Jozué 10 - Kazambale lé Sebe Sauunu 1979

Wo Amorénu gyɛ guli nya

¹ Jérusalɛm nwiinzan Adoni‐Sédɛk a ’ma léé, Jozué Ai si yé é a sɛrɛ tata, yé fɛan zo lé é a kɛlɛ Jériko valé a nwiinzan lɛ, a zo lé é a kɛlɛ Ai valé é nwiinzan lɛ, yé Gabaɔn munu yɔfalo fu nwa Izraɛl lɛ yé wo vo wo méléna.

² A we ma lé kana blɛn zén a gi. Gabaɔn a fla blɛn nya, fɛan zo lé minwiinzannu lé flanu a blɛn, a zo. É a blɛn é mini Ai la, yé alé gɔnénu bli ta a plɛplɛ.

³ Ébrɔn nwiinzan Oam koo, Jaamut nwiinzan Pi?-?réam koo, Lakis nwiinzan Jafia koo, Églɔn nwiinzan Débii koo, Jérusalɛm nwiinzan Adoni‐Sédɛk lé wo lɛ léé:

⁴ ’Ka da an va yé ’ka bɔ an va Gabaɔn gyɛle we gi, naa, wo yɔfalo fu nwa Jozué valé Izraɛl lé nénu lɛ, ’bɛzama.

⁵ Amorénu nwiinzan soru, Jérusalɛm koo, Ébrɔn koo, Jaamut koo, Lakis koo, Églɔn koo, wo nwiinzannu zén ékeva yé wo valé ’wolé sunyanu faa go; yé wolé sɔkɔnnu dɔ Gabaɔn sɔnɔ yé wo guli dan a va.

⁶ Gabaɔn munu wo munu nwunvɔ Gilgal sɔkɔnnu a fɛana, ana, a fena Jozué lɛ léé: Té i wuozannu vo ’wo saa lo, ’i da ko va é kele, ’i ko so we lee yé ’i bɔ ko va; naa, Amorénu nwiinzannu faa lé wo ke é nyanale gɔ nwiin wo zén ékeva ko ma.

⁷ Jozué koo, gulidanmunu faa koo, blitaplɛplɛ munu faa koo, wo nwa Gilgal.

⁸ Gakelebale lé Jozué lɛ léé: Té i kana wo lee lo, naa, maa wo nɔ i lɛ, yé wolé mi do kpen ’ka dan dɔ lɛ i ’lɛ lo.

⁹ Jozué si Gilgal aan wo, é ta faa wo é béli yé é bɔra wo ma fiaa.

¹⁰ Gakelebale wo kini ékema Izraɛl ’lɛ; yé Izraɛl wo gyɛ bélé winu zo Gabaɔn sɔnɔ, yé wo wo zuo bin zi lé é go loru Bɛt‐Orɔn vazia, a ta, yé wo go wo gyɛle nya fɔɔ Azéka valé Makéda.

¹¹ Bléyian va lé wo kini ékema Izraɛlnu ’lɛ yé wo zun zi lé é si Bɛt‐Orɔn, a ta, Gakelebale gɔlɛ blɛnnu dia wo ta fɔɔ Azéka yé wo ga; wo lé wo ga goowɔlɛlɛɛ nya wo kɛlɛ kiɛre é mini wo lé Izraɛlnu wo gyɛ gwɔun nya, wo ta.

Jozué yiri dɔ

¹² Naa, yian nya lé Gakelebale Amorénu nɔ Izraɛlnu lɛ, Jozué we fe Gakelebale lɛ, yé é lé Izraɛl yuɛ va léé: Yiri, ’i dɔ flii Gabaɔn ta, Yé bii, moné, ’i dɔ Ajalɔn gɔ worona ta.

¹³ Yé yiri dɔ flee yé moné vo fɛdona Fɔɔ munu ’wo lɛ gi pa ’wo nyanézannu ma. Wo ’ka we ’ko gyɛ lɛ Mi Tegele lé sɛbɛ gi loo? Yiri dɔ flee la worona Yé é ’ka vɔ lɛ é kele lo fɔɔ yé é bɔ yi do sɔnɔ.

