Jozué 6 - Kazambale lé Sebe Sauunu 1979

Wo Jériko si

¹ Jériko munu wolé fla zi gɔrɔ lɛ tan Izraɛl lé nénu lee é zima. Mi do kpen ’ka bɔraan lo yé mi do kpen ’ka wɔraan lo.

² Gakelebale lé Jozué lɛ léé: Bé ye, Jériko koo, a nwiinzan koo, alé gulizilɛ sunyanu koo, an wo nɔ i lɛ.

³ ’Ka gié wolé flagɔrɔ zi; ’kaa faa lé ka ke gulidan sunyanu nya, ’ka gié wolé fla zi gɔnɔ do. Ka dan kɛlɛ lɛ ’bɛ zo fɔɔ yi suiɛdo.

⁴ Balebanmunu sɔrafié, wo dan go lɛ Bale lé kɛsu ’lɛ, béli sɔrafié lé wo zuoi éé goo wele nya, wo nya wo lee; a yi sɔrafiézan nya, ka dan gié lɛ flagɔrɔ zi gɔnɔ sɔrafié, yé Balebanmunu wo dan béli fɛn lɛ.

⁵ Dé wo béli fɛn, yé ka béli dére ’ma, munu faa ’é siaa dére plɛplɛ nya. Tɔɔn, wolé fla zi gɔrɔ é dan zana lɛ, yé ka faa do do é dan wɔra lɛ tegele.

⁶ Nɛn be Jozué Balebanmunu laa, yé é lé wo lɛ léé: ’Ka gipawe pagikɛsu si yé ’ka go a nya, yé Balebanzannu sɔrafié ’é go ’wolé béli sɔrafié lé wo zuoi éé goo wele nya, wo nya Gakelebale lé gipakɛsu ’lɛ.

⁷ Yé é lé munu lɛ léé: ’Ka tawo, ’ka fla gɔrɔ zi lɛ sɔɔ, yé munu lé gulidanfɛnu ke wo lee, ’wo gié Gakelebale lé gipakɛsu ’lɛ.

⁸ Jozué nyaa wefele nya munu lɛ aan wo, Balebanzannu sɔrafié lé béli sɔrafié ke wo lee yé woo goo wo nya Gakelebale ’lɛ, wo kun tawole valé béli fɛnle ma. Gakelebale lé gipawe pagikɛsu go wo zuo.

⁹ Sunyanu lé gulidanfɛnu ke wo lee, woo tawoo Balebanzannu lé woo béli fɛɛn, wo ’lɛ, yé wo zi bin sunyanu éé goo gipakɛsu zuo. Bléyian va lé wa tawona, ’té woo béli fɛɛn.

¹⁰ Jozué lé munu lɛ léma: Té ka siaa lo, té ’wo ka dére ’ma lo, té ka we do kpen sié la lo, fɔɔ, yian nya lé maa fe ka lɛ léé, ’ka siaa plɛplɛ. ’Bɛ yi nya lé ka dan siaa lɛ plɛplɛ.

¹¹ Gakelebale lé gipakɛsu gié flagɔrɔ zi; é gié a zi gɔnɔ do yé wo go fɛana lé wolé sɔkɔnnu ke, ana, yé wo yii ’bɛna.

¹² Jozué nwa bladi tutu, yé Balebanzannu go Gakelebale lé gipakɛsu nya.

¹³ Balebanzannu sɔrafié lé wo go béli sɔrafié lé wo zuoi éé goo wele nya, wo nya, Gakelebale lé gipakɛsu ’lɛ, wo ta sia yé wo béli fɛn. Sunyanu lé gulidanfɛnu ke wo lee, wo tawo wo ’lɛ, yé wo zi bin sunyanu go Gakelebale lé gipakɛsu zuo. Bléyian va lé wa tawona, ’té woo béli fɛɛn.

¹⁴ A yi fiézan nya wo gié flagɔrɔ zi gɔnɔ do yé wo da ’wolé sɔkɔnnu ’léé. Wo vo ’bɛ kɛlɛna a zo yi suiɛdo.

