Jozué 7 - Kazambale lé Sebe Sauunu 1979

Akan lé we ple

¹ Fɛnu lé wa nɔ Bale lɛ bale pale a ma nya Izraɛl lé nénu saan a vazia. Juda bɛngizan Zérak be Zabidi, Zabidi be Kaami, Kaami be Akan, fɛnu lé wa nɔ bale pale wo ma nya, é wo si. Yé Gakelebale lé bliflile nwa Izraɛlnu ma.

² Jozué munu nwunvɔ, ’wo si Jériko yé ’wo go Ai vazia, ’té é ke Bɛt‐Avan sɔnɔ, Bétɛl yirinwanazia. É lé wo lɛ léé: ’Ka go, ’ka tɛrɛ nagini. Yé munu ’konu go yé wo Ai nagini.

³ Wo da é ziin Jozué va, yé wo lé a lɛ léé: Té mi faa é go lo, naa, dé é a mi baa do nyaoo, dé é a mi baa do wuru soru nyaoo, ’wo go yé ’wo guli dan Ai va. Wo ’ka kiɛre lo, amalé té i munu faa wɔlɛgi nyaa ’wo ma lo.

⁴ Munu zén, wo mi baa do wuru soru bɔa, naa, wo kini ékema Ai munu ’lɛ.

⁵ Ai munu wo gyɛ, dé mi yɔ do wɔlɛ vu ta suiɛdo léé? Wo wo bin, é sia flagɔrɔ ’léé fɔɔ yé wo bɔ Sébarim, yé wa zunna gɔ gi tɛrɛ aan wo, wo wo bla. Munu zuru va nyɛ kini yé fuu faa si wo ta.

⁶ Jozué élé sɔ fia, yé é dia é bli la Gakelebale lé gipakɛsu ’lɛ, yé é yiri vɔ ana, yee valé Izraɛl mi segelenu nya, yé wo vun zén ’wo nwiin.

⁷ Jozué léé: Aa, Mizan Gakelebale, mɛmalé i Juudɛn kini munu ’ko nya ko nɔle Amorénu lɛ we ma yé ko zamaga woo? Oo! a fila vɔ léé, ko vo Juudɛn zi zia.

⁸ Oo Mizan, dé Izraɛl nɔla ’wo zuo zia ’wo nyanézannu lee, maa dan a fe lɛ nɔɔ?

⁹ Kanaannu koo, munu faa lé ke é nyanale wolé tɛrɛ la koo, dé wa ’ma, wo dan ko zi lɛ sɔɔ lɛ, yé wo dan ko tɔ si lɛ tɛrɛ la, yé i dan a kɛlɛ lɛ kaa i tɔ blɛn lé we maa?

¹⁰ Gakelebale lé Jozué lɛ léé: ’I nwa, mɛmalé i vo é yiale i bli laa?

¹¹ Izraɛl wenyané kɛlɛ; gi lé ko pa do wo nya, wa sɛrɛ; fɛnu lé wa nɔ bale pale wo ma nya, wa si; wa si kyeen nya yé wo go a nya é yɔɔle, yé wa yɔɔ wolé kɔnénu gi.

¹² Bɛwemalé wo ’ka bɔalɛ léé, wo dɔ wo nyanézannu ’lɛ lo; amalé wo nɔla ’wo zuozia ’wo nyanézannu lee; bale a é pale wo ma, ’bɛzama; fɛ lé wo bale pa a ma, dé wo ’ka a si lɛ ka méléna lo, maa ’ka dan kɛlɛ lɛ ka va é dɛrɛ lo.

¹³ ’I nwa, ’i munu kɛlɛ é zima. Bé fe léé: ’Ka kɛlɛ é zima tɛlɛ lé we ma; naa, Gakelebale, Izraɛl lé Bale léma: Oo Izraɛl, fɛ lé wo bale pa a ma, é a ka lee. I ’ka bɔalɛ léé, i dɔ i nyanézannu ’lɛ lo, fɔɔ ’té ka balepamafɛ si é wo ka méléna.

¹⁴ Bladi, ka dan bié lɛ ka bɛn ma bɛn ma; yé bɛn lé Gakelebale é dan a si lɛ, é dan bié lɛ é lele ma lele ma, yé lele lé Gakelebale é dan a si lɛ, é dan bié lɛ kɔn ma kɔn ma, yé kɔn lé Gakelebale é dan a si lɛ é dan bié lɛ mi ma mi ma.

¹⁵ Naa, mi lé balepamafɛ ke a lee, wo dan a si lɛ yé wo dan a kyɛ ble lɛ, yee valé fɛ faa lé ke azé nya; é Gakelebale lé gipawe sɛrɛ yé é we lɛrɛlɛrɛ kɛlɛ Izraɛl, ’bɛzama.

¹⁶ Jozué nwa bladi tutu, yé é Izraɛl bié bɛn ma bɛn ma, yé wo Juda bɛn si.

¹⁷ É Juda lelenu bié, yé wo Zérak lele si. É Zérak lele bié kɔn ma kɔ ma, yé wo Zabidi si.

¹⁸ É Zabidi lé kɔngimunu bié mi ma mi ma, yé Zérak be Zabidi, Zabidi be Kaami, Kaami be Akan, Juda bɛngizan lé wa si.

¹⁹ Jozué lé Akan lɛ léé: An be, ’i Gakelebale, Izraɛl zé Bale tɔ kɛlɛ blɛn yé bé lɛdɔma. We lé bé kɛlɛ, bé fe an lɛ, té bé yɔɔ an ma lo.

²⁰ Akan a zi pa Jozué lɛ léma: Weboen lé, maa wenyané kɛlɛ Gakelebale, Izraɛl lé Bale ma, yé we lé maa a kɛlɛ, yee lo.

²¹ Bé ye, Sinéaa sɔ lé é ke nɔnɔmi koo, gɔɔlifu sikla wuru do koo, kyan kuru do lé a bɛn ke sikla yɔ fié wɔlɛ vu nya koo, an bli bɔ wo ma yé maa wo si, wa é yɔɔlé tɛrɛ wuo anlé sɔkɔn worona yé gɔɔlifu a a wuo.

²² Jozué munu nwunvɔ, yé wo go vlan nya yé wo wɔra sɔkɔn gi, yé bé ye, fɛnu a é yɔɔle Akan lé sɔkɔn gi, yé gɔɔlifu a wo wuo.

²³ Wo wo si sɔkɔn worona, wo da wo nya Jozué valé Izraɛl lé nénu faa va, yé wo wo pla Gakelebale ’lɛ.

²⁴ Zérak be Akan koo, gɔɔlifu koo, sɔ koo, kyan kuru do koo, Akan benu valé a lunu koo, alé dirinu koo, alé sokofalenu koo, alé ’blanu koo, alé sɔkɔn koo, yé fɛnu faa lé ke azé nya koo, Jozué valé Izraɛlnu faa wo si yé wo go wo nya Akɔɔ gɔnu worona.

²⁵ Jozué léma: Mɛmalé i we tɔntɔn bɔ ko maa? Gakelebale é dan we tɔntɔn bɔ lɛ i ma kyɔ. Yé Izraɛl munu faa Akan gyɛ gɔlɛ nya. Wo gɔlɛ vuli wo va, yé wo wo kyɛ ble,

²⁶ yé wo gɔlɛ zun blɛn dɔ Akan ta yé é vo ana fɔɔ kyɔ. Yé Gakelebale daan élé bliflile blɛn ma. We ’ko lé we ma lé wo fɛkona tɔ pa Akɔɔ gɔnu worona fɔɔ kyɔ yi nya.