Jonas 4 - Kazambale lé Sebe Sauunu 1979

Jonas bli fli yé Bale nyanai zén

¹ We ’ko ’na Jonas ma kaii, yé a bli fli.

² É we ’ko laa Gakelebale lee yé é léé: Gakelebale, wean maa a fé turu, ’té maa a tan anlé tɛrɛ la, yeean é ke ’ko loo? Amalé é dɔ an gi léé, an go yɔɔ lɛ Taasis. Bii a Bale lé é mi mawe dɔɔ, ’té a nyanai éé zén‐é, ’té a bli ’ka flian é kele lo, ’té zin a a gi kiɛre, ’té éé bli nɔlaan we tɔntɔn kɛlɛle mi lɛ ma, a nya.

³ Sin, Gakelebale, ’i an si; naa, an gale fila vɔ é mini an vole é yuɛma ta.

⁴ Gakelebale a zi pa a lɛ léé: I bli flile a é zimaa?

⁵ Yé Jonas si fla, yé é nyana yirinwanazia fla gini ma. É faa bo ana, yé é nyana a furɔ wuo, we lé é dan bɔ lɛ fla ’ko ta, a yele we ma.

⁶ Gakelebale zoolékuo gɔn do bɔ, yé a kwɛɛ vɔ alé faa ta, yé a furɔ kɛlɛ Jonas nwiin, a bli kɛlɛle drɔɔ we ma. Zoolékuo kwɛɛ ’ko, é Jonas gi nana é baba.

⁷ Naa, ’bɛ é tu kini, bladi tutu, Gakelebale pooné do pa zia yé é zoolékuo suni ble, yé é ga.

⁸ Yiri nwale nya, Gakelebale fu kyɛzan si yirinwanazia yé é gié. Yiri Jonas ’wuo gyɛ yé é dia yé é zɔrɔ. É gale ma laa, a fele nya léé: An gale fila vɔ é mini an vole é yuɛma ta.

⁹ Gakelebale lé Jonas lɛ léé: I bli flile zoolékuo kwɛɛ gale we ma, é a é zimaa? É a zi pa a lɛ léé: Dé an bli fli fɔɔ yé an ga, ’bɛ a é zima.

¹⁰ Gakelebale lé a lɛ léé: Zoolékuo kwɛɛ lé i ’ka nyané do kpen ble lɛ a ma lo, ’té i ’ka a vɔ lɛ lo, ’té é tin yi do kpen nya, yé é ga ana yi do nya bɛ, dé ’bɛ we ’na i ma ’naan,

¹¹ yé Ninive lé ke fla blɛn nya, ’té mi baa yɔ yaa lé wo ’ka wo bɛyi valé wo bɛbo dɔɔa lo, ’té wo ke ana bɛ, wo valé wi ’léé kiɛre nya, an nyanai ’ka zén‐é ’bɛnu ta loo?