Jozué 13 - Kazambale lé Sebe Sauunu 1979

Juudɛn yirinwana tɛrɛ gulile

¹ Jozué kwa gyɛ yé a lɛɛ kɛlɛ kiɛre. Gakelebale lé a lɛ léé: I kwa gyɛ yé i lɛɛ kɛlɛ kiɛre yé tɛrɛ lé é vo yé é a lé i pla a nwiin é a blɛn baba.

² Tɛrɛnu lé wo vo, wo lé ke ’ko: Filisitinu lé tɛrɛ faa valé Gésuunu lé tɛrɛ faa lé;

³ wolé tɛrɛ sia Sisɔɔ yuu lé éé yoroan Éjipiti tɛrɛ la zia, a ma fɔɔ yé é bɔ Ékrɔn yirinwana bɛbolazia glɛ la; tɛrɛ ’ko lé wa fe léé, é a Kanaannu zé nya yé Filisiti mi blɛnnu soru nyanaan ana; Gazazan koo, Azdɔdzan koo, Azkalɔnzan koo, Gatzan koo, Ékrɔnzan koo, woo lé, yé woo mi blɛnnu valé Avinu woo nyanaan tɛrɛ ’ko la;

⁴ yirinwana bɛyilazia, Kanaannu lé tɛrɛ faa koo, Méara lé ke Sidɔn munu zé nya fɔɔ Afɛk, fɔɔ yé é bɔ Amorénu glɛ la, ’bɛ tɛrɛ koo,

⁵ Giblimunu lé tɛrɛ koo, Liban faa lé ke yirinwanazia, é sia Baal‐Gad lé ke Eɛmɔn gɔ wuo, a ma, fɔɔ yé é bɔ wɔrana Amat, ’bɛ tɛrɛ koo,

⁶ gɔma munu, é sia Liban fɔɔ yé é bɔ Misréfɔt‐Maim koo, Sidɔn munu faa koo, woo tɛrɛnu lé. Maa dan wo bin lɛ Izraɛl lé nénu ’lɛ. ’I tɛrɛ ’ko nɔ Izraɛl lɛ wozé nya, ’munnu zunle nya fɛan zo lé maa fe i lɛ, a zo;

⁷ ’i tɛrɛ ’ko guli bɛn sɔraziɛn valé Manasé bɛn lɛgɔnɔ do ma.

⁸ Rubɛnnu valé Gadnu koo, Manasé bɛn lɛgɔnɔ koɛ koo, wozé tɛrɛ lé Moizi a nɔ wo lɛ Juudɛn zi, yirinwanazia, wa ye, Gakelebale wuozan Moizi a nɔ wo lɛ fɛan zo, a zo:

⁹ é sia Aroɛɛ lé ke Aanɔ yuu gɔ la, é sia fla lé ke gɔnu worona, Médéba fɛna pɛblɛɛna, wo ma, fɔɔ yé é bɔ Dibɔn;

¹⁰ Amorénu nwiinzan Sioni lé é pla munu nwiin Esibɔn, alé flanu faa koo, fɔɔ yé é bɔ Amɔn lé munu glɛ la;

¹¹ Galaad tɛrɛ koo, Gésuunu valé Maakatinu lé tɛrɛ koo, Eɛmɔn gɔ faa koo, Bazan tɛrɛ faa koo, fɔɔ yé é bɔ Salaka;

¹² Ɔg lé ke Réfaim kulu do kpen lé é vo, a nya, ’té é pla Asitarɔt munu valé Édréi munu nwiin, alé tɛrɛ faa lé ke Bazan koo, woo lé. Moizi minwiinzan ’konu gyɛ guli nya yé é wo bin.

¹³ Naa, Izraɛlnu ’ka Gésuunu valé Maakatinu bin lɛ lo, yé wa é nyanale Izraɛl munu méléna fɔɔ kyɔ yi nya.

¹⁴ Lévi bɛn do kpen lɛ lé, Moizi ’ka tɛrɛ nɔ lɛ lo; wozé lé ke balebanfɛnu lé woo wo kyɛ blé Gakelebale Izraɛl lé Bale lɛ, wo nya, é a fe a lɛ fɛan zo a zo.

¹⁵ Moizi tɛrɛ buru do nɔ Rubɛnnu lɛ wo gɔnɔla ma gɔnɔla ma.

