Jozué 22 - Kazambale lé Sebe Sauunu 1979

Jozué zi nɔ Juudɛn zi munu lɛ

¹ Rubɛnnu koo, Gadnu koo, Manasé bɛn lɛgɔnɔ do koo, Jozué wo laa.

² É lé wo lɛ léé: We faa lé Gakelebale wuozan Moizi ka béli dɔ a nya, ka a faa kɛlɛ yé we faa lé maa fe ka lɛ ka an lɛdɔma.

³ Ka ’ka ka bwenu vo lɛ wo saa lo fɔɔ kyɔ, dɔlé ’té a we namɔn, yé ka tawo Gakelebale kazé Bale dére ta yé ka alé bélidɔwe lɛdɔma.

⁴ Sin, Gakelebale, kazé Bale flinle nɔ ka bwenu lɛ, é a fe wo lɛ fɛan zo, a zo, amalé ’ka diéra yé ’ka go kalé sɔkɔn ’léé, tɛrɛ lé é ke kazé nya, ’té Gakelebale wuozan Moizi a nɔ ka lɛ Juudɛn zi bɛ, a ta.

⁵ Naa, dérenu valé bélidɔwe lé Gakelebale wuozan Moizi a fe ka lɛ, ’ka wo ta tawo ka yuɛi do nya ma; ’ka Gakelebale, kalé Bale lɔrɔ pa ma; ’ka alé zinu faa ta tawo ma; ’ka alé bélidɔwenu kɛlɛ ma; ’ka buvɔ a ma ma; yé ’ka alé nyanama pa ka bli faa valé ka boen faa nya ma.

⁶ Yé Jozué wo drɔɔ vo yé é wo pa zia, yé wo go wolé sɔkɔnnu ’léé.

⁷ Moizi tɛrɛ nɔ Manasé bɛn lɛgɔnɔ do lɛ Bazan tɛrɛ la é kyɛn, yé Jozué tɛrɛ nɔ a bɛn lɛgɔnɔ koɛ lɛ wo bwenu va Juudɛn bɛ do la ze, yirivɔnazia. Jozué wo pa zia wolé sɔkɔnnu ’léé bléyian va, é wo drɔɔ vo

⁸ yé é lé wo lɛ léé: Ka a nɔlana é ziin kalé sɔkɔnnu ’léé fuafɛ kiɛre koo, trubɛnu kiɛre kiɛre koo, gɔɔli ’léé blɛn koo, kyan koo, zéné koo, foliɛwɔlɛ koo, sɔnu koo, wo nya ka lee. ’Ka nyanézannu lé gulizarafɛ guli ka bwenu ma.

⁹ Rubɛnnu koo, Gadnu koo, Manasé bɛn lɛgɔnɔ do koo, wo si Izraɛl lé nénu va Silo, Kanaan tɛrɛ la, yé wo nɔla gole we gi Galaad tɛrɛ lé ke wozé nya, ’té wo nyana a ta bɛ, a ta, Gakelebale a fe Moizi lɔlu nya fɛan zo, a zo.

Wo balebanna kɛlɛ Juudɛn yuu sɔnɔ

¹⁰ Wo bɔ aan wo Juudɛn yuu ma tɛrɛ lé ke Kanaan tɛrɛ buru do nya, ana, Rubɛnnu koo, Gadnu koo, Manasé bɛn lɛgɔnɔ do koo, wo balebanna do kɛlɛ Juudɛn yuu gɔ la, balebanna lé mi a yé é boan, a nya.

¹¹ Izraɛl lé nénu a ’ma léé, wa fena léé, ka ye, Rubɛnnu koo, Gadnu koo, Manasé bɛn lɛgɔnɔ do koo, wo balebanna kɛlɛ Kanaan tɛrɛ yara ma, Juudɛn yuu gɔ la, Izraɛl lé nénu lé tɛrɛ bɛ do la.

¹² Wo ’bɛ ’ma aan wo, Izraɛl lé nénu faa zén ékeva Silo, gulidanle wo va we gi.

¹³ Izraɛl lé nénu munu nwunvɔ Galaad tɛrɛ la, Rubɛnnu koo, Gadnu koo, Manasé bɛn lɛgɔnɔ do koo, wo va. Wo Balebanzan Éléazaa be Finé

¹⁴ valé guniwuo vu nwunvɔ, Izraɛl bɛn do guniwuo do; wo faa do do a ’wo tinu nyanana guniwuo nya Izraɛl mi baanu méléna.

¹⁵ Wo go Rubɛnnu koo, Gadnu koo, Manasé bɛn lɛgɔnɔ do koo, wo va Galaad tɛrɛ la yé wo lé wo lɛ léé:

¹⁶ Gakelebale lé munu faa léma: Tɔnégiplɛplɛwe ’ko lé ka kɛlɛ Izraɛl lé Bale ma, ’bɛ gi lé nɔɔ? Yé mɛmalé ka diéra sin Gakelebale zuo yé ka balebanna kɛlɛ nwale Gakelebale ma we gi kyɔɔ?

¹⁷ Wenyané lé kaa kɛlɛ Péɔɔ, yé ’bɛ kaa tiri dɔ fɔɔ kyɔ, dɔlé ’té é Gakelebale lé munu faa gyɛ gyɛ nya, ’bɛ a ka yuɛ gi we kiéné nya,

¹⁸ yé ka diéra kyɔ Gakelebale zuoo? Dé ka nwa Gakelebale ma kyɔ, tɛlɛ a bli é dan fli lɛ Izraɛlnu faa ma.