¹⁵ A yi sɔrafiézan nya, wo nwa bladi, tu kini gunu nya, yé wo gié flagɔrɔ zi gɔnɔ sɔrafié fɛan zo lé wa kɛla é kyɛn, a zo; yi ’ko do kpen nya lé wo gié flagɔrɔ zi gɔnɔ sɔrafié.

¹⁶ A gɔnɔ sɔrafiézan nya, Balebanzannu béli fɛn aan wo, Jozué lé munu lɛ léé: ’Ka siaa plɛplɛ, naa, Gakelebale fla nɔ ka lɛ.

¹⁷ Fla koo, fɛnu faa lé ke fla koo, wo dan wo nɔ lɛ Gakelebale lɛ bale pale wo ma nya, naa, bɔrɔdɛ le Raab koo, munu faa lé wo ke a va kɔn gi koo, wo dan wo vo lɛ é yuɛma, munu lé ko wo nwunvɔ, é wo yɔɔ, ’bɛzama.

¹⁸ Naa, ’ka yuɛ pa kabozen va, fɛnu lé wo dan bale pa lɛ wo ma, wolé we ma. Naa, fɛnu lé wo dan wo nɔ lɛ Bale lɛ bale pale wo ma nya, dé ka wo si, ’té ka bale pale nɔla Izraɛl ta yé ka dan we tɔntɔn bɔ lɛ Izraɛl ma.

¹⁹ Gɔɔlifu faa koo, kyan faa koo, zénéfɛnu faa koo, foliɛwɔlɛfɛnu faa koo, wo dan wo pa lɛ é yɛrama Gakelebale zé nya, yé wo dan wo pa lɛ Gakelebale lé fɛwezan pana.

²⁰ Munu siaa plɛplɛ yé Balebanzannu béli fɛn. Munu béli vun ’ma aan wo, wo siaa plɛplɛ, yé flagɔrɔ zana yé munu faa do do wɔra fla tegele. Wo fla si,

²¹ yé fɛnu faa lé é ke fla, gɔnénu valé lomu koo, nénu valé mi kwanu koo, dirinu koo, ’blanu koo, sokofalenu koo é ziin, wo wo faa gyɛ bale pale wo ma nya gwɔun nya.

²² Mi fié lé wo da yi la tɛrɛ nagini lɛ bɛ, Jozué lé wo lɛ léé: ’Ka wɔra bɔrɔdɛ le lé kɔn gi, yé le ’ko valé élé munu faa lé wo ke alé kɔn gi, ’ka wo bɔra, bɛan zo lé ka Bale ’nyɔɔn a lɛ, a zo.

²³ Pɛniɛnu lé wo go tɛrɛ nagini lɛ yi la, wo wɔra yé Raab koo, a ti koo, a bu koo, a bwenu koo, alé fɛnu faa koo, wo wo bɔra. Wo alé munu faa bɔra yé wo wo vo Izraɛlnu lé sɔkɔn gini ma.

²⁴ Wo fla valé é tafɛnu faa kyɛ ble, naa, gɔɔlifu koo, kyan koo, zéné valé foliɛwɔlɛ fɛnu faa koo, wo wo pa Gakelebale lé kɔn gi fɛwezan pana.

²⁵ Bɔrɔdɛ le Raab koo, a ti lé kɔngimunu koo, fɛnu faa lé ke azé nya koo, Jozué wo vo é yuɛma; é nyana Izraɛlnu va fɔɔ kyɔ, munu lé Jozué wo pa zia Jériko nagini lɛ, é wo yɔɔ, ’bɛzama.

²⁶ Yé Jozué bale pa fla ’ko pale é pai ma, yé é léé: Mi lé é nwa Jériko fla ’ko pale nya é pai, bale a é pale a ma Gakelebale ’lɛ. Dé é a gane vɔ alé né vininzan é dan ga lɛ, yé dé é a duolinu vɔ a be voélazan é dan ga lɛ.

²⁷ Gakelebale a Jozué va, yé a tɔ kɛlɛle blɛn nwɛɛn ana tɛrɛ faa ta.