Jozué 9 - Kazambale lé Sebe Sauunu 1979

Gabaɔn munu gikiniwe kɛlɛ

^1-2 Minwiinzannu faa lé ke Juudɛn bɛ ’ko la zia, gɔ nwiin koo, gɔ worona koo, wɛyi blɛn gɔ ma faa koo, fɔɔ é bɔ Liban sɔnɔ, Étinu koo, Amorénu koo, Kanaannu koo, Férézinu koo, Éévinu koo, Jébusinu koo, wo we ’konu ’ma aan wo, wo zén ékeva bli do nya gulidanle Izraɛl valé Jozué va we gi.

³ We lé Jozué a kɛlɛ Jériko valé Ai lɛ, dé Gabaɔn munu a ’ma

⁴ wo gi kini do kɛlɛ, yé wo zi sia ’wolé kɔné nya. Wo bɔlɔ kwazannu si yé wa pa ’wolé sokofalenu punu yé wo nwɛ wikɔlɛkuo kwa buruna bééle si,

⁵ yé wo sawala kwa béélenu wo ’wo gane ma yé wo sɔ kwanu zé ’wo ta, yé buru faa lé ke wolé fɛblele nya é a é gale kwakoroo é turu nya é bɔle.

⁶ Wo go Jozué va Gilgal lé sɔkɔn dɔna yé wo lé Jozué valé Izraɛl munu faa lɛ léé: Ko si tɛrɛ baa la, yé sin kaa gi pa do.

⁷ Izraɛl munu a zi pa Éévinu lɛ léé: Un, dé ka nyanaan ko mélénaa? Kaa gi paan do kaa?

⁸ Wo lé Jozué lɛ léé: Ko a i wuozannu nya, yé Jozué lé wo lɛ léé: De lé ke ka nyaa? Yé ka si kyɛɛn?

⁹ Wa zi pa léé: I wuozannu si tɛrɛ baa baa boen ta, Gakelebale izé Bale tɔ kɛlɛle blɛn lé we ma; alé we lé wa fe, ko a ’ma, we faa lé é a kɛlɛ Éjipiti tɛrɛ la

¹⁰ yé we faa lé é a kɛlɛ Amorénu nwiinzan fié lé wo ke Juudɛn yuu zi, Esibɔn nwiinzan Sioni valé Bazan nwiinzan Ɔg lé ke Asétarɔt, wo lɛ, ko a ’ma.

¹¹ Yé kolé mi segelenu valé kolé tɛrɛlamunu faa lé ko lɛ léé: ’Ka tawofɛnu si, ’ka go wo va, yé ka fe wo lɛ léé, ko a ka wuomunu nya, yé sin, kaa gi pa do.

¹² Kolé buru lo. Ka ye, yian nya lé ko si kolé kɔn gi kolé tawofɛnu nya yé ko da ka va, ’té a kyɛ a, yé sin é ga kwakoroo yé a turu bɔ.

¹³ Nwɛ wikɔlɛkuonu ’ko, ko fan a nya é dɛrɛ boenwo, ka ye, wo fia; yé kolé tawole baa zi kolé sɔnu valé kolé sawalanu kɛlɛ é kwa.

¹⁴ Izraɛl munu wolé tawofɛnu si yé wo ’ka a gi laa lɛ Gakelebale lee lo.

¹⁵ Jozué yee valé wonu vo drɔɔ yé wo gi pa do yé é wo vo é yuɛma. Izraɛlnu nwiinmunu bale ’nyɔɔn wo lɛ.

¹⁶ Wo gi pale do zuo yi yaazan nya Izraɛl lé nénu a ’ma léé, wa wo punma é pu, ’té wa é nyanale wo sɔnɔ.

¹⁷ Naa, Izraɛl lé nénu go yé wo bɔ wolé flanu la yi yaazan nya. Wolé flanu lé ke Gabaɔn koo, Kéfira koo, Béérɔt koo, Kiijat‐Jéarim koo, wo nya.

¹⁸ Wo ’ka wo gyɛ lɛ lo; wo nwiinmunu Gakelebale Izraɛl lé Bale ’nyɔɔn wo lɛ, amalé wo wo vo é yuɛma. Naa, munu faa gun gyɛ ’wo nwiinmunu ma.

¹⁹ Minwiinmunu munu faa laa yé wo lé wo lɛ léé: Ko Gakelebale Izraɛl lé Bale ’nyɔɔn wo lɛ, yé sin ko ’ka bɔaléé, ko bɛ mane wo ma lo.

²⁰ Ka ye, we lé ko dan kɛlɛ lɛ wo lɛ, ko dan wo vo lɛ é yuɛma, té Gakelebale lé bliflile é dia ko ta lo we gi, we lé ko fe bale ’nyɔɔnle nya, a we ma.

²¹ Nwiinmunu lé wo lɛ léé: Wo dan vo lɛ é yuɛma; naa, ’wo kaalé kyɛ fén gyɛ ma, yé ’wo ’yi tɔ munu faa zé nya ma, fɛan zo lé wo nwiinmunu a fe, a zo.

²² Jozué wo laa yé é lé wo lɛ léma: Mɛmalé ka dabli kɛlɛ ko lɛ a fele nya léé, ’wo nyanana a baa boenwo ka ma, dɔlé ’té ka a é nyanale ’koo?

²³ Sin, bale a é pale ka ma yé ka dan kɛlɛ lɛ ko wuozannu nya, yé ka dan kyɛ fén gyɛ lɛ yé ka dan ’yi tɔ lɛ anzé Bale lé kɔn zé nya, yé é ’ka dan nyaa lɛ monomono lo.

²⁴ Wa zi pa Jozué lɛ yé wo léma: Fɛan zo lé Gakelebale izé Bale a fe é wuozan Moizi lɛ léé, ’é tɛrɛ ’ko faa nɔ ka lɛ yé ’é ana tɛrɛlamunu faa gya ka ’lɛ, wa fe ko lɛ, bɛwemalé ka dale ’ko é kana blɛn zén ko gi; ko vole é yuɛma lé we ma lé ko kɛlɛ a zo.

²⁵ Yé sin, ka ye, ko a ka lee; fɛan zo lé é dɔ ka gi léé, é a tegele é zima, ’ka kɛlɛ ko lɛ.

²⁶ Jozué a kɛlɛ wo lɛ fɛan zo lé é dɔ a gi, a zo; é wo si Izraɛl lé nénu lee yé wo ’ka wo gyɛ lɛ lo;

²⁷ naa, a péli sia yi ’ko la, woo kyɛ fén gya, ’té woo ’yi tɔa munu valé Gakelebale banna zé nya, fɛ lé Gakelebale ana si a va ézé nya, ’bɛna; wo vo a kɛlɛna fɔɔ kyɔ.