdére nya, yé we lé wa dɔɔ woboan bélé winu lé wedɔɔle zo, wo ’wobo sɛra a gi.

¹¹ We tɔntɔn ’é bɔ wo ma ma. Wo tawo Kain lé zi ta; wo zén Balaam lé misaanwe zuo tɔnɔ yele we ma yé wo nwa mi ma bélé Koré zo, amalé wo guru zana a gi.

¹² Woo ka sɔle ka ke lɛ na fɛti tiri dɔa. Yara ’ka wo gya ka va fɛblele we ma lo, naa, wo kanle ’té ma lé wo ke. Wa bélé lafunu lé ’yi ’ka wo gi lo, ’té fu éé wo nyunuan bɛ, wo zo. Wa bélé yilinu lé, fɛ bɔra bléyi va, ’té wo poro ’ka lo, ’té wo ke é gale gɔnɔ fié, ’té wo suni ke é soowɔlale bɛ, wo zo.

¹³ Wa bélé wɛyi nwale plɛplɛnu lé, woo ’wo buiɛ tiridɔlenu nwɛɛn‐an, wo zo; wa bélé monéné saanlenu lé, gunutinu ke é tadɔle wozé nya lɛɛfaama, ’té a glɛ ’ka lo bɛ, wo zo.

¹⁴ Wolé we ma lé Énɔk lé é ke Adam kulu sɔrafiézan nya, é balelawe fe léé: Ka yua bɛ, Mizambale da, ’é zuo lé élé munu ’léé kiɛre kiɛre nya,

¹⁵ mi faa lé we blele we ma, yé Bale lé zi ma wenyanénu faa lé Bale lé zi ma wenyané fezannu a kɛlɛ, é valé dére naanénu faa lé wa fe Bale ma, yé é a zuo laa yee Bale lé zi ma wenyané fezannu lee.

¹⁶ Wa gungyɛzannu nya; wa mi tidiannu lé woo tawoo ’wobo lé sɔlɛwe yɛrama, wo nya; dére blɛnblɛnnu a wo ’léé; woo munu ze vɔa gi la, tɔnɔfɛ yele we ma.

We lɛ kinile wo lɛ valé we plale wo lɛ

¹⁷ An béé zinnu, wenu lé Kaazan Jézu Krist lé nwunvɔzannu a fale vɔ ka lɛ é kyɛn, wo sele ’é dɔ ka gi ma.

¹⁸ Wo lé ka lɛ léé, bléyi voéla gi, mi ma we nana munu lé, woo tawoo ’wobo lé sɔlɛwe yɛrama, ’té woo Bale lé zi ma wenyané fé, wo dan kɛlɛ lɛ ana.

¹⁹ Wa tan ’wo dɔbɛ kyɛn gi yé Kazambale Léli kele wo ma, yé woo ɛ munu kinié ékema.

²⁰ An béé zinnu, Kazambale lé we sauun lé ke kazé nya, ’ka kabo dɔ gligli a gi. ’Ka bazoro Léli Sauun bɔle ka va nya.

²¹ ’Ka vo Kazambale lé sɔlɛle gi, yé ’ka Kaazan Jézu Krist lɛbɛn yé vole é yuɛma lé a glɛ ’ka lo, yé ’é a nɔ ka lɛ a nyanai zénle ka ta we ma.

²² Munu lé wo bli ke fié, ’ka nyanai zén wo ta, yé ’ka mi kenu si we gi wo ganale kyɛ va nya,

²³ yé a kenu é ziin, ’ka nyanai zén wo ta kanale nya, fɔɔ, wolé varɔ boen lé wo dɔbɛ kyɛn a tiri dɔ bɛ, yé ka kana ’bɛ lee.

Wo drɔɔ vole

²⁴ Bale lé, éé bɔa ’é yuɛ pale lɛ ka va yé ka ’ka saan monomono lo, ’té éé bɔa ka kɛlɛle lɛ sauun yé é da ka nya élé fua tɔbɔle va, ’té ka gi nanale a blɛɛn,

²⁵ Bale lé é ke Bale do kpen nya, ’té é ke kaa Bélizan nya Kaazan Jézu Krist lé we ma, yee Bale bɛ, tɔbɔle valé fuasan koo, gla valé plɛplɛ koo, wa yee ɛ lee, bléyi faa lé ke é kyɛn koo, lao bléyi koo, bléyi faa lé wo dan da lɛ bɛ, ’bɛ koo, wo gi. Amɛɛn.