Jozué 23 - Kazambale lé Sebe Sauunu 1979

Jozué we pla Izraɛlnu faa lɛ

¹ Ana mɔn Gakelebale flinle nɔ Izraɛl lɛ, a nyanézannu lé wa zi lɛ sɔɔ, a sile nya wo lee. Jozué a kwa, yé a lɛɛ kɛlɛ kiɛre.

² Yé Jozué Izraɛl faa laa, alé mi segelenu koo, a nwiinzannu koo, alé weblezannu koo, alé kominu koo, woo lé. É lé wo lɛ léé: Maa kɛlɛ kwa, yé an lɛɛ a kiɛre.

³ We faa lé Gakelebale, kalé Bale a kɛlɛ bɛnnu ’konu lɛ ka ’lɛ, ka a ye, naa, Gakelebale, kalé Bale é ka ma guli dan.

⁴ Ka ye, bɛn ’konu lé wo vo, ’wo valé bɛnnu lé maa wo kulu ga, é sia Juudɛn yuu ma fɔɔ yé é bɔ wɛyi blɛn va yirivɔnazia, maa wo nɔ ka lɛ kazé nya ka bɛn ma bɛn ma ’munnu zunle nya.

⁵ Gakelebale, kalé Bale, é dan wo nyunu lɛ ka ’lɛ yé é dan wo bin lɛ ka ’lɛ; yé ka dan wolé tɛrɛ si lɛ kazé nya, Gakelebale, kalé Bale a fe ka lɛ fɛan zo, a zo.

⁶ We faa lé wa gyɛ Moizi lé bélidɔwe sɛbɛ gi, ’ka yara pa a kɛlɛle valé a ta tawole ta tegele, té ka nɔla, dé ka bɛyilazia lé, dé ka bɛbolazia lé, ana lo.

⁷ Bɛn ’konu lé wo vo ka méléna, té ka vɔɔ wo nya lo, té ka wolé balenu tɔ fe lo, yé té ka bale ’nyɔɔn wolé balenu tɔ nya lo, té ka wo bɔ lo, yé té ka dia wo ’lɛ lo.

⁸ Naa, ’ka yere Gakelebale, kalé Bale ma, ka kɛlɛ fɔɔ kyɔ fɛan zo, a zo.

⁹ Gakelebale bɛn blɛn valé plɛplɛ bin ka ’lɛ; fɔɔ kyɔ yi nya mi do kpen ’ka bɔa dɔle lɛ ka ma lo.

¹⁰ Ka va mi do mi wuru soru bin, naa, Gakelebale, kalé Bale ka ma guli dan, é a fe ka lɛ fɛan zo, a zo.

¹¹ ’Ka yuɛ pa kabozen va é zima Gakelebale, kalé Bale lɔrɔ pale we gi.

¹² Dé ka diéra yé ka yere bɛnnu ’ko pɔnénu lé wo nyana ka méléna, wo ma, dé ka kɛlɛ wo nya mi do lesile nya, dé wo da ka va yé ka go wo va,

¹³ é a sɔbɛlawe nya léé, Gakelebale, kalé Bale ’ka dan vo lɛ bɛn ’konu binna ka ’lɛ lo; wo dan kɛlɛ lɛ ka lɛ séli valé san nya, plén nya ka sɛe gi, lélinu nya ka yuɛ gi, fɔɔ yé ka kulu é ga tɛrɛ zin lé Gakelebale kalé Bale a nɔ ka lɛ, a ta.

¹⁴ Ka ye, sin maa a gona tɛrɛ faa lé zi siana. Ka gi dɔɔ ka bli faa valé ka boen faa nya léé, dére zinnu faa lé Gakelebale kalé Bale a fe ka ma we nya, a do kpen ’ka kɛlɛ lɛ boadére nya lo; wo faa lɛ sɔɔ ka lɛ, a do kpen ka kɛlɛ lɛ boadére nya lo.

¹⁵ Dére zinnu faa lé Gakelebale, kalé Bale a fe ka lɛ, wo lɛ sɔɔ fɛan zo, a zo duo lé Gakelebale é dan dére naanénu faa lɛ sɔɔ lɛ, fɔɔ yé é ka guru zana a gi tɛrɛ zin lé Gakelebale, kalé Bale a nɔ ka lɛ, a ta.

¹⁶ Gipawe lé Gakelebale, kalé Bale, a kɛlɛ ka va, dé ka a sɛrɛ, dé ka bale bɛnu bɔ yé ka dia wo ’lɛ, Gakelebale lé bliflile é dan nwa lɛ ka ma yé ka dan zamaga wo lɛ é nya do, tɛrɛ zin lé é a nɔ ka lɛ, a ta.