Jozué 24 - Kazambale lé Sebe Sauunu 1979

Jozué we fe munu lɛ Sisɛm

¹ Jozué Izraɛl bɛnnu faa zén ékeva Sisɛm, yé Izraɛl lé mi segelenu koo, a nwiinmunu koo, alé weblezannu koo, alé kominu koo, é wo laa. Yé wo da Bale ’lɛ.

² Jozué lé munu faa lɛ léé: Gakelebale Izraɛl lé Bale léma: Ka tranu, Abraam valé Nakɔɔ ti Téra, woo nyanaan é kyɛn yuu zi, ’té woo bale bɛnu bɔa.

³ Maa ka tra Abraam si yuu zi, yé maa a kɛlɛ giézan nya Kanaan tɛrɛ faa la; maa a kulu gi gyɛ yé maa Izak nɔ a lɛ.

⁴ Maa Jakɔb valé Ézau nɔ Izak lɛ yé maa Séii gɔ nɔ Ézau lɛ azé nya, naa, Jakɔb valé é benu go Éjipiti tɛrɛ la.

⁵ Maa Moizi valé Arɔn pa zia yé maa Éjipiti gyɛ we blɛnblɛnnu lé maa a kɛlɛ wo méléna, wo nya, ’bɛ zuo maa ka si ’bɛna.

⁶ Maa ka tinu si Éjipiti tɛrɛ la yé ka bɔ wɛyi ma. Éjipiti munu ka tinu zuo bin goronu valé wisootazannu nya fɔɔ yé wo bɔ Wɛyi Sɔɔn ma.

⁷ Ka tinu siaa Gakelebale lɛ yé Gakelebale gunu dɔra wo valé Éjipitinu méléna, é wɛyi zén wo ta yé é wo mini. We lé maa a kɛlɛ Éjipiti munu lɛ, ka ana ye. Yé ka mɔn bwi la.

⁸ Maa go ka nya Amorénu lé woo nyanaa Juudɛn zi, wolé tɛrɛ la, yé wo guli dan ka va. Maa wo pa ka lee; ka wolé tɛrɛ si yé maa wo gyɛ ka ’lɛ.

⁹ Moab nwiinzan Sipɔɔ be Balak nwa yé é guli dan Izraɛl va. É Béɔɔ be Balaam laa bale pale ka ma we gi.

¹⁰ Naa, é ’ka sɔ lɛ an lɛ léé, an tɔné dɔ Balaam lɛ lo; é ka drɔɔ vo, yé maa ka si Balak lee.

¹¹ Ka Juudɛn kini yé ka bɔ Jériko. Jériko munu guli dan ka va, Amorénu koo, Férézinu koo, Kanaannu koo, Étinu koo, Giigazinu koo, Éévinu koo, Jébusinu koo, woo lé.

¹² Maa wo pa ka lee, yé maa gyebenu pa ka ’lɛ zia yé wo wo bin ka ’lɛ baa, bélé Amorénu nwiinzan fié zo; é ’ka kɛlɛ lɛ kalé gwɔunnu nya lo, é ’ka kɛlɛ lɛ kalé sanu nya lo.

¹³ Tɛrɛ lé ka ’ka a ma nyanama pa lɛ lo, maa a nɔ ka lɛ; flanu lé ka ’ka wo pa lɛ lo, maa a nɔ ka lɛ yé ka nyana wo ta; dɔrɔféinu valé ɔliviyilinu lé ka ’ka wo suru lɛ lo, maa a nɔ ka lɛ yé ka a ma fɛ ble.

¹⁴ Sin, ’ka kana Gakelebale lee ma, yé ’ka a bɔ bli tegele valé yarapalale nya ma. Balenu lé ka tinu wo bɔ yuu zi valé Éjipiti tɛrɛ la, ’wo si ka melena ma, yé ’ka Gakelebale bɔ ma.

¹⁵ Yé dé ka ’ka Gakelebale bɔle yé we zin nya lo, dé é sɔ ka lɛ ka mian bɔ, kazé si a va kyɔ, dé balenu lé ka tinu a bɔ yuu zi, dé ’bɛnu léé, dé Amorénu lé ka nyanaan wolé tɛrɛ la bɛ, dé wozé balenu léé, naa, maa koo, anlé kɔngimunu koo, ko dan Gakelebale bɔ lɛ.