¹⁴ Yi ’ko zo ’ka bɔ lɛ é vinin lo, yé ’bɛ zoɛ yi ’ka bɔ lɛ a zuo lo, Gakelebale mi dére ’ma, naa, Gakelebale Izraɛl ta guli dan, azama.

¹⁵ Yé Jozué valé Izraɛl faa nɔla é ziin Gilgal, sɔkɔnnu ke fɛana, ana.

Jozué Amorénu nwiinzan soru gyɛ

¹⁶ Minwiinzan soru vɔ flii yé wo yɔɔ gɔmaguru do gi Makéda.

¹⁷ Yé wa zuo fe Jozué lɛ léé: Minwiinzannu soru a é yɔɔle gɔmaguru do gi Makéda.

¹⁸ Jozué léé: ’Ka gɔlɛ blɛnnu burula, ’ka gɔmaguru lɛ tan, yé ’ka munu dɔ ana, yuɛ pale wo ta we gi.

¹⁹ Yé ’kaa, té ka dɔ lo, ’ka nyanézannu zuo bin, yé ’ka baa wo ta wo zuo zia, té ka wo vo, wo bɔ ’wolé fla lo, naa, Gakelebale, kalé Bale wo pa ka lee.

²⁰ Jozué valé Izraɛl lé nénu wo gyɛ wigyɛbɛ gi fɔɔ wo wo gyɛ tata aan wo, wo lé wo bɔ fla plɛplɛ ta wo si we gi,

²¹ yé munu faa da é ziin drɔɔ Jozué va sɔkɔn dɔna, Makéda, yé mi do kpen ’ka é ’léé fuo lɛ Izraɛlnu ma lo.

²² Yé Jozué léé: ’Ka gɔmaguru lɛ so, ka minwiinzannu soru bɔra, yé ’ka da wo nya an va.

²³ Wa kɛlɛ a zo, yé minwiinzannu soru lé wo wo bɔra gɔmaguru gi, Jérusalɛm nwiinzan koo, Ébrɔn nwiinzan koo, Jaamut nwiinzan koo, Lakis nwiinzan koo, Églɔn nwiinzan koo, wo go wo nya a va.

²⁴ Bléyian va lé wo dan minwiinzan ’konu nya Jozué va, Jozué Izraɛl munu faa laa, yé é lé gulidanmunu nwiinzannu lé, wo tawo a va, wo lɛ léé: ’Ka bié, ’ka ganenu dɔra minwiinzannu ’konu bɔrɔ la. Wo bié yé wo ganenu dɔra wo bɔrɔ la.

²⁵ Jozué lé wo lɛ léé: Té ka kana lo, yé té ka gi nyɛ é kini lo. ’Ka dɔ gligli yé ’ka bli ta dɔ plɛplɛ, naa, ’ko zo lé Gakelebale é dan a kɛlɛ lɛ ka nyanézannu lé ka guli daan wo nya, wo lɛ.

²⁶ A zuo, Jozué wo gyɛ yé wo ga; é wo dun yili soru ma, yé wo vo é dunle yilinu ma fɔɔ nyanadi pa.

²⁷ Yiri bɔ pɔrɔ la aan wo, Jozué lé wo lɛ léé, ’wo wo si yili la, yé ’wo wo vuli gɔmaguru lé wo ke é yɔɔle a gi kɔɔn, a gi, yé ’wo gɔlɛ blɛnnu dɔ gɔmaguru ’léé, yé wo vo ana fɔɔ kyɔ.

Jozué Amorénu lé tɛrɛ si

²⁸ A yi duo nya Jozué Makéda si, yé é a tamunu gyɛ gwɔun nya; minwiinzan koo, fla koo, mi faa lé ke ana koo, é wo gyɛ tata; é ’ka mi do kpen vo lɛ lo, yé fɛan zo lé wa kɛlɛ Jériko nwiinzan lɛ, a zo lé wa kɛlɛ Makéda nwiinzan lɛ.

