Jozué 1 - Kazambale lé Sebe Sauunu 1979

Jozué kɛlɛ zilɛzan nya

¹ Gakelebale wuozan Moizi gale zuo, Gakelebale lé Moizi wuozan Nɛn be Jozué lɛ léé:

² An wuozan Moizi ga; sin, ’i nwa; bii valé munu ’konu faa, ’ka Juudɛn ’ko kini, gole we gi tɛrɛ lé maa a nɔ Izraɛl lé nénu lɛ, a ta.

³ Fɛ faa lé ka gane dɔraan ana, maa ana nɔ ka lɛ, fɛan zo lé maa a fe Moizi lɛ, a zo.

⁴ Tɛrɛ lé é dan kɛlɛ lɛ kazé nya, é sia nyéné saa lé fɛna valé Liban fɔɔ yé é bɔ Yufrat yuu blɛn ma, Étinu lé tɛrɛ faa lé, fɔɔ yé é bɔ wɛyi blɛn ma yirivɔnazia.

⁵ Mi do kpen ’ka dan dɔ lɛ i’lɛ i yuɛma bléyi faa va lo. Maa dan kɛlɛ lɛ i va, fɛan zo lé maa kɛlɛ Moizi va, a zo; maa ’ka dan i vo lɛ i do lo, maa ’ka dan daan lɛ i ma lo.

⁶ ’Ibo dɔ gligli, yé ’i bli ta dɔ plɛplɛ, naa, tɛrɛ lé maa a fe ka tranu lɛ anbo ’nyɔɔnle nya lé maa dan a nɔ lɛ wo lɛ, mi lé é dan munu ’ko nyana lɛ a ta, bii ɛ ke a nya.

⁷ ’Ibo dɔ gligli é wo, yé ’i bli ta dɔ plɛplɛ, yé ’i we kɛlɛ yarapalale nya bélidɔwe lé an wuozan Moizi a nɔ i lɛ, a yɛrama; té i nɔla, dé i bɛyilazia léé, dé i bɛbolazia léé, ana lo, we faa lé bé kɛlɛle pélisia, a ’wuo plale we gi.

⁸ Té bélidɔwe lé sɛbɛ ’ko é si i lɔ ma baa lo; bé bɔrɔ i bɔn‐in bladi nyanadi, wenu faa lé wa gyɛ a gi, ilé wo kɛlɛle yarapalale nya we ma; ’bɛ zo lé, we lé bé kɛlɛle pélisia, a nyian é dan wo lɛ yé i dan a ’wuoplana ye lɛ.

⁹ Maa ’ka a fe lɛ i lɛ léé, ’ibo dɔ gligli yé i bli ta dɔ plɛplɛ, loo? Té i kana lo; té i gi nyɛ ’é kini lo, naa, Gakelebale, ilé Bale a i va, we faa lé i dan a kɛlɛle pélisia lɛ, a gi.

¹⁰ Jozué lé munu nwiinzannu lɛ léé:

¹¹ ’Ka gié kɔn faa ’léé ma, ’ka fe munu lɛ léma: ’Ka fɛblele ma’lɛrɛ ma, é vo yi yaa yé ka dan Juudɛn ’ko kini lɛ, tɛrɛ lé Gakelebale, kazé Bale a nɔ ka lɛ kazé nya, a sile we gi.

¹² Rubɛnnu koo, Gadnu koo, Manasé bɛn lɛgɔnɔ do koo, Jozué lé wo lɛ léma:

¹³ We lé Gakelebale wuozan Moizi a fe ka lɛ, a sele ’é dɔ ka gi ma. É léé: Gakelebale, kazé Bale flinle nɔ ka lɛ, yé é tɛrɛ ’ko nɔ ka lɛ.

¹⁴ Ka nanu koo, kalé né kiénénu koo, kalé trubɛnu koo, wo dan vo lɛ tɛrɛ lé Moizi a nɔ ka lɛ Juudɛn ’lɛ zia ’ko, a ta; naa, ’kaa nyanagɔnénu faa, ka dan gié lɛ ka bwenu ’lɛ gulidanfɛnu nya ka lee, yé ka dan bɔ lɛ wo va,

¹⁵ fɔɔ, yé Gakelebale é flinle nɔ wo lɛ, bélé fɛan zo lé é flinle nɔ ka lɛ, a zo, yé wo nyana kli tɛrɛ lé Gakelebale, kazé Bale a nɔ wo lɛ, a ta. ’Bɛ zuo faa yé ka dan da lɛ é ziin tɛrɛ lé Gakelebale wuozan Moizi a nɔ ka lɛ Juudɛn ’lɛzia, yirinwanazia, a ta, yé ka nyana ana.

¹⁶ Wa zi pa Jozué lɛ léma: We faa lé bé fe ko lɛ, ko dan a kɛlɛ lɛ, yé dé i ko nwunvɔ fɛofɛana, ana lé ko dan go lɛ.

¹⁷ Ko dan i lɛdɔ lɛ a ma tegele fɛan zo lé ko Moizi lɛdɔama, a zo. Naa, Gakelebale izé Bale ’é kɛlɛ i va ma, fɛan zo lé é kɛlɛ Moizi va, a zo ma.

¹⁸ Mi faa lé wo dan sɔn vɔ lɛ i dére ma, yé wo ’ka i lɛdɔ lɛ a ma we faa lé bé fe wo lɛ, a gi lo, wo dan ga dɔ lɛ wo nwiin. ’Ibo dɔ gligli é wo, yé ’i bli ta dɔ plɛplɛ.