Jozué 4 - Kazambale lé Sebe Sauunu 1979

Wo gɔlɛ vu ta fié dɔ

¹ Dé munu faa Juudɛn kini faa, Gakelebale lé Jozué lɛ léé:

² ’I mi vu ta fié si munu va, bɛn do do gi mi do do.

³ Bé fe wo lɛ léma: Fɛkona, Juudɛn méléna, fɛana lé Balebanzannu dɔ kli, ’ka gɔlɛ vu ta fié sia ’bɛna yé ’ka go wo nya ka lee, yé ’ka wo pla fɛana lé ka dan yii lɛ, ana.

⁴ Mi vu ta fié lé Jozué wo si Izraɛlnu va, bɛn do do gi mi do do, é wo laa.

⁵ É lé wo lɛ léé: ’Ka gié Gakelebale, kazé Bale lé kɛsu ’lɛ Juudɛn méléna, yé ka faa do do ’é gɔlɛ do do pla ka bɛapa ta, Izraɛl bɛnnu ’léé yɛrama,

⁶ naa, ’é kɛlɛ tɔmase nya ka va. Dé kalé nénu a laa ka lee yi do nya léé: Gɔlɛ ’konu, wo gi lé nɔɔ kazé nyaa?

⁷ Ka dan a fe lɛ wo lɛ léé: Juudɛn yoro bɔi Gakelebale lé gipawe pagikɛsu ’lɛ; dé é a Juudɛn kinina, ’té ’yi a é dɔle, yé gɔlɛ ’konu é dan kɛlɛ lɛ a sele dɔ Izraɛlnu gi fɛ nya lɛɛfaama.

⁸ We lé Jozué a fe Izraɛl lé nénu lɛ, wa kɛlɛ. Wo gɔlɛ vu ta fié si Juudɛn méléna, fɛan zo lé Gakelebale a fe Jozué lɛ, a zo, Izraɛlnu bɛnnu ’léé yɛrama, yé wo go wo nya wo lee yé fɛna lé wo yii, wo wo pla ana.

⁹ Balebanzannu lé wo go gipawe pagikɛsu nya, fɛana lé wo dɔ Juudɛn yoro va, Jozué gɔlɛ vu ta fié zun dɔ ’bɛna é ziin, yé wo vo ana fɔɔ kyɔ yi nya.

¹⁰ Balebanzannu lé woo goo kɛsu nya, wo dɔ Juudɛn méléna fɔɔ, yé we lé Gakelebale a fe Jozué lɛ léé, ’é a fe munu lɛ, a faa kɛlɛle lɛ sɔɔ, we faa lé Moizi a fe Jozué lɛ, a yɛrama. Yé munu gié tawole nya kelekele.

¹¹ Dé munu faa gié faa, Gakelebale lé kɛsu valé Balebanzannu gié munu ’lɛ.

¹² Rubɛn benu koo, Gad benu koo, Manasé bɛn lɛgɔnɔ do koo, wo gié gulidanfɛnu nya wo lee Izraɛlnu ’lɛ, fɛan zo lé Moizi a fe wo lɛ a zo.

¹³ Wo lé gulidanfɛnu ke wo lee, ’té wo ma a é ’lɛrɛle gulidanle we ma, ’té wo mi baa yɔ do bɔa, wo gié Gakelebale ’lɛ Jériko lé fɛna pɛblɛɛna.

¹⁴ A yi nya, Gakelebale Jozué tɔ kɛlɛ blɛn Izraɛl faa yuɛ va, yé wo kana a lee, fɛan zo lé wo kana Moizi lee, alé tɛrɛlayinu faa gi, a zo.

¹⁵ Gakelebale lé Jozué lɛ léé:

¹⁶ Balebanzannu lé woo goo wenayedére pagikɛsu nya, bé fe wo lɛ léé, ’wo si Juudɛn va.

¹⁷ Yé Jozué a fe Balebanzannu lɛ léé: ’Ka si Juudɛn va.

¹⁸ Balebanzannu lé woo goo Gakelebale lé gipawe pagikɛsu nya, bléyian va lé wo si Juudɛn guru gi yé wo bɔra a gɔ la, Juudɛn ’yinu go ’wo pa gi, yé wo nwɛɛn é gɔnu faa la bélé é vinin zo.

¹⁹ Moné vinin yi vuzan nya, munu si Juudɛn yuu va yé wo nyana ’wolé sɔkɔnnu gi Gilgal lé ke Jériko yirinwanazia glɛ la, ana.

²⁰ Gɔlɛ vu ta fié lé wo wo si Juudɛn va, Jozué wo zun dɔ Gilgal.

²¹ É lé Izraɛl lé nénu lɛ léé: Yian nya lé kalé nénu a laan ’wo tinu lee léé: Gɔlɛ konu gi lé nɔɔ?

²² ka dan a gi fe lɛ kalé nénu lɛ léé: Izraɛl gié Juudɛn worona tɛrɛ gale ta.

²³ Naa, Gakelebale, kazé Bale é Juudɛn yuu kini ékema yé é tɛrɛ gale bɔra a worona ka lɛ, fɔɔ yé ka gié, fɛan zo lé Gakelebale, kazé Bale a kɛlɛ Wɛyi Sɔɔn lé é a kini ékema yé é tɛrɛ gale bɔra ko lɛ fɔɔ yé ko gié, ana, a zo,

²⁴ tɛrɛlamunu faa lé a gi dɔɔle we ma lé Gakelebale bɛ a plɛplɛ, yé kanale Gakelebale kazé Bale lee ’é vo ka gi yifaama.