Jozué 18 - Kazambale lé Sebe Sauunu 1979

Bɛn sɔrafié lé tɛrɛ

¹ Izraɛl lé nénu faa zén ékeva Silo yé wo zén‐ékevasɔkɔn dɔ ’bɛna. Wo pla tɛrɛ nwiin.

² Izraɛl lé nénu bɛn sɔrafié ’ka tan ’wolé tɛrɛ ye lɛ lo.

³ Jozué lé Izraɛl lé nénu lɛ léé: Tɛrɛ lé Gakelebale, ka tinu zé Bale a nɔ ka lɛ, ka dan nwa lɛ mɛ yi la yé ka a sii?

⁴ ’Ka mi yaa yaa si bɛn do do gi yé maa dan wo nwunvɔ lɛ. Wo dan nwa lɛ yé wo dan gié lɛ tɛrɛ ’ko faa la, yé wo dan tɛrɛ glɛ ye lɛ a gulile yɛrama yé wo dan da lɛ an va é ziin.

⁵ Wo dan a gi bɔi lɛ sɔrafié; Juda é dan vo lɛ ’é glɛ la yirinwana bɛyilazia, yé Jozɛfu lé munu wo dan vo lɛ ’wozé glɛ la yirinwana bɛbolazia.

⁶ Amalé ’ka tɛrɛ glɛ nyɔɔ dɔ sɔrafié yé ’ka da a nya an lɛ ze. Maa dan ’munnu zun lɛ ka lɛ Gakelebale kolé Bale ’lɛ.

⁷ Naa, Lévinu zé ’ka dan kɛlɛ lɛ ka va lo; naa, balebannyanama lé ke wozé nya; yé Gad koo, Rubɛn koo, Manasé bɛn lɛgɔnɔ do koo, wozé tɛrɛ lé Gakelebale wuozan Moizi a nɔ wo lɛ Juudɛn zi, yirinwana zia, wa ye.

⁸ Bléyian va lé munu ’ko nwa yé wo go tɛrɛ glɛnu ye lɛ, Jozué lé wo lɛ léma: ’Ka go, ’ka gié ana tɛrɛ faa la, ’ka tɛrɛnu nyɔɔ dɔ yé ’ka da an va é ziin; ’bɛ zuo maa dan ’munnu zun lɛ ka lɛ Gakelebale ’lɛ, Silo.

⁹ Yé munu ’konu go yé wo gié ana tɛrɛ la yé wo tɛrɛ glɛnu dɔ flanu yɛrama tɛrɛ lɛ sɔrafié nya, yé wa nyɔɔ dɔ sɛbɛ la yé wo da é ziin Jozué va sɔkɔndɔna, Silo.

¹⁰ Jozué ’munnu zun wo lɛ Silo, Gakelebale ’lɛ, yé wo tɛrɛ guli Izraɛl lé nénu ma yé wo tɛrɛ buru do do nɔ munu lɛ do do.

Bɛnjamɛn bɛn zé tɛrɛ

¹¹ Wo ’munnu zun yé Bɛnjamɛn bɛn a gyɛ wo gɔnɔla ma gɔnɔla ma yé wozé tɛrɛ buru glɛ a Juda benu valé Jozɛfu benu méléna.

¹² Yirinwana bɛbolazia wo glɛ si Juudɛn yuu ma. É gié Jériko yirinwana bɛbola yé é gɔ gié yirivɔnazia yé é nyaa Bɛt‐Avan bwi la.

¹³ É si ’bɛna, yé é gié Luz lé ke Bétɛl nya, alé yirinwana bɛyilazia yé é zun Atarɔt‐Adaa, gɔ lé ke tɛrɛ zia Bɛt‐Orɔn yara, ana.

¹⁴ Yirivɔnazia, a glɛ soi yé é plin yirinwana bɛyilazia, gɔ lé ke Bɛt‐Orɔn yara, ana; é go gole nya yirinwana bɛyilazia yé é nyaa Kiijat‐Baal lé ke Kiijat‐Jéarim, ana, ’té ’bɛ ke Juda benu lé fla do nya. A yirivɔnazia glɛ lé ke bɛ.

¹⁵ Wozé yirinwana bɛyila glɛ pélisia Kiijat‐Jéarim glɛ mun ta. A glɛ go yirivɔnazia fɔɔ yé é bɔ Nɛfitaos ’yibɔna ma.

¹⁶ Gɔ lé ke Bɛn‐Inɔm gɔ worona yara, Réfaim munu lé gɔ worona, yirinwana bɛbolazia, a glɛ gié ’bɛ gɔ glɛ mun ta. É zun Inɔm gɔ worona, Jébusi munu sɔnɔ yirinwana bɛyilazia, fɔɔ yé é bɔ An‐Rogɛl.

¹⁷ É go yirinwana bɛbolazia, yé é bɔ An‐Sémɛs, ’bɛ zuo é bɔ Gélilɔt lé ke Adumim gɔ nwana yara, a ma, yé é zun Rubɛn be Boan lé gɔlɛ ma.

¹⁸ É gié yirinwana bɛbolazia, Araba yara, yé é zun Araba.

¹⁹ Yé é go gole nya Bɛt‐Ogla yirinwana bɛbolazia yé é nyaa wɛyisoro lé ke yirinwana bɛbolazia, a ma, Juudɛn valé wɛyi zénna ékeva na, yirinwana bɛyilazia. A yirinwana bɛyila glɛ lé ke bɛ.

²⁰ Juudɛn yuu kɛlɛ a glɛ nya yirinwanazia. Bɛnjamɛn benu lé tɛrɛ lé ke bɛ, wo gɔnɔla ma gɔnɔla ma, é valé wo glɛnu valé wo sanginu nya.

²¹ Bɛnjamɛn bɛn lé flanu lé ke ’ko, wo gɔnɔla ma gɔnɔla ma: Jériko koo, Bɛt‐Ogla koo, Émɛk‐Kɛsit koo,

²² Bɛt‐Araba koo, Sémaraim koo, Bétɛl koo,

²³ Avim koo, Para koo, Ofra koo,

²⁴ Kéfaa‐Amonai koo, Ofni koo, Géba koo, woo lé; fla blɛnnu a vu ta fié, é valé ’wolé flanénu nya.

²⁵ Gabaɔn koo, Rama koo, Béérɔt koo,

²⁶ Misipé koo, Kéfira koo, Mosa koo,

²⁷ Rékɛm koo, Jiipéɛl koo, Taréala koo,

²⁸ Séla koo, Élɛf koo, Jébusi lé ke Jérusalɛm nya koo, Gibéat koo, Kiijat koo, woo lé; fla blɛnnu a vu ta ziɛn, é valé ’wolé flanénu. Bɛnjamɛn benu lé flanu a yee ɛ zo, wo gɔnɔla ma gɔnɔla ma.