Joɛl 1 - Kazambale lé Sebe Sauunu 1979

Munu wuvɔ wolé féifɛnu sɛrɛle we ma

¹ Gakelebale a fe Pétuɛl be Joɛl lɛ léé:

² ’Kaa mi segelenu, ’ka tɔné dɔ we ’ko lɛ. ’Kaa tɛrɛlamunu faa, ’ka an ban ka tɔné nya. We ’ko zoɛ do ’ka tan bɔ lɛ ka va loo? Taa, é ’ka tan bɔ lɛ ka tranu bléyi va loo?

³ ’Ka a zuo fe kalé nénu lɛ, Yé kalé nénu woé zuo fe ’wolé nénu lɛ ma, Yé ’bɛnu lé nénu woé zuo fe woé kulunu lɛ ma.

⁴ Fɛ lé zalogan a vo, nanikpénnɛ a ble; Fɛ lé nanikpénnɛ a vo, yuuwɔlɛnénu a ble; Fɛ lé yuuwɔlɛnénu a vo, flɛflɛ a ble.

⁵ ’Kaa nwɛgyɛzannu, ’ka vuo, ’ka wuvɔ. ’Kaa dɔrɔminizannu, ka faa ’é dunnu, Naa, wo nwɛ dɛrɛ so ka lɔ ma, azama.

⁶ Migɔnɔ lé wo nɔnɔ ’léé ’ka lo, ’té wo ke plɛplɛ, Wo da ’wii lɛ anlé tɛrɛ la, Wo suiɛnu a bélé golizra suiɛnu zo, Wo puo a bélé golizra tina puo zo.

⁷ Wo anlé dɔrɔféi sɛrɛ tata, Wo anlé bɔrɔyilinu bɔi térétéréné, Wo wo bɛnu bɔi yé wo wo kɔlɛnu so a ma. Dɔrɔyilinu bɛnu faa vo fu.

⁸ ’I wuvɔ, blɛnzan lé éé bɔlɔ zén‐é ’é ta, ’Té é é boronéla bwɛ wuvɔa, a zo.

⁹ Blɛ valé baleban’yi ’ka é dɛrɛ Gakelebale lé kɔn gi lo; Balebanzannu, Gakelebale wuozannu a gyɛbona.

¹⁰ Féinu sɛrɛ, ’Sa sɛrɛ tata, Amalé tɛrɛ vo é pla. Dɔrɔ dɛrɛ ’ka lo, yé nyɔnɔ ’ka lo.

¹¹ Féifɛnu faa sɛrɛ, Amalé di blɛn kini nyanamapamunu gi, yé dɔrɔféi pazannu a dunnuna Buruwɔlɛ valé sɔnmlén lé we ma.

¹² Dɔrɔyililaanu tana, Bɔrɔyilinu kwéé, Grénadéyilinu koo, yɔnu koo, pɔmeyilinu koo, Féiyilinu faa koo, wo faa yuru, Ginanale nyaa munu méléna.

¹³ Balebanzannu, ’ka doa dɔ yé ’ka wuvɔ; ’Kaa balebanna nyanamapazannu, ’ka wuvɔ. Anlé Bale wuozannu, ’Ka tu kini bɔlɔ nya é zénle ka ta. Naa, blɛnu valé baleban’yinu ’ka é dɛrɛ kalé Bale lé kɔn gi lo.

¹⁴ ’Ka lɔrɔsɔnle valé zén‐ékeva plɛplɛ zana dɔɔ. ’Ka mi segelenu valé tɛrɛ ’ko la munu faa zén ékeva Gakelebale, kalé Bale lé kɔn gi, Yé ’ka siaa Gakelebale lɛ.

¹⁵ Aa, mɛ zoɛ bléyi ɛ bɔ ’koo? Naa, Gakelebale lé yi bɔ é pu. É dan bélé wenaané blɛn lé Plɛplɛfaazan a pa zia, a zo.

¹⁶ Wo ’ka fɛblele sia lɛ ko wuo loo? Ginanale valé ginanale blɛn ’ka san lɛ kolé Bale lé kɔn gi loo?

¹⁷ Féifɛ wɔlɛnu ga tɛrɛ wuo; Boonu vo é koro nya, Fɛ téénanu sɛrɛ tata, Naa, ’sa do kpen ’ka lo, azama.

¹⁸ Winu a dunnuna kaii, Di kini dirinu gi, Lublena ’ka wo lee lo, azama. Yé ’blanu é ziin, ’bɛnu a kle blena.

¹⁹ Gakelebale, bii lɛ lé an siaan. Fɛna pɛblɛɛna faa kyɛ ble, Yé bwi gi yilinu faa kyɛ ble.

²⁰ Bwigiwinu é ziin, wa wuvɔna i lɛ, Naa, ’yiyoronu faa béli, Yé fɛna pɛblɛɛna faa kyɛ ble.