Jozué 11 - Kazambale lé Sebe Sauunu 1979

Wo guli blɛn dan Mérom sɔnɔ

¹ Asɔɔ nwiinzan Jabɛn we ’konu ’ma aan wo, é munu nwunvɔ Madɔn nwiinzan Jobab koo, Simrɔn nwiinzan koo, Akisaf nwiinzan koo,

² minwiinmunu lé wo ke yirinwana bɛbolazia gɔ ma valé fɛna pɛblɛɛ lé ke Kinérɛt yirinwana bɛyilazia valé gɔ worona valé Dɔɔ gɔnu nwiin yirivɔnazia, ’bɛnu faa koo,

³ Kanaannu lé wo ke yirinwanazia valé yirivɔnazia koo, Amorénu koo, Étinu koo, Férézinu koo, Jébusinu lé wo ke gɔ ma koo, Éévinu lé wo ke Eɛmɔn gɔ nyana ma Misipa tɛrɛ la koo, wo munu nwunvɔ wo va.

⁴ Wo bɔra, ’wo valé ’wolé sunyanu faa nya ’wo va; wa kiɛre bélé wɛyi gɔɔn ma nyéné lé wo ’ka bɔa a nɔnɔle lɛ lo, a zo, yé wisoonu valé goronu a wo va kiɛre kiɛre.

⁵ Minwiinzan ’konu fɛdona fe, yé wo faa zén ékeva ana, yé wo ’wolé sɔkɔnnu dɔ ékeva Mérom ’yinu sɔnɔ, gulidanle Izraɛl va we gi.

⁶ Gakelebale lé Jozué lɛ léé: Té i kana wo lee lo, naa, tɛlɛ, bléyi ’ko va, maa dan wo pa lɛ Izraɛl lee yé wo wo gyɛ. I dan wolé wisoonu gane zuo miinnu bɔi lɛ, yé i dan wolé goronu kyɛ ble lɛ.

⁷ Jozué go élé gulidanmunu faa nya é va, yé wo bɔra wo ma fiaa, Mérom ’yinu sɔnɔ, yé wo baa wo ta.

⁸ Gakelebale wo pa Izraɛl lee; wo wo gyɛ yé wo wo zuo bin fɔɔ yé wo bɔ Sidɔn blɛn ma, fɔɔ yé wo bɔ Misréfɔt‐Maim ma, fɔɔ yé wo bɔ Misipa pɛnguru gi yirinwanazia. Wo wo gyɛ fɔɔ wo do kpen ’ka vo lɛ lo.

⁹ Jozué a kɛlɛ wo lɛ fɛan zo lé Gakelebale a fe a lɛ, a zo; é wolé wisoonu gane zuo miinnu bɔi, yé é wolé goronu kyɛ ble.

Jozué tɛrɛ pɔnénu si

¹⁰ Jozué nɔla é pa gi aan wo, é Asɔɔ si yé é a nwiinzan gyɛ gwɔun nya bléyi duo nya. Asɔɔ a ana tɛrɛnu faa lé fla blɛnzan nya é kyɛn.

¹¹ Wa kele guli nya, yé wo ana fɛnu faa nɔ bale pale wo ma nya; fɛ faa lé woo flin‐é, a do kpen ’ka vo lɛ lo, yé wo Asɔɔ kyɛ ble.

¹² Jozué minwiinzannu ’konu valé wolé flanu si, yé é wo gyɛ gwɔun nya yé é wo nɔ bale pale wo ma nya, fɛan zo lé Gakelebale wuozan Moizi a béli dɔ, a zo.

¹³ Naa, flanu lé wo ke é pale gɔpanénu nwiin, Izraɛl ’ka wo do kyɛ ble lɛ lo, ’té dé é ’ka Asɔɔ do kpen lé Jozué a kyɛ ble, a nya lo.

¹⁴ Izraɛl lé nénu fla ’konu ta gulizarafɛnu faa valé winu si ’wozé nya, naa, wo munu faa gyɛ gwɔun nya fɔɔ wo wo gyɛ tata, yé wo ’ka mi do kpen vo lɛ é yuɛma lo.

¹⁵ We faa lé Gakelebale é wuozan Moizi béli dɔ a nya, yé Moizi Jozué béli dɔ a nya, Jozué a faa kɛlɛle lɛ sɔɔ; we faa lé Gakelebale a fe Moizi lɛ, Jozué ’ka a do kpen vo lɛ lo.

¹⁶ ’Bɛ zo lé Jozué tɛrɛ ’ko faa si; gɔ koo, yirinwana bɛyilazia faa koo, Gozɛn tɛrɛ faa koo, pɛngurunu koo, fɛna pɛblɛɛ koo, Izraɛl lé gɔ valé alé pɛngurunu koo, woo lé;

¹⁷ é sia gɔ ma tata lé é nwa Séii vazia fɔɔ yé é bɔ Baal‐Gad, Liban pɛnguru gi, Eɛmɔn gɔ nyana ma.

¹⁸ Jozué mɔn guli danna minwiinzanu ’konu va.

¹⁹ Dé é ’ka Éévinu lé fla Gabaɔn nya lo, fla do kpen ’ka yɔfalo fu nwa lɛ Izraɛl lé nénu lɛ lo; wo wo faa si guli danle nya.

²⁰ Naa, Gakelebale munu ’konu bli kɛlɛ plɛplɛ gulidanna Izraɛl va, alé wo gyɛle tata yé a nyanai ’ka zén wo ta lo we ma, yé wo wo nɔ bale pale wo ma nya, fɛan zo lé Gakelebale a fe Moizi lɛ, a zo.

²¹ ’Bɛ bléyi duo va, Anaknu lé wo ke Ébrɔn gɔ koo, Débii koo, Anab koo, Juda gɔ koo, Izraɛl gɔ koo, wona, Jozué go guli dan lɛ wo va, yé é wo nyaa tɛrɛ la. Jozué wo gyɛ tata, wo valé ’wolé flanu nya.

²² Anak mi do kpen ’ka vo lɛ Izraɛl lé nénu lé tɛrɛ la lo; Gaza koo, Gat koo, Azdɔd koo, wo vo wo ɛ na.

²³ Jozué ana tɛrɛ faa si, fɛan zo lé Gakelebale a fe Moizi lɛ, a zo. Yé Jozué yeé tɛrɛ nɔ Izraɛlnu lɛ wozé nya, tɛrɛ buru do do mi do do, wo bɛn ma bɛn ma. ’Bɛ zuo, tɛrɛ vo éboma, ’té guli ’ka lo.