Jozué 3 - Kazambale lé Sebe Sauunu 1979

Wo Juudɛn yuu kini

¹ Jozué nwa bladi tutu yé yee valé Izraɛl lé nénu faa si Sitim. Wo bɔ Juudɛn yuu ma, yé wo nyana ana fɔɔ yé wa kini.

² Yi yaa nyaale zuo nwiinmunu gié kɔn faa ’léé,

³ yé wo lé munu lɛ léma: Bléyian va lé ka dan Gakelebale, kazé Bale lé gipawe pagikɛsu ye lɛ Balebanmunu, Lévinu bɛapa ta, ’ka nwa yé ’ka zi sia a zuo.

⁴ Naa, ka valé yee worona ’é kɛlɛ kilo do. Té ka bié a ma lo. Zi lé é a lé ka tawo a ta, é dan a gɔɔn lɛ ka lɛ, naa, ka vinin ’ka tan gié lɛ zi ’ko ta lo, azama.

⁵ Jozué lé munu lɛ léé: ’Ka kɛlɛ é zima, naa, tɛlɛ Gakelebale é dan gyɛzorowenu kɛlɛ lɛ ka méléna.

⁶ Yé Jozué lé Balebanzannu lɛ léé: ’Ka gipawe pagikɛsu sia yé ’ka gié munu ’lɛ. Wo gipawe pagikɛsu sia yé wo go munu ’lɛ.

⁷ Gakelebale lé Jozué lɛ léé: Kyɔ maa dan i tɔ kɛlɛle blɛn pélisia lɛ Izraɛl munu faa yuɛ va, wolé a gi dɔɔle we ma lé maa dan kɛlɛ lɛ i va bélé fɛan zo lé an kɛlɛ Moizi va, a zo.

⁸ Balebanzannu lé wo go gipawe pagikɛsu nya, bé fe wo lɛ léé: Bléyian va lé ka bɔ Juudɛn yuu gɔɔn ma, ka dɔ Juudɛn yuu va.

⁹ Jozué lé Izraɛlnu lɛ léé: ’Ka bié, yé ’ka tɔné dɔ Gakelebale kazé Bale dére lɛ,

¹⁰ Jozué léma: Bale yuɛmale a ka méléna, yé Kanaannu koo, Étinu koo, Éévinu koo, Férézinu koo, Giigazinu koo, Amorénu koo, Jébusinu koo, é dan wo bin lɛ ka ’lɛ; ka dan ’bɛ gi dɔɔ lɛ ’ko zo:

¹¹ Ka ye, Tɛrɛfaazan lé gipawe pagikɛsu é dan gié lɛ ka ’lɛ Juudɛn va.

¹² Sin, ’ka mi vu ta fié si Izraɛl bɛnnu gi, bɛn do do gi mi do do nya.

¹³ Yé Balebanzannu lé woo goo Tɛrɛfaazan Gakelebale lé gipawe pagikɛsu nya, bléyian va lé wo dan wo gane vɔ lɛ Juudɛn yuu va, Juudɛn yoro é dan bɔi lɛ, ’yinu lé wo si loru, wo dan zun dɔ lɛ é kunu nya.

¹⁴ Yé munu faa fwi ’wolé sɔkɔnnu nya Juudɛn kinile we ma, yé Balebanzannu lé woo goo gipawe pagikɛsu nya, wo tawo munu ’lɛ.

¹⁵ ’Sagyɛbléyi faa va, Juudɛn éé bɔraan bwi la, naa, Balebanzannu lé woo goo kɛsu nya, dé wo bɔ Juudɛn yuu ma, yé wo gane ma vo drɔɔdrɔɔ ’yi gɔɔn ma,

¹⁶ ’yinu lé wo si loru zia, wo dɔ yé wo téé é kunu nya; wo sina a baa, Adam lé fla sɔnɔ, ’té é ke Saatan bɛ do la; yé ’yinu lé woo yoroan fɛna pɛblɛɛ lé wɛyi vazia, Wɛminiélɛ Wɛyi vazia, wo béli tata. Munu gié Jériko yara tegele.

¹⁷ Balebanzannu lé woo goo Gakelebale lé gipawe pagikɛsu nya, wo dɔ kli tɛrɛ gale ta Juudɛn méléna, ’té Izraɛl faa éé giéan tɛrɛ gale ta, fɔɔ yé wo giéle nyaa a zo.