Joɛl 2 - Kazambale lé Sebe Sauunu 1979

Bale lé yi

¹ ’Ka béli fɛn Siɔn; A dére zuogi ’é we anlé gɔ plɛplɛ nwiin ma. Tɛrɛlamunu faa ma ’é nyɔɔn ma. Naa, Gakelebale lé yi a dana; naa, é bɔ é pu.

² Yi ’ko la, béli éé taan yé gunu éé dɔraan; Yi ’ko la, lati éé tuaan, yé lolu éé vɔa; É dan bélé tukinile zo yé é zén gɔnu ta, Migɔnɔ lé wo ke kiɛre, ’té wa plɛplɛ, woo lé; Wo ’ka tan wo zoɛ munu ye lɛ é vinin lo, Yé wo ’ka dan wo zoɛ munu ye lɛ wo zuo monomono lo.

³ Kyɛ lé éé fɛnu blé é a wo ’lɛ, Yé kyɛnɛnɛ lé éé fɛnu waan, ’bɛ a wo zuo; É vinin ’té tɛrɛ a bélé Édɛn zianféi zo, A zuo tɛrɛ la vo yuoyuo, Fɛ do kpen ’ka soo wo lee lo.

⁴ Dé i wo ye, wa bélé wisoonu lé, Woo vlanburuwo bélé wisoo ta gulidanmunu zo.

⁵ Wo vun éé wé bélé gulidangoronu lé woo vlanburuwo Gɔnu nwiin, wo vunwele zo, Bélé kyɛnɛnɛ lé é ke ’sapɛɛ kyɛblena, A vunwele zo. Wa bélé gulidan sunyanu lé wo ke ’wo ma’lɛrɛna Gulidanle we gi, wo zo.

⁶ Bɛngɔnɔnu ma éé nyɔɔn‐an wo ’lɛ, Munu faa yara éé fuolaan.

⁷ Woo bon‐ɛn‐an bélé gulidanmunu zo, Woo gɔrɔnu giéan bélé gulimazannu zo. Wo faa do do woo goo wo ’lɛzia tegele, ’Té wo ’ka zi somaan lo.

⁸ Wo ’ka wo ke nyunuan pelo, Wo faa do do é vo ’wo dɔna tegele; Woo giéan sawɔlɛnu méléna, ’Té wo ’ka dɔa lo.

⁹ Woo nwɛɛn‐an fla, Woo vlanburuwo fla zi gɔrɔnu bɔrɔ la, Woo vɔa kɔnnu nwiin, Woo wɔraan fɛnɛtinu la bélé kyeenwozan zo.

¹⁰ Tɛrɛ ma éé nyɔɔn‐an wo ’lɛ, Lanu ma éé nyɔɔn‐an, Gunu éé dɔraan yiri valé moné yara, Monénénu éé daan bile ma.

¹¹ Gakelebale éé dére fé élé sunyanu lɛ, Naa, wo nyanana a blɛɛn. Mian éé a dére tawe kɛla, ’bɛzan a plɛplɛ; Naa, Gakelebale lé yi a blɛɛn; éé di kinié mi gi. De ɛ bɔa dɔle lɛ ’bɛ yi laa?

Bale munu laa léé, ’wo bli nɔla

¹² Gakelebale léma: Sin, ’Ka da an va ka bli faa nya é ziin, Lɔrɔsɔnlenu koo, wuvɔlenu koo, siaalenu koo, wo nya.

¹³ Té ka sɔnu fia lo, Naa, nyɛ ’é ’wii ka zuru va, Yé ka da Gakelebale, kalé Bale va é ziin, Naa, é a mi mawe dɔɔzan valé nyanaizénzan nya; A bli ’ka flian é kele lo, yé alé zin a blɛɛn, Yé we tɔntɔnnu lé éé a paan munu lɛ zia, éé bli nɔlaan wo kɛlɛle ma.

¹⁴ Dé é dan da lɛ ka va é ziin, yé é bli nɔlaa? Dé alé drɔɔvole é dan vo lɛ a pa gii? Dé é dan Gakelebale, kalé Bale lé blɛnu valé baleban’yinu vo lɛ é pa gii? De ɛ ’bɛ gi dɔɔ?

¹⁵ ’Ka béli fɛn Siɔn; ’Ka lɔrɔsɔnle valé zén‐ékeva plɛplɛ zana dɔɔ.

¹⁶ ’Ka bɛngɔnɔnu zén ékeva, ’ka zén‐ékeva sauun kɛlɛ, ’Ka mi segelenu zén ékeva, ’Ka nénu zén ékeva, Dé é a nyɔ ma nénu nyaoo, woo lé é ziin. Lesizan ’é bɔra élé kɔn gi ma, Yé bosizan ’é bɔra é yiina ma.

¹⁷ Balebanmunu lé Wo ke Gakelebale wuozannu nya, ’Wo wuvɔ ’kɔn lɛɛ valé balebanna worona, Yé ’wa fe léé: Gakelebale, ’i nyanai zén ilé munu ta. Té i yaragyɛwe bɔ ilé munu ma lo, Té bɛnnu é we nana wo ma lo. Mɛmalé wa fé bɛngɔnɔnu méléna léé: Wolé Bale a kyɛɛn?

