Jozué 20 - Kazambale lé Sebe Sauunu 1979

Mi yɔɔla flanu

¹ Gakelebale lé Jozué lɛ léma:

² Bé fe Izraɛl lé nénu lɛ léma: ’Ka mi tayɔɔ flanu pa, fɛan zo lé maa fe ka lɛ Moizi lɔlu nya, a zo,

³ yé mi lé é mi gyɛ, ’té é ka a kɛlɛ lɛ ébo yuɛ va lo, é bɔaléé é vlan buru yé é go ana; woo flanu é dan kɛlɛ lɛ ka yɔɔna nya nyɛ lɛgipazan lee.

⁴ Migyɛzan é dan vlan buru lɛ fla ’konu va fla do vazia yé é dan dɔ lɛ yee flagɔrɔ ’léé yé é dan élé we fe lɛ fla ’ko la mi segelenu lɛ; wo dan a si lɛ, yé wo dan nyanana nɔ lɛ a lɛ, yé é dan nyana lɛ wo va.

⁵ Dé nyɛ lɛgipazan a zuo bin wo ’ka dan migyɛzan bɔra lɛ a lɛ lo; naa, é ’ka é bɔluzan gyɛ lɛ ébo yuɛ va lo, yé a nyané ’ka a gi é kyɛn lo.

⁶ É dan vo lɛ fla ’ko la fɔɔ yé é dɔ zén‐ékevamunu ’lɛ alé weblele we gi, fɔɔ yé Balebanmunu ’lɛzan lé ke Bale banna azé bléyi va, yé ’bɛ é ga a zo. ’Bɛ zuo, migyɛzan é dan nɔla lɛ é pa gi yé é go élé fla élé kɔn gi é ziin, fla lé é fwi ana, ana.

⁷ Kédɛs lé ke Galilé tɛrɛ la Néfitali gɔ ma koo, Sisɛm lé ke Éfraim gɔ ma koo, Kiijat‐Aaba lé ke Ébrɔn nya Juda gɔ ma koo, wo wo pa é yɛrama.

⁸ Juudɛn yuu zi, Jériko lé yirinwanazia, Bɛsɛɛ lé ke bwi gi, Rubɛn bɛn lé fɛna pɛblɛɛna koo, Ramɔt lé ke Galaad tɛrɛ la, Gad bɛn lé tɛrɛ la koo, Golan lé ke Bazan tɛrɛ la, Manasé bɛn lé tɛrɛ la koo, wo wo si a va.

⁹ Flanu lé wo wo pa é yɛrama Izraɛl lé nénu faa valé bɛn lé ke wo va, wozé nya, léé, mi lé é ’ka mi gyɛ lɛ ébo yuɛ va lo, ébo ta yɔɔ ana, yé é ’ka gaan nyɛ lɛgipazan lee, a dale zén‐ékevamunu va bléyi ’lɛ lo, wo lé ke bɛ.