Jonas 2 - Kazambale lé Sebe Sauunu 1979

Jonas bazoro

¹ Gakelebale da pɔ blɛn do nya Jonas minile we ma. Yé Jonas yi kɛlɛ pɔ bɔn gi yiéyi yaa béli yaa.

² Jonas ke aan wo pɔ bɔn gi, é bazoro Gakelebale élé Bale lɛ,

³ yé é léé: Anlé klebleyi nya an Gakelebale tɔ laa, Yé é an dére ’ma. Maa a bléyian va gamunu nyanana wɔlɛ ma, an siaa, Yé i an dére ’ma.

⁴ I an vuli guru lé wo ’ka a wɔlɛ ma yé lo, a gi, wɛyi wɔlɛ ma. ’Yiyoro plɛplɛnu an zi lɛ sɔɔ, ’Yi an ta pla yé ’yinwalenu gié an ta.

⁵ Maa léé: Wo an si i ma baa, Naa, duowo, maa dan ilé kɔn sauun ye lɛ é ziin.

⁶ ’Yinu an ta pla fɔɔ yé wo an gyɛ. Guru lé wo ’ka a wɔlɛ ma yé lo, é an ta yɔɔ. Gyannu diri an ’wuo zi,

⁷ An zun fɔɔ gɔnu pun ma. Tɛrɛ é lɛ tan an ta bléyi faa zé nya, Naa, i an bɔra guru gi é yuɛma. Gakelebale, anlé Bale!

⁸ Bléyian va lé anboen fuu si é ta, Gakelebale sele dɔ an gi, Yé anlé bazoro dére go fɔɔ i va, Ilé kɔn sauun gi.

⁹ Munu lé wo ’wobo yere boamiyili ma, Wo ’wobo si mi lé éé zin kɛla wo lɛ, a ma.

¹⁰ Dé é a maa nya, maa dan sarakanu bo lɛ i lɛ bɔvɔdére nya; Balekundérenu lé maa wo fe, maa dan wo lɛ sɔɔ lɛ; Sile we gi éé sié Gakelebale ɛ va.

¹¹ Gakelebale we fe pɔ lɛ, yé pɔ féé Jonas nya gɔ la.