Jozué 14 - Kazambale lé Sebe Sauunu 1979

Juudɛn yirivɔna tɛrɛ gulile

¹ Tɛrɛ lé Izraɛl lé nénu a ye ’wozé nya Kanaan tɛrɛ la, ’té Balebanzan Éléazaa koo, Nɛn be Jozué koo, Izraɛl bɛnnu lé guniwuonu koo, wo wo guli wo ma bɛ, wo lé ke ’ko.

² Wo wo guli bɛn sɔraziɛn valé bɛn lɛgɔnɔ do ma ’munnu zunle nya, fɛan zo lé Gakelebale a fe Moizi lɔlu nya, a zo.

³ Naa, Moizi tɛrɛ nɔ turu bɛn fié valé bɛn lɛgɔnɔ do lɛ Juudɛn zi; é ’ka tɛrɛ nɔ lɛ Lévinu lɛ wo va lo.

⁴ Jozɛfu benu kɛlɛ bɛn fié nya, Manasé valé Éfraim lé; yé wo ’ka Lévinu zé nɔ lɛ ana tɛrɛ la lo, ’té dé é ’ka wo nyanalaflanu valé fla gini ma tɛrɛnu nya lo, wolé trubɛnu valé wolé fɛnu lé we ma.

⁵ We lé Gakelebale a fe Moizi lɛ, Izraɛl lé nénu a lɛdɔma, yé wo tɛrɛ guli.

⁶ Juda benu da Jozué va Gilgal; yé Kénizizan Jéfuné be Kalɛb lé a lɛ léé: Maa valé bii lé we lé Gakelebale a fe Bale lé mi Moizi lɛ Kadɛs‐Baanéa, bé gi dɔɔ.

⁷ Bléyian va lé ko a Kadɛs‐Baanéa yé Gakelebale wuozan Moizi maa nwunvɔ tɛrɛ naginile we ma, ’té an lɛɛ a yɔ fié, yé maa tɛrɛ lé we zuo fe a lɛ bli tegele nya.

⁸ An bwenu lé ko go wo nya bɛ, wo munu fuu si wo ta, naa, an tawo Gakelebale, anlé Bale zuo tegele.

⁹ A yi nya Moizi bale ’nyɔɔn léé, tɛrɛ lé an dan an gane zun lɛ ana, é dan kɛlɛ lɛ anlé tɛrɛ nya lɛɛfaama, maa koo, anlé nénu koo, kozé nya; an tawo Gakelebale, anlé Bale zuo tegele, azama.

¹⁰ Sin, bé ye, Gakelebale an vo é yuɛma, fɛan zo lé é a fe, a zo. A lɛɛ yɔ fié wɔlɛ soru lo, Gakelebale we fe ’bɛ zo Moizi lɛ, ’té Izraɛl a tawona bwi gi; yé sin, bé ye, kyɔ an lɛɛ a yɔ ziɛn wɔlɛ soru.

¹¹ Maa a tan plɛplɛ, bélé fɛan zo lé an ke yi la yé Moizi an nwunvɔ, a zo; anlé plɛplɛ a fɛan zo ’bɛ yi la, é a ’bɛ zo tan, dé gulidanle we ma léé, dé wɔrale valé bɔrale we ma léé.

¹² Amalé gɔ ’ko lé Gakelebale alé we fe ’bɛ yi la, bé nɔ an lɛ; naa, bé ’ma lé Anak munu ana, yé ana flanu a blɛn yé wa plɛplɛ. Dé Gakelebale é dan kɛlɛ lɛ an vaa? yé an dan wo bin lɛ, Gakelebale a fe fɛan zo, a zo.

¹³ Jozué Jéfuné be Kalɛb drɔɔ vo yé é Ébrɔn nɔ a lɛ azé tɛrɛ nya.

¹⁴ ’Bɛ zo lé Ébrɔn vo Kénizi mi Jéfuné be Kalɛb lé tɛrɛ nya fɔɔ kyɔ; é tawo Gakelebale, Izraɛl zé Bale zuo tegele, azama.

¹⁵ É vinin wo Ébrɔn laama Kiijat‐Aaba; Aaba a mi blɛn nya é mini Anak munu faa ta. Yé tɛrɛ flin, ’té guli ’ka lo.