Joɛl 3 - Kazambale lé Sebe Sauunu 1979

Bale é dan bɛnnu lé we ble lɛ

¹ Naa, ka ye, ’bɛ yinu la, ’bɛ bléyi va, Juda munu valé Jérusalɛm munu lé wo go wo nya luu gi, dé an da wo nya wo pa gi,

² An dan bɛnnu faa zén lɛ ékeva, Yé maa dan wo zun lɛ Jozafat lé gɔ worona; Anlé munu Izraɛl, anlé tɔnɔ lé we ma lé, Maa dan wolé we ble lɛ ’bɛna. Wo anlé munu sɔɔla bɛnnu gi, Yé wo anlé tɛrɛ guli, azama.

³ Wo ’munnu zun anlé munu ma; Yé wo pɛniɛnu nɔ bɔrɔdɛ le ma, Yé wo blɛnnu dan dɔrɔ va yé wa mini.

⁴ Tii valé Sidɔn munu, ’kaa valé Filisitinu faa, Ka a a va léé, ka mɛ kɛlɛ an lɛɛ? Ka a a va léé, ka we lɛgi pa an maa? Dé é sɔ ka lɛ léé, ka we lɛgi pa an ma, Maa dan kalé we lɛgi pale nɔla lɛ ka ma é kele.

⁵ Ka anlé gɔɔlifu valé anlé kyan si, Yee valé fɛnu lé wo we ke an lee, ’Té wo ke é nɔnɔmi é baba, wo nya, Yé ka go wo nya kalé yobangi?-?kɔnnu gi.

⁶ Ka Juda valé Jérusalɛm munu dan Javan munu lee, Léé, ’wo si wolé tɛrɛ ma baa.

⁷ Ka ye, fɛana lé ka wo dan, maa dan wo si lɛ ’bɛna yé an da wo nya, Yé an dan wo lɛgi pa lɛ ka ma.

⁸ Maa dan ka benu valé ka lunu dan lɛ Judanu lee, Yé wo dan wo dan lɛ Sabé munu lé wo ke tɛrɛ baa la munu nya, wo lee; Naa, Gakelebale ɛ fe.

⁹ ’Ka we ’konu zana dɔɔ bɛnnu va. ’Ka ma’lɛrɛ gulidanle we ma. ’Ka nyanazannu vuo. Gulidanmunu faa ’wo bié ma; ’wo gɔ gié ma.

¹⁰ ’Ka kalé gwanéwɔlɛnu foli gwɔunnu nya ma, ’Ka kalé sɛnblanu foli dinnu nya. Mi tɔɔtɔɔ a fe léma: Maa a plɛplɛ.

¹¹ Ko zi bɛnnu, ’ka ta kɛlɛ kelekele, ka faa ’é da, Yé ’ka zén ékeva. Gakelebale, ilé nyanazannu ’é zun ana ma.

¹² Bɛnnu ’é vuo, yé ’wo gɔ gié Gɔ worona lé wa laama Jozafat, a vazia ma. Ana lé maa dan nyana lɛ ka zi bɛnnu faa lé we blele we ma.

¹³ ’Ka kun kɔblané ma; Naa, ’sa tana. Dɔrɔporo borona a é fanle, ’Ka da, ’ka a zɔn ka gane nya; Dɔrɔyi zéngikana zana a ma, Wolé glawe a kiɛre, azama.

¹⁴ Mi gu blɛn lé. Mi wuru é wuru gu blɛn lé. Wa gɔworona lé wa laama weblena, ana; Naa, Gakelebale lé yi bɔ é pu Weblena gɔ worona.

¹⁵ Gunu é dan dɔra lɛ yiri valé moné yara, Yé monénénu é dan daan lɛ bile ma.

Bale é dan élé munu drɔɔ vo lɛ

¹⁶ Gakelebale dére a wena Siɔn bélé golizra zo, ’Té éé wé Jérusalɛm. Tɛrɛ valé la ma éé nyɔɔn‐an, Naa, Gakelebale a élé munu yɔɔna nya, É a Izraɛlnu vɔzizan nya.

¹⁷ Yé ka dan a gi dɔɔ lɛ léé, maa a Gakelebale, kalé Bale nya, ’Té an nyanaan anlé gɔ ’lɛzan Siɔn nwiin. Jérusalɛm é dan kɛlɛ lɛ é tinle Yé bɛnnu ’ka dan gié lɛ ana é dɛrɛ lo.

¹⁸ ’Bɛ bléyi va, dɔrɔ dɛrɛ é dan si lɛ gɔnu gi, ’té éé yoroan, Dirinyɔyi é dan si lɛ gɔpanénu gi ’té éé yoroan, Yé ’yi é dan kɛlɛ lɛ Juda ’yiyorona faa gi; ’Yibɔna do é dan fɔn lɛ Gakelebale lé kɔn gi, Yé alé ’yinu é dan gɔworona lé wa laama Sitim, ana vo lɛ drɔɔdrɔɔ.

¹⁹ Éjipiti tɛrɛ faa é dan vo lɛ é ’bin nya, Édom é dan vo lɛ bwi nya, Glawe lé wa kɛlɛ Judamunu lɛ Yé wo weanwiinlo munu nyɛ zana wolé tɛrɛ la, a we ma.

²⁰ Naa, munu é dan vo lɛ yifaama Juda tɛrɛ la, Yé mi kulu é kulu é dan vo lɛ Jérusalɛm.

²¹ Wo nyɛ lé wa zana, yé maa ’ka tan a lɛgi pa lɛ lo, maa dan a lɛgi pa lɛ, Yé maa, Gakelebale é dan nyana lɛ Siɔn.