¹⁶ Munu a zi pa léé: Gakelebale vole yé ko bale bɛnu bɔ, ko gi bɔrɔle a ’bɛ ma baa!

¹⁷ Naa, Gakelebale a kolé Bale nya; yee ɛ ko si luubale gi Éjipiti tɛrɛ la, ko valé ko tinu nya; yee ɛ we blɛnblɛnnu kɛlɛ ko yuɛ va, yé é ko takuun zi faa lé ko tawo a ta, é valé munu faa lé ko gié wo méléna, wo lee.

¹⁸ É munu faa bin ko ’lɛ, wo valé Amorénu lé woo nyanaan tɛrɛ ’ko la é ziin. Ko é ziin, ko dan Gakelebale bɔ lɛ, naa, é a kolé Bale nya.

¹⁹ Jozué lé munu lɛ léé: Gakelebale bɔplɛplɛ ’ka ka lee lo, naa, Bale sauun lé, maabo Bale lé, yé é ’ka dan ka ma we vo lɛ kalé weplenu valé kalé wenyanénu ma lo.

²⁰ Bléyian va lé ka dan Gakelebale vo lɛ yé ka Bale bɛnu bɔ, é dan we tɔntɔn bɔ lɛ ka ma yé é dan ka sɛrɛ lɛ we zin kɛlɛle ka lɛ zuo.

²¹ Munu lé Jozué lɛ léé: Gbaoo gba! Naa, ko dan Gakelebale bɔ lɛ.

²² Jozué lé munu lɛ léé: Ka a kabo lé wenayezannu nya léé, ka Gakelebale si kazé nya, a bɔle we gi. Wa zi pa léé: Ko a anayezannu nya.

²³ Amalé bale bɛnu lé ke ka méléna, ’ka wo si ana, yé ’ka bli nɔla, Gakelebale, Izraɛl lé Bale vazia.

²⁴ Munu lé Jozué lɛ léé: Ko dan Gakelebale, kolé Bale bɔ lɛ yé ko dan a dére lɛdɔ lɛ a ma.

²⁵ Yi ko nya Jozué gipawe kɛlɛ munu va yé é bélidɔwe pun valé bélidɔwe sɔnnénu nɔ wo lɛ Sisɛm.

²⁶ Jozué we ’konu gyɛ Bale lé bélidɔwe sɛbɛ gi. É gɔlɛ blɛn si yé é a pla sɛnéyili wuo. Yee sɛnéyili a fɛ lé wana pa é yɛrama Gakelebale zé nya, ana.

²⁷ Jozué lé munu faa lɛ léé: Ka ye, gɔlɛ ’ko, é dan kɛlɛ lɛ wenayezan nya ko ma, naa, dérenu faa lé Gakelebale a fe ko lɛ, é a ’ma, azama. É dan kɛlɛ lɛ wenayezan nya ka ma, té ka kɛlɛ tɔnégiplɛplɛzannu nya kalé Bale ma lo we gi.

²⁸ ’Bɛ zuo Jozué munu pa zia wolé tɛrɛnu la do do.

Jozué gale

²⁹ We ’konu zuo Gakelebale wuozan Nɛn be Jozué ga, ’té a lɛɛ a yɔ soru wɔlɛ vu.

³⁰ Wa pa tɛrɛ lé é a ye ézé nya, a ta, Timinat‐Séra, Éfraim gɔ ma, Gaas gɔ yirinwana bɛbolazia.

³¹ Izraɛl Gakelebale bɔ Jozué lé tɛrɛla faa gi, é valé mi segelenu lé wo vo é yuɛma Jozué zuo, ’té we faa lé Gakelebale a kɛlɛ Izraɛl pli zi, wa gi dɔɔ, wolé tɛrɛla gi.

³² Jozɛfu wɔlɛnu lé Izraɛl si wo nya Éjipiti tɛrɛ la, wa pa Sisɛm, tɛrɛ fen lé Jakɔb a lɔ Sisɛm ti Amɔɔ lee gɔɔlifu kuru yɔ soru nya, ’té é ke Jozɛfu benu lé tɛrɛ nya bɛ, a ta.

³³ Arɔn be Éléazaa ga, yé wa pa Gibéat‐Finé lé wa nɔ a be Finé lɛ, Éfraim gɔ ma, ana.