WENÉNÉ LE JAN A GYE (Évangile selon Jean) 9 - Kazambale lé Sebe Sauunu 1979

Mi lé wa yaa é yuɛ ’wiile nya, Jézu a béli

¹ Jézu a giéna aan wo, mi lé wa yaa é yuɛ ’wiile nya, é a ye.

² Yé a zuomunu we laa a lee léé: Kozan, mɛmalé wo mi ’ko yaa é yuɛ ’wiile nyaa? Abo lé wenyané ma lé laa, taa, a bu valé a ti lé wenyané ma léé?

³ Jézu a zi pa wo lɛ léé: Yee koo, é yaamunu koo, wolé wenyané ma kaan lo, naa, Kazambale panyanama a fɛan zo, yé munu a ye mi ’ko lé we ma, amalé é kɛlɛ.

⁴ Bléyian va lé fɛna a é kinile, mi lé é an pa zia, é a lé maa alé nyanama pa; béli a dana tan lɛ, ’té mi do kpen ’ka bɔa nyanama pale lɛ lo.

⁵ Bléyian va lé maa ke tɛrɛ la ’ko, maa a tɛrɛlamunu lé san nya.

⁶ We ’ko fele zuo, é ’léli zana tɛrɛ va, yé é voli kɛlɛ ’é ’léli nya. ’Bɛ zuo, yé é voli ’ko pa yuɛwiizan yuɛnu ta,

⁷ yé é lé a lɛ léé: I go zuru Siloé ’yiguru va, ’bɛ gi léé, pale zia. Yé é go ana yé é zuru, yé é nɔla ’té a yuɛ a é fuole wéiin.

⁸ A bɔlunu valé munu lé wa dɔɔ é kyɛn doropazan nya, wo léé: Mi lé é ke turu é nyanale doro pana bɛ, yeean é ke bɛ loo?

⁹ Mi kenu léé: Yee lé. Yé a kenu léé: Gba, a bɔmazan lé. Yé yeebozen léé, ’yee lé.

¹⁰ Yé wo lé a lɛ léé: É kɛlɛ kaa yé i yuɛ fuoo?

¹¹ Yé é léé: Mi lé wa laama Jézu, yee ɛ voli kɛlɛ yé é a pa an yuɛ ta, yé é lé an lɛ léé: ’I go zuru Siloé ’yiguru va. Yé an go ana, yé an zuru, yé an yuɛ fuo.

¹² Yé wo lé a lɛ léé: Mi ’ko a kyɛɛn? Yé é léé: Maa ’ka a gi dɔɔa lo.

Farizimunu we ’ko gi kuli

¹³ Mi lé a yuɛ ke turu é ’wiile, wo go a nya Farizimunu va.

¹⁴ Yian nya lé Jézu voli kɛlɛ yé é a yuɛ fuo, é a flinyi do nya, azama.

¹⁵ Yé Farizimunu ’wozé laa a lee léé: É kɛlɛ kaa yé i yuɛ fuoo? Yé é lé wo lɛ léé: É voli pa an yuɛnu ta, yé maa zuru, yé maa yɛrɛ ye.

¹⁶ ’Bɛ ta lé Farizimi kenu léé: Mi ’ko ’ka flinyi tawe kɛla lo, amalé é ’ka si lɛ Kazambale va lo. Mi kenu léé: Wenyanékɛlɛzan é bɔa gyɛzorowe ’ko zoɛnu kɛlɛle lɛ kaa? Yé wo gi bɔi.

¹⁷ Yé wo lé yuɛwiizan lɛ léé: Bii lé é i yuɛ fuo, bii lé ’bɛ gi nɔɔ? É léé: Balelayezan lé.

¹⁸ Juifinu ’ka pa lɛ a ta léé, é a yuɛwiizan nya yé wa yuɛ fuo lo, fɔɔ yé wa yaazannu laa yé wo da.

¹⁹ Yé wo we laa ’bɛnu lee léé: Ka be lé, ka léé, wa yaa é yuɛ ’wiile nya, yee lé é ke ’koo? É kɛlɛ kaa yé éé yɛrɛ yé siin?

