Jozué 5 - Kazambale lé Sebe Sauunu 1979

Wo munu gane dɔ Gilgal

¹ Amorénu nwiinzannu faa lé wo ke é nyanale Juudɛn yuu zi yirivɔnazia, wo valé Kanaannu nwiinzannu faa lé wo ke é nyanale wɛyi sɔnɔ, wa ’ma aan wo léé, Gakelebale Juudɛn ’yinu kini ékema yé é tɛrɛ gale bɔra Izraɛl lé nénu lɛ fɔɔ yé wo faa gié, wo gi nyɛ kini yé wo fuu faa si wo ta Izraɛl lé nénu ’lɛ.

² A bléyi va Gakelebale lé Jozué lɛ léé: ’I gɔlɛ kɛlɛ sɛnné nya yé ’i Izraɛlnu gane dɔ é ziin a gɔnɔ fiézan nya.

³ Jozué gɔlɛ kɛlɛ sɛnné nya yé é Izraɛlnu gane dɔ Aralɔt gɔ nwiin.

⁴ Wean ma lé Jozué wo gane dɔ, yee lé ke ’ko: munu faa lé wo si Éjipiti, wo sile Éjipiti tɛrɛ la zuo gɔnénu koo, gulidan sunyanu faa koo, wo ga zia nyéné saa lé fɛna.

⁵ Munu faa ’ko lé wo si Éjipiti, wo wo gane dɔ; naa, munu faa lé wo wo yaa zia nyéné saa lé fɛna wo sile Éjipiti tɛrɛ la zuo, wo ’ka wo gane dɔ lɛ lo.

⁶ Naa, Izraɛlnu tawo lɛɛ yɔ fié nyéné saa lé fɛna, fɔɔ yé gulidanmunu faa lé wo si Éjipiti, ’té wo ’ka Gakelebale dére lɛdɔ lɛ a ma lo, wo ga; tɛrɛnyɔnɔzan lé, Gakelebale ébo ’nyɔɔn wo tinu lɛ léé, é dan a nɔ lɛ ko lɛ bɛ, Gakelebale ébo ’nyɔɔn wo lɛ léé, wo ’ka dan a ye lɛ lo.

⁷ Wolé nénu dɔ wo pai; naa, wo ’ka wo gane dɔ lɛ zia lo, yé wo ’ka ganedɔmunu nya lo, yé Jozué wo gane dɔ.

⁸ Dé wo nyaa ’bɛ munu faa ganedɔle nya, wo vo ’wolé sɔkɔnu gi fɔɔ yé wo béli.

Wo Taboyi lé fɛ ble Jériko bwi la

⁹ Gakelebale lé Jozué lɛ léé: Kyɔ maa Éjipiti tɛrɛ la yaragyɛwe si ka ’wuo ma. Woo fɛkona laama Gilgal fɔɔ kyɔ yi nya.

¹⁰ Izraɛlnu nyana Gilgal ’wolé sɔkɔnnu gi; yé moné yi vu ta ziɛnzan nya é nyanadi wo Taboyi lé fɛ ble Jériko lé fɛna pɛblɛɛ na.

¹¹ Taboyi lé tu kini, tɛrɛ ’ko la goo koo, buru lé lévɛn ’ka a va lo koo, goo sélile koo, wo wo ble a yi duo nya.

¹² Taboyi lé tu kini, dé wo tɛrɛ ’ko la goo ble, mana dale nyaa, mana ’ka Izraɛlnu lee é dɛrɛ lo, yé wo Kanaan tɛrɛlafɛnu ble lɛɛ ’ko wuo.

Jozué gwɔunzan ye

¹³ Naa, Jozué bɔ aan wo Jériko sɔnɔ, é yara nwa loru, yé é a nagini yé bé ye, mi do a é dɔle a yara tegele, élé gwɔun nya é lee. Jozué go a va yé é lé a lɛ léé: I a ko va laa, i a ko nyanézannu vaa?

¹⁴ É a zi pa léé: Gba, naa, maa a Gakelebale lé gulizilɛzan nya; da lé maa a wo bɛ. Jozué dia é bli la yé é ’wuo wɔra a gane wuo, yé é lé a lɛ léé: Mɛ we lé anzan é dan a fe lɛ ’é wuozan lɛɛ?

¹⁵ Yé Gakelebale lé gulizilɛzan lé Jozué lɛ léé: ’Ilé sawalanu si i gane ma, naa, fɛana lé i ke é dɔle é a fɛna tinle nya. Yé Jozué a kɛlɛ a zo.