¹⁶ Wolé tɛrɛ sia Aroɛɛ lé ke Aanɔn gɔ la, a ma, ’bɛ valé fla lé ke gɔnu worona koo, fɛna dégélé faa lé ke Médéba sɔnɔ koo,

¹⁷ Esibɔn valé élé fla faa lé ke fɛna pɛblɛɛna koo, Dibɔn koo, Bamɔt‐Baal koo, Bɛt‐Baal‐Méɔn koo,

¹⁸ Jaas koo, Kédémɔt koo, Méfat koo,

¹⁹ Kiijataim koo, Sibima koo, Sérɛt‐Asakaa lé ke gɔnu worona gɔ ma koo,

²⁰ Bɛt‐Péɔɔ koo, Pizga lé gɔ kiénénu koo, Bɛt‐Jésimɔt koo,

²¹ fla faa lé ke fɛna pɛblɛɛna koo, Amoré munu nwiinzan Sioni lé éé plaan munu nwiin Esibɔn bɛ, alé tɛrɛ faa koo, woo lé. Moizi Sioni gyɛ guli nya, yee valé Madian lé mi blɛnnu, Évi valé Rékɛm valé Suu valé Uru valé Réba nya, wo nya; mi blɛnnu lé wo nwa Sioni zuo yé wo nyana alé tɛrɛ la, woo lé.

²² Munu lé Izraɛl wo gyɛ, wo va mi do lé ke yuɛzizan Béɔɔ be Balaam lé wa gyɛ gwɔun nya, a nya.

²³ Juudɛn yuu a Rubɛn lé munu glɛ nya. Rubɛnnu lé tɛrɛ lé ke bɛ, wo gɔnɔla ma gɔnɔla ma; wolé fla blɛn valé wolé fla kiénénu lé ke bɛ.

²⁴ Moizi tɛrɛ buru do nɔ Gadnu lɛ, wo gɔnɔla ma gɔnɔla ma.

²⁵ Wolé tɛrɛ lé ke Jaézɛɛ koo, Galaad lé flanu faa koo, Amɔn lé nénu lé tɛrɛ kunu fɔɔ yé é bɔ Aroɛɛ lé ke Raba yara, ’bɛ koo,

²⁶ é sia Esibɔn fɔɔ yé é bɔ Ramat‐Misipé valé Bɛtonim, é sia Maanaim fɔɔ yé é bɔ Débii glɛ la;

²⁷ gɔ worona Bɛt‐Aram koo, Bɛt‐Nimra koo, Sukɔt valé Safɔn koo, Esibɔn nwiinzan Sioni lé tɛrɛ pɔné koo, woo lé; Juudɛn yuu ɛ ke wo glɛ nya fɔɔ yé é bɔ Kinérɛt wɛyi gɔ mun ta, Juudɛn zi, yirinwanazia.

²⁸ Gadnu lé tɛrɛ lé ke bɛ, ’wo gɔnɔla ma gɔnɔla ma; wolé fla blɛnnu valé wolé fla kiénénu lé ke bɛ.

²⁹ Moizi Manasé lɛgɔnɔ do zé nɔ wo gɔnɔla ma gɔnɔla ma.

³⁰ Wolé tɛrɛ péli sia Maanaim; Bazan faa koo, Bazan munu nwiinzan Ɔg lé tɛrɛ koo, Jaii lé flanu lé ke Bazan tɛrɛ la koo, woo lé. Fla yɔ yaa lé.

³¹ Galaad tɛrɛ kunu do koo, Asitarɔt valé Édréi lé ke Ɔg lé flanu nya Bazan tɛrɛ la, ’bɛnu koo, wo wo nɔ Manasé be Makii benu lɛ, ’té ’bɛ benu a fié yé wa nɔ a palu do lɛ, wo gɔnɔla ma gɔnɔla ma.

³² Bléyian va lé Moizi a Moab lé fɛna pɛblɛɛna Juudɛn zi, Jériko yara yirinwanazia, é tɛrɛ guli fɛan zo, yee lé ke bɛ.

³³ Moizi ’ka tɛrɛ nɔ lɛ Lévinu lɛ lo; Gakelebale, Izraɛl lé Bale a wozé tɔnɔ nya, é a fe wo lɛ fɛan zo, a zo.