Jozué 2 - Kazambale lé Sebe Sauunu 1979

Mi fié go Jériko nagini lɛ

¹ Wa Sitim, yé Nɛn be Jozué mimavɔɔzannu fié nwunvɔ kyeen gi yé é lé wo lɛ léé: ’Ka go, ’ka tɛrɛ nagini, naa, ’ka go Jériko bozen na. Wo go, yé wo bɔ bɔrɔdɛ le do lé wa laama Raab, alé kɔn ’léé, yé wo yi gyɛ ’bɛna.

² Jériko munu lé wo nwiinzan lɛ léé: Bé ye, Izraɛlnu da é béli ’ko, tɛrɛ naginile we gi.

³ Jériko nwiinzan we pa Raab lɛ zia léé: Munu lé wo da i va yé wo wɔra ilé kɔn gi, ’i wo bɔra a gi, naa, tɛrɛ faa naginile we gi lé wo da.

⁴ Lezan gɔné fié ’ko si kɔɔn, ’té é wo yɔɔ yé é léé: Munu ’konu da an va weboen nya, naa, maa ’ka wo sina dɔɔ lɛ lo;

⁵ nyanadi pa aan wo yé flagɔrɔ lɛtanbléyi a bɔna, munu ’konu bɔra; maa ’ka wo gona dɔɔa lo; ’ka go wo zuo fiéfié yé ka dan dɔ lɛ wo ma.

⁶ É go kɔɔn wo nya kɔn gwa ta yé é wo yɔɔ lɛn’pɛɛ lé é wo pla ékela kɔn gwa ta, wo wuo.

⁷ Munu ’konu go wo zuo zi lé é go Juudɛn yuu kinina, a ta, yé wo flagɔrɔ lɛ tan wo zuo.

⁸ Dé tɛrɛ naginizannu ’ka tan yi gyɛ lɛ lo, Raab go wo va kɔn gwa ta

⁹ yé é lé wo lɛ léé: Maa gi dɔɔ léé, Gakelebale tɛrɛ ’ko nɔ ka lɛ; ka ko gi nyɛ blɛn kini yé gligli zén kolé tɛrɛlamunu faa gi kalé we ma.

¹⁰ Ka si Éjipiti tɛrɛ la aan wo, yé Gakelebale Wɛyi Sɔɔn kini ékema ka ’lɛ fɛan zo, yé Amorénu nwiinzan fié, Sioni valé Ɔg lé wo ke Juudɛn yuu zi, ka kɛlɛ wo lɛ fɛan zo yé ka wo kulu ga, ko a faa ’ma, azama.

¹¹ Ko a ’ma, yé ko fuu si ko ta, yé ko ta kɛlɛ drɔɔdrɔɔ kalé we ma; naa, Gakelebale kazé Bale ɛ ke Bale nya la gi loru valé tɛrɛ la.

¹² Sin, kalé zanté, ’ka Gakelebale ’nyɔɔn léé, an wezin kɛlɛ ka lɛ fɛan zo, ka dan wezin kɛlɛ lɛ an ti lé munu lɛ a zo.

¹³ ’Ka sɔbɛlawe fe an lɛ; an ti koo, an bu koo, an bwenu koo, an burunu koo, an zuanénu koo, wolé fɛnu faa koo, dé ka dan wo vo lɛ é yuɛma yé ka ko si ga lee, ’ka fe an lɛ.

¹⁴ Munu ’konu a zi pa a lɛ léé: Dé kanu gaan kɔɔn, ko ga ka lɛi, ’té dé i ’ka ko ta bɔra lɛ lo; yé dé Gakelebale tɛrɛ ’ko nɔ ko lɛ, ko dan ilé we kɛlɛ lɛ wezin valé yarapalale nya.

¹⁵ Alé kɔn a é dɔle flagɔrɔ ta loru, amalé é wo zun fɛnɛti la bale nya.

¹⁶ É lé wo lɛ léé: ’Ka go gɔ vazia, dé ka da kee ka zuobinmunu nya; ’ka yɔɔ ana mi yi yaa, fɔɔ yé wo da é ziin; ’bɛ zuo yé ’ka kalé zi sia.

¹⁷ Munu ’konu lé a lɛ léé: Bale lé, i léé, ko ’nyɔɔn, ko dan si lɛ a gi ’ko zo:

¹⁸ Dé ko da tɛrɛ ’ko la, ’i bale sɔɔn vɔ fɛnɛti lé i ko zun a ta, a ma, yé i ti koo, i bu koo, i bwenu valé i zuanénu koo, i ti lé kɔngimunu faa koo, ’i wo zén ékeva ilé kɔn gi i va.

¹⁹ Dé wo va mi do bɔra béera, alé we a ébo nwiin, ’té ko nwiin a é pla; naa, munu lé wo dan kɛlɛ lɛ i va kɔn gi, dé ko va mi do bɛ mane wo va mi do ma, a we a ko nwiin.

²⁰ Yé dé i ko ta bɔra, bale lé, i léé, ko ’nyɔɔn ’é lɛ, ko dan si lɛ a gi.

²¹ É a zi pa léé: ’É kɛlɛ ka dére yɛrama ma. É si wo va yé wo go. Yé é bale sɔɔn vɔ yee fɛnɛti ta.

²² Wo go, yé wo bɔ gɔ ma yé wo vo ana yi yaa fɔɔ yé wo zuobinmunu nɔla wo pai. Wo zuobinmunu wo nagini zi ’ko ta fɛfaana, yé wo ’ka wo ye lɛ lo.

²³ Mi fié nɔla, yé wo gɔ zun, yé wo Juudɛn yuu kini. Wo go Nɛn be Jozué va, yé wo ’wo zuo faa fe a lɛ.

²⁴ Wo lé Jozué lɛ léé: Gakelebale tɛrɛ ’ko faa nɔ ko lɛ weboen nya. Yé gligli zén ana tɛrɛlamunu faa gi kolé we ma.