²⁰ A yaamunu lé wo lɛ léé: Ko a gi dɔɔ léé, é a ko be nya, yé ko a gi dɔɔ é ziin léé, ko a yaa é yuɛ ’wiile nya,

²¹ naa, we lé ’bɛ bɔ a ma yé éé yɛrɛ yé, é valé mi lé ’bɛ a yuɛ fuo, ko ’ka ’bɛ gi dɔɔa lo. ’Ka we laa yeebozen lee. É a segele, yé é dan ébo ma we fe lɛ.

²² A yaamunu a kanana Juifinu lee, amalé wo we ’ko fe. Juifinu ’wo gi pa kɔɔn do léé, dé miomian é a nyi si léé, Jézu a Krist nya, wo dan ’bɛzan bɔra lɛ bazorokɔn gi.

²³ Bɛwemalé a yaamunu léé: É a segle; ’ka we laa yeebozen lee.

²⁴ Mi lé a yuɛnu ke turu é ’wiile, Farizimunu a laa a gɔnɔ fiézan nya yé wo léé: ’I Kazambale tɔ bɔ. Ko gi dɔɔ léé, mi ’ko a wenyanékɛlɛzan nya.

²⁵ Yé é a zi pa léé: Dé é a wenyanékɛlɛzan nya, maa ’ka ’bɛ gi dɔɔa lo. Maa we do dɔɔ, yee lé é ke léé, maa a turu yuɛwiizan nya, yé sin maa yɛrɛ yé.

²⁶ Yé wo lé a lɛ léé: É mɛ fɛ ɛ kɛlɛ i lɛɛ? É i yuɛ fuo kaa?

²⁷ É lé wo lɛ léé: Maa a fe ka lɛ é kyɛn, yé ka ’ka ka tɔné dɔ lɛ lo. Mɛmalé é sɔ ka lɛ léé, ka a ’ma é ziin? Kanu é ziin, ka a va léé, ka kɛlɛ a zuomunu nyaa?

²⁸ Yé wa sɔnɔ yé wo léé: Bii ɛ ke a zuozan nya. Ko a Moizi zuozannu nya.

²⁹ Ko a gi dɔɔ léé, Kazambale we fe Moizi lɛ. Naa, mi ’ko, ko ’ka a sina dɔɔa lo.

³⁰ Mi ’ko a zi pa wo lɛ léé: Dé ka ’ka a sina dɔɔa lo, ’bɛ a givuruwe nya; yé é an yuɛ fuo duowo.

³¹ Ko a gi dɔɔ léé, Kazambale ’ka wenyanékɛlɛzannu dére maan lo. Naa, dé mi a bɔa, ’té éé alé blibɔmawe kɛla, ’bɛzan dére lé éé a maan.

³² Wo ’ka tan a ’ma lɛ léé, mi lé wa yaa é yuɛ ’wiile nya, mi do ’bɛ yuɛ fuo monomono lo.

³³ Dé mi ’ko ’ka si lɛ Kazambale va lo, é ’ka bɔa we do kɛlɛle lɛ lo.

³⁴ Yé wa zi pa a lɛ léé: Wo i yaa wenyanékɛlɛzan nya tegele boenwo yé bii ɛ we paan ko gii? Yé wa bin.

Mi bli gi yuɛ ’wiile

³⁵ Jézu a ’ma léé, wa bin. Dé é a ye é lé a lɛ léé: I bli a Kazambale Be lɛɛ?

³⁶ Yé é lé a lɛ léé: Mizan, de ɛ ke a nya yé an bli é vo a lɛɛ?

³⁷ Jézu lé a lɛ léé: I ’ka an yé loo? Maa lé an ke wefena i lɛ ’ko, maa lé.

³⁸ Yé é léé: Mizan, an bli a i lɛ. Yé é dia ’é bli la a ’lɛ.

³⁹ Yé Jézu léé: An da tɛrɛ la ’ko we do gi bɔile we ma, yee lé ke ’ko: munu lé wo ’ka yɛrɛ yé lo, wolé yɛrɛ yele we ma, yé munu lé woo yɛrɛ yé, wo kininle yuɛwiizannu nya we ma.

⁴⁰ Farizimi kenu lé wo ke ana bɛ, wo dére ’konu ’ma aan wo yé wo lé a lɛ léé: Ko é ziin, ko a yuɛwiizannu nyaa?

⁴¹ Jézu lé wo lɛ léé: Dé é vo kɔɔn lé ka a yuɛwiizannu nya, ’té kalé wenyané ’ka lo. Sin ka léé, ’wo fɛna yé, bɛwemalé kalé wenyané ana.