¹⁹ Dé kazé tɛrɛ tiri dɔ, tɛrɛ lé ke Gakelebale zé nya, ’té a nyanana ke a ta bɛ, ’ka go ’bɛna yé ’ka nyana ko va, naa, té ka nwa Gakelebale ma lo yé té ka kan kini ko ma balebanna lé é ’ka Gakelebale kozé Bale zé nya lo, a kɛlɛle nya lo.

²⁰ Zérak be Akan, é ’ka tɔnégiplɛplɛ we kɛlɛ lɛ fɛnu lé wa nɔ bale pale wo ma nya, wolé we ma, yé Gakelebale bli fli Izraɛl munu faa ma loo? É ’ka zamaga wo lɛ élé wenyané ma é do lo.

²¹ Rubɛnnu koo, Gadnu koo, Manasé bɛn lɛgɔnɔ do koo, wa zi pa Izraɛl mi baanu nwiinzannu lɛ léma:

²² Bale, Bale, Gakelebale, Bale, Bale, Gakelebale a gi dɔɔ, yé Izraɛl é dan a gi dɔɔ lɛ. Dé ko kɛlɛ nwale nya Gakelebale ma we gi, dé ko kɛlɛ tɔnégiplɛplɛ we nya Gakelebale ma, té é da bɔ ko va yi ’ko nya lo.

²³ Dé ko balebanna dɔ diérale Gakelebale zuo we ma, dé ko a dɔ winu kyɛblele valé saraka bole a ta we ma, dé ko a dɔ Bale bɔvɔ saraka bole we ma, Gakelebale ’é a gi laa ko lee ma.

²⁴ Ko kɛlɛ kana nya ko gi léé, dé yi do la pa yé ka benu é dan fe lɛ ko benu lɛ léé, ka valé Gakelebale Izraɛl zé Bale dɔlafɛ a mɛ nyaa?

²⁵ Rubɛnnu valé Gadnu, Gakelebale Juudɛn yuu dɔ kaa méléna glɛ nya. Kazé ’ka Gakelebale va lo. Yé ’bɛ zo lé ka benu é dan ko benu lé kanale Gakelebale lee yi ga lɛ.

²⁶ Bɛwemalé ko léma: Kaa balebanna do kɛlɛ, wi kyɛblele valé saraka bole we ma kaan lo,

²⁷ naa, ko kɛlɛ wenayefɛ nya ko valé ka méléna, ko kulunu valé ka kulunu méléna, léé, ko Gakelebale bɔa ’é bɔna, kolé balebanwinu kyɛblele koo, kolé wenyané ’yibo saraka valé kolé bɔvɔ saraka bole koo, wo nya, té ka benu a fe yi do nya ko benu lɛ léé, kazé ’ka Gakelebale va lo lo.

²⁸ Ko léma: Dé é kɛlɛ tɛlɛ tɛlama, dé wa fe ’bɛ zo, dé é a ko nyaoo, dé é a ko kulu nyaoo, ko lɛ, ko dan a zi pa lɛ léé: Gakelebale banna lé ko tinu a kɛlɛ, ka yé loo? Wo ’ka a kɛlɛ lɛ balebanwi kyɛblele valé saraka bole we ma lo, naa, wa dɔ kaa méléna tɔmase nya.

²⁹ Nwale Gakelebale ma valé diérale Gakelebale zuo, ko gi bɔrɔle a ’bɛ ma baa; balebanna bɛ lé é ’ka Gakelebale kozé Bale zé lé ke é nyanana ’lɛ, a nya lo, a kɛlɛle balebanwi kyɛblele valé Bale banle valé saraka bole we gi, ko gi bɔrɔle a ’bɛ ma baa.

³⁰ Finé koo, guniwuonu lé ke a va, ’té wo ke Izraɛl mi baanu nwiinzannu nya bɛ, wo koo, dé wo Rubɛnnu valé Gadnu valé Manasénu dére ’ma, é sɔ wo lɛ.

³¹ Yé Balebanzan Éléazaa be Finé lé Rubɛnnu valé Gadnu valé Manasénu lɛ léé: Sin, ko gi dɔɔ léé, Gakelebale a kaa méléna; ka ’ka we ’ko kɛlɛ lɛ tɔnégiplɛplɛ we nya Gakelebale ma lo, azama; ’bɛ zo lé ka Izraɛl lé nénu so sin Gakelebale lé bliflile lee.

³² Balebanzan Éléazaa be Finé valé guniwuonu si Rubɛnnu valé Gadnu va, yé wo si Galaad tɛrɛ la yé wo go Kanaan tɛrɛ la Izraɛl lé nénu va yé wo we zuo fe wo lɛ.

³³ É sɔ Izraɛl lé nénu lɛ; wo Bale drɔɔ vo yé wo ’ka a fe lɛ é dɛrɛ léé, ’wo dan guli dan lɛ yé tɛrɛ lé Rubɛnnu valé Gadnu nyanaan a ta bɛ, yé wa sɛrɛ lo.

³⁴ Rubɛnnu valé Gadnu léma: Balebanna ’ko a wenayefɛ nya kaa méléna léé, Gakelebale ɛ ke Bale nya, amalé wa tɔ pa Ed.