Bale tɛrɛ kɛlɛ fɛdɔtɛrɛ nya é ziin

¹⁸ Gakelebale a maawona élé tɛrɛ lé we ma, A nyanai éé zén‐é élé munu ta.

¹⁹ Gakelebale a zi vɔ élé munu lɛ léé: Ka ye, maa dan ’sa koo, Dɔrɔ dɛrɛ koo, nyɔnɔ koo, wo pa lɛ ka lɛ zia, Yé ka dan kan lɛ wo nya, Yé maa ’ka dan ka gyɛ lɛ yara nya bɛnnu méléna é dɛrɛ lo.

²⁰ Ka nyanézan lé éé sié yirinwana bɛbolazia, maa dan a bin lɛ ka ma baa, Maa dan a bin lɛ yé é go tɛrɛ lé a nyɔnɔ ’ka lo, ’té mi do kpen ’ka ana lo, ana. Maa dan alé gulizilɛzannu bin lɛ fɔɔ yé wo bɔ yirinwanazia wɛyi va; Maa dan zi zuo sunyanu bin lɛ é ziin fɔɔ, yé wo bɔ yirivɔnazia wɛyi ta; Wo gin é dan nwɛɛn lɛ, Yé wo goi é dan sɔɔla lɛ fɛfaana; Wo we blɛnblɛnnu kɛlɛ, azama.

²¹ Tɛrɛ, té i kana lo, Yéri ’é pa i lɔ ma, yé i gi ’é nana ma. Naa, Gakelebale éé we blɛnblɛnnu kɛla.

²² Bwigiwinu, té ka kana lo, Naa, lu tolu é dan bɔ lɛ bwi gi fɛna dégélé na. Naa, yilinu é dan ’wo poronu baa lɛ, Wo dan tɔnɔ ye lɛ bɔrɔyili valé dɔrɔféi ma.

²³ Yé ’kaa Siɔn munu, yéri ’é pa ka lɔ ma, yé ka gi ’é nana Gakelebale, kalé Bale lé we ma ma, Naa, é dan lɛɛ da lɛ ka lɛ lɛɛ dabléyi va, Yé é dan lɛɛ vininzan valé lɛɛ voélazan da lɛ lɛɛ dabléyi va, Éé a kɛla é vinin fɛan zo, a zo.

²⁴ ’Sa sunwonanu é dan fan lɛ ’sa nya, Yé kana blɛnnu é dan zana lɛ a ma dɔrɔ dɛrɛ valé nyɔnɔ nya.

²⁵ Zalogan koo, nanikpénnɛ koo, yuuwɔlɛnu koo, flɛflɛ koo, Wa anlé sunya gu blɛn lé maa a pa ka ma zia, a nya, Yé féifɛnu lé wa ble lɛɛ kiɛre gi, Maa dan wo lɛgi nɔ lɛ ka lɛ.

²⁶ Ka dan fɛ ble lɛ yé ka dan kan lɛ, Yé ka dan Gakelebale, kalé Bale tɔ ma gyɛ lɛ. Yee ɛ dan we blɛnnu kɛlɛ lɛ ka lɛ, Yé yara ’ka dan anlé munu gyɛ lɛ é dɛrɛ lo.

²⁷ Yé ka dan a gi dɔɔ lɛ léé, maa a Izraɛl munu va. Maa ɛ ke Gakelebale, kalé Bale nya, yé bale bɛ do kpen ’ka ana lo. Yé yara ’ka dan anlé munu gyɛ lɛ é dɛrɛ lo.

Bale lé yi

²⁸ ’Bɛ zuo, an dan an Léli zén lɛ mi faa ta; Ka benu valé ka lunu é dan balelawe fe lɛ, Kalé mi kwanu é dan nyɛ gyɛ lɛ, Yé kalé pɛniɛnu wo dan wenu ye lɛ yuɛzi gi.

²⁹ ’Bɛ yi ’konu la, an dan an Léli zén lɛ Ka wuogɔnénu valé ka wuolomu ta,

³⁰ Yé an dan we blɛnblɛnnu kɛlɛ lɛ la gi valé tɛrɛ la, Nyɛ koo, kyɛ koo, kyɛgoi pɔrɔlɔ koo, wo nya;

³¹ Yiri é dan nɔla lɛ gunu nya, Yé moné é dan nɔla lɛ nyɛ nya, Gakelebale lé yi bɔle ’lɛ, Yi blɛn lé éé di kinié mi gi, yee lé.

³² Yé ’bɛ bléyi va, dé miomian Gakelebale tɔ laa, é dan si lɛ we gi. Yé sile we gi é dan kɛlɛ lɛ Siɔn gɔ nwiin valé Jérusalɛm, Gakelebale a fe fɛan zo, a zo. Yé munu lé Gakelebale wo si a va, wo dan kɛlɛ lɛ siéwegimunu va.