Jozué 17 - Kazambale lé Sebe Sauunu 1979

Manasé bɛn zé tɛrɛ

¹ Manasé bɛn tɛrɛ buru do ye é ziin ’munnu zunle nya, é a Jozɛfu lé né vininzan nya, azama. Makii a Manasé lé né vininzan nya, yé é a é ziin Galaad ti nya, yé é a gulidanzan nya, amalé é Galaad valé Bazan ye ézé nya.

² Wo Manasé benu koɛnu zé nɔ ’munnu zunle nya, wo gɔnɔla ma gɔnɔla ma; Abiézɛɛ benu koo, Élɛk benu koo, Azriɛl benu koo, Sisɛm benu koo, Éfɛɛ benu koo, Sémida benu koo, wa nɔ wo ɛ lɛ. Jozɛfu be Manasé lé négɔnénu lé ke bɛ, wo gɔnɔla ma gɔnɔla ma.

³ Sɛlofesad ɛ ke Éfɛɛ be nya, yé ’bɛ a Galaad be nya, yé ’bɛ a Makii be nya, yé ’bɛ a Manasé be nya, Sɛlofesad ’ko, a benu ’ka lo, naa, a lunu ana, wo tɔ lé ke ’ko: Makla koo, Noa koo, Ogla koo, Milka koo, Tiisa koo, woo lé.

⁴ Wo go Balebanzan Éléazaa koo, Nɛn be Jozué koo, mi blɛnnu koo, wo va yé wo léé: Gakelebale Moizi béli dɔ léé, ’é tɛrɛ nɔ ko lɛ ko bwenu va. Yé wo tɛrɛ nɔ wo lɛ wo ti bwenu va, Gakelebale dére yɛrama.

⁵ Yé tɛrɛ fén vu kɛlɛ Manasé zé nya, ’té Galaad tɛrɛ valé Bazan lé é ke Juudɛn yuu zi, ’té ’bɛnu a ’é bɛ.

⁶ Naa, Manasé lunu tɛrɛ ye a benu va, yé Galaad tɛrɛ a Manasé be koɛnu zé nya.

⁷ Manasé zé glɛ si Azɛɛ yé é bɔ Mikimétat lé é ke Sisɛm sɔnɔ, a ma, yé é go Jamɛn, An‐Tapuas munu vazia.

⁸ Tapuas tɛrɛ a Manasé benu zé nya, naa, Tapuas lé ke Manasé lé tɛrɛ glɛ la, é a Éfraim benu zé nya.

⁹ A glɛ zun Kana yuu ma, a yuu yirinwana bɛyilazia. Fla ’konu a Éfraim zé nya, Manasé lé flanu méléna. Manasé lé tɛrɛ lé ke yuu yirinwana bɛbolazia, é nyaa wɛyi ma.

¹⁰ Yirinwana bɛyila tɛrɛ a Éfraim zé nya, yirinwana bɛbola zé a Manasé zé nya, yé wɛyi kɛlɛ wo glɛ nya; wo bɔ Azɛɛ zé ma yirinwana bɛbolazia yé wo bɔ Isakaa zé ma yirinwanazia.

¹¹ Manasé zé a Isakaa valé Azɛɛ zé méléna; Bɛt‐Séan valé é zi flanu koo, Jibléam valé é zi flanu koo, Dɔɔ munu valé ’wo zi flanu koo, An‐Dɔɔ munu valé ’wo zi flanu koo, Taanak munu valé ’wo zi flanu koo, Mégido munu valé ’wo zi flanu koo, woo lé. Tɛrɛ yaa lé.

¹² Manasé benu ’ka bɔ lɛ fla ’konu sile lɛ lo yé Kanaan munu a a va lé, ’wo vo tɛrɛ ’ko la.

¹³ Bléyian va lé Izraɛl kɛlɛ plɛplɛ wo gɔɔliban dɔ Kanaan munu nwiin, naa, wo ’ka wo bin lɛ lo.

¹⁴ Jozɛfu benu we fe Jozué lɛ, yé wo léé: Mɛmalé i tɛrɛ fén do, tɛrɛ buru do kpen nɔ ko lɛ, dɔlé ’té ko a munu kiɛre nya yé Gakelebale ko drɔɔ vo fɔɔ bléyi ’ko vaa?

¹⁵ Jozué lé wo lɛ léé: Dé ka a munu kiɛre nya, ’ka go pɔrɔ gi yé ’ka ana wo yé kalé fɛna ’é kɛlɛ Férézi valé Réfaim munu lé tɛrɛ la, ’té dé Éfraim gɔ a ka ma kiéné.

¹⁶ Jozɛfu benu léé: Gɔ ’ko ’ka dan kozé bɔ lɛ lo, yé foliɛwɔlɛ goro a Kanaan munu faa lé woo nyanaan gɔ worona koo, wo lé ke Bɛt‐Séan valé é zi flanu koo, wo lé ke Jizréɛl gɔ worona koo, wo lee.

¹⁷ Jozué lé Jozɛfu lé munu, Éfraim valé Manasé lɛ léé: Ka a munu kiɛre nya, yé ka a plɛplɛ é baba; yé kazé ’ka dan kɛlɛ lɛ tɛrɛ buru do nya lo.

¹⁸ Gɔ é dan kɛlɛ lɛ kazé nya, naa, é a pɔrɔ lé ka dan a wo lɛ, a nya, yé a pagi fɛnu é dan kɛlɛ lɛ kazé nya, yé dé Kanaan munu lé foliɛwɔlɛ goro anaoo, dé wa plɛplɛoo, ka dan wo bin lɛ.