²⁹ Jozué si Makéda yé é go Libina, ’té Izraɛl faa a a va, yé é guli dan a va.

³⁰ Gakelebale ’bɛ nɔ wo lɛ é ziin, é a pa Izraɛl lee, é valé é nwiinzan nya, yé é a tamunu gyɛ gwɔun nya; é ’ka mi do kpen vo lɛ lo, yé fɛan zo lé wa kɛlɛ Jériko nwiinzan lɛ, a zo lé wa kɛlɛ Libina nwiinzan lɛ.

³¹ Jozué si Libina yé é go Lakis, ’té Izraɛl faa a a va; é sɔkɔnnu dɔ wo sɔnɔ, yé é guli dan a va.

³² Gakelebale Lakis pa Izraɛl lee, wa si a yi fiézan nya, yé wa tamunu gyɛ gwɔun nya, fɛan zo lé wa kɛlɛ Libina lɛ, a zo.

³³ Yé Gézɛɛ nwiinzan Oram nwa bɔle Lakis va we ma. Jozué a gyɛ, yee valé élé munu nya, fɔɔ é ’ka mi do kpen vo lɛ lo.

³⁴ Jozué si Lakis yé é go Églɔn, ’té Izraɛl faa a a va; wo ’wolé sɔkɔnnu dɔ a sɔnɔ, yé wo guli dan a va.

³⁵ Wa si a yi duo nya, yé wa tamunu gyɛ gwɔun nya; Jozué wo gyɛ tata a yi duo nya, fɛan zo lé é a kɛlɛ Lakis lɛ, a zo.

³⁶ Jozué si Églɔn, yé é go Ébrɔn, ’té Izraɛl faa a va, yé wo guli dan a va.

³⁷ Wa si, yé wa tamunu gyɛ gwɔun nya, wo nwiinzan koo, a fla faa lé ke a wuo, wo tamunu faa lé wo ke ana koo, wo nya; Jozué ’ka mi do kpen vo lɛ lo, fɛan zo lé é a kɛlɛ Églɔn lɛ, a zo, yé é a tamunu faa gyɛ tata.

³⁸ Jozué nɔla Débii vazia, ’té Izraɛl faa a a va, yé é guli dan a va.

³⁹ Fla koo, a nwiinzan koo, fla faa lé wo ke a wuo koo, Jozué wo si; wo wo tamunu gyɛ gwɔun nya, yé mi faa lé wo ke ana wo wo gyɛ tata, é ’ka fɛ do kpen vo lɛ lo; fɛan zo lé é a kɛlɛ Ébrɔn koo, Libina valé é nwiinzan koo, wo lɛ, a zo duo lé Jozué a kɛlɛ Débii valé é nwiinzan lɛ.

⁴⁰ Jozué ana tɛrɛlamunu faa gyɛ, gɔ nwiin munu koo, yirinwana bɛyilazia munu koo, fɛna dégélé munu koo, gɔpanénu nwiin munu koo, woo lé, yé é wo nwiinzannu faa gyɛ; é ’ka mi do kpen vo lɛ lo, yé fɛnu faa lé woo flin‐é é wo gyɛ tata, fɛan zo lé Gakelebale Izraɛl lé Bale a fe, a zo.

⁴¹ É sia Kadɛs‐Baanéa yé é bɔ Gaza, Jozué ana munu faa gyɛ; é Gozɛn tɛrɛ ta munu faa gyɛ fɔɔ yé é bɔ Gabaɔn.

⁴² Minwiinzannu ’ko valé ’wolé tɛrɛnu, Jozué wo faa si bléyi do nya, naa, Gakelebale, Izraɛl lé Bale Izraɛl ta guli dan, ’bɛzama.

⁴³ Yé Jozué nɔla é ziin Gilgal, sɔkɔn dɔna, ’té Izraɛl faa a a va.