WENÉNÉ LE JAN A GYE (Évangile selon Jean) 8 - Kazambale lé Sebe Sauunu 1979

¹ Jézu go Ɔlivi gɔ nwiin.

² Naa, bladi pa aan wo é go é ziin Balebangikɔn gi yé munu faa go a va. É nyana, yé é vo we paana wo gi.

³ ’Bɛna tɔɔn sɛbɛgifemunu valé Farizimunu da, le do lé wo bɔ a ma gɔné ginina, a nya, yé wa dɔ munu méléna.

⁴ Yé wo lé Jézu lɛ léé: Kozan, le ’ko, wo bɔ a ma gɔné ginina.

⁵ Moizi a fe ko lɛ bélidɔwe gi léé, ’wo le ’ko zoɛnu gyɛ gɔlɛ nya. Naa, bii lé nɔɔ?

⁶ Wa we ’ko fena a gi danle we ma, we dɔle a nwiin we gi. Naa, Jézu tua yé é kun sɛbɛ gyɛle ma tɛrɛ va é bɛnwɔlɛ nya.

⁷ Wolé we laale a lee ’ka aan wo nyaana lo, é nwa yé é lé wo lɛ léé: Ka va mi lé é ’ka tan wenyané do kɛlɛ lɛ lo, ’bɛzan ’é gɔlɛ vuli é vinin le ’ko va.

⁸ Yé é tua é ziin yé é vo sɛbɛ gyɛna tɛrɛ va.

⁹ Wo ’bɛ ’ma aan wo, wolé wevasibli we dɔ wo nwiin, yé é sia mi segelenu ma yé é bɔ pɛɛnu ma, wo faa bɔra do do. Yé Jézu valé lezan vo wo fié, ’té lezan a é dɔle é pa duo gi.

¹⁰ ’Bɛ zuo Jézu nwa aan wo, é lé lezan lɛ léé: Lezan, munu lé wo da i tɔ fe lɛ, wa kyɛɛn? Mi do kpen ’ka ga dɔ lɛ i nwiin loo?

¹¹ Yé lezan léé: Iin, Mizan. Yé Jézu lé a lɛ léé: Maa é ziin, maa ’ka ga dɔa i nwiin lo. ’I go; té i wenyané kɛlɛ é dɛrɛ lo.

Jézu a tɛrɛlamunu lé san nya

¹² Jézu we fe wo lɛ é ziin, yé é léé: Maa lé é ke tɛrɛlamunu lé san nya. Mian éé dan an zuo, é ’ka dan tawo lɛ gunutinu va lo, naa, é dan mibélisan ye lɛ.

¹³ ’Bɛ zuo Farizimunu lé a lɛ léé: Bii a ibozen lé wenayezan nya. I dére ’ka webozen nya lo.

¹⁴ Jézu a zi pa wo lɛ léé: Fɛana lé an si, maa a dɔɔ. Yé fɛana lé an dan go lɛ, maa a dɔɔ, yé an dére a webozen nya, dɔlé ’té maa a anbozen lé wenayezan nya. Naa, ka ’ka an sina dɔɔa lo, yé ka ’ka an gona dɔɔa lo.

¹⁵ Ka we blé blaminu lé weblebɛ yɛrama. Maa ’ka mi do kpen lé we blé lo.

¹⁶ Maa ’ka an do lo, an Ti lé é an pa zia, é a an va, bɛwemalé dé maa a we blena, an we blé éboen ma.

¹⁷ É a é gyɛle kalé bélidɔwe gi léé: Wenayezan fié lé wenayedére a webozen nya;

¹⁸ maa a anbozen lé wenayezan nya, yé an Ti lé é an pa zia, ’bɛ a anlé wenayezan nya é ziin.

¹⁹ Yé wo lé a lɛ léé: I Ti a kyɛɛn? Jézu lé wo lɛ léé: Ka ’ka an dɔɔa lo, yé ka ’ka an Ti dɔɔa lo. Dé é a lé ka an dɔɔ, ’té ka an Ti dɔɔ é ziin.

²⁰ Bléyian va lé Jézu a we paana munu gi Balebangikɔn gi, fɛana lé gɔɔlizéngi kɛsu ke ana, ’té éé dére ’konu fé. Azé bléyi ’ka tan bɔ lɛ lo, bɛwemalé mi do ’ka a kun lɛ lo.

Fɛana lé maa ke gona, ka ’ka bɔa gole lɛ ana lo

²¹ Jézu lé é ziin wo lɛ léé: Maa a gona, yé ka dan an gini lɛ, yé ka dan ga lɛ kalé wenyané nya ka lee; yé fɛana lé maa ke gona, ka ’ka bɔa gole lɛ ana lo.

²² É a fe aan wo léé, fɛana lé é dan go lɛ, ka ’ka bɔa gole lɛ ana lo, bɛwemalé Juifinu léé: É dan ébo gyɛ léé?

²³ Yé é lé wo lɛ léé: Ka si tɛrɛ va, yé maa si loru. Ka a tɛrɛlamunu nya, yé maa ’ka tɛrɛlami nya lo.

²⁴ Bɛwemalé maa lé ka lɛ léé, ka dan ga lɛ kalé wenyanénu nya ka lee. Naa, maa a mian nya, dé ka bli ’ka vo lɛ a lɛ léé, maa a ’bɛ nya lo, ka dan ga lɛ kalé wenyanénu nya ka lee.

²⁵ Yé wo lé a lɛ léé: Bii a de nyaa? Jézu a zi pa wo lɛ léé: Maa a mi lé maa a fe ka lɛ a pélisia bléyi va, a nya.

²⁶ Ka ma we kiɛre lé maa dan a fe lɛ yé maa dan we ble lɛ a nya ka va, é a an gi, naa, mi lé é an pa zia, é a mi bozen nya, yé we lé maa a ’ma a ta, yee lé maa ke a fena tɛrɛlamunu lɛ.

²⁷ Wo ’ka a gi ’ma lɛ léé, a Ti ma we lé é ke a fena lo.

²⁸ Jézu lé wo lɛ léé: Yian nya lé ka dan maa blami Be dun lɛ, ’bɛ yi la, dé mi lé maa ke a nya, ka dan a dɔɔ lɛ, yé ka dan a dɔɔ lɛ léé, maa ’ka we do kpen kɛlɛna anbo ’wuo gi lo, naa, we lé an Ti a paa an gi, yee saa lé maa ke a fena.

²⁹ Mi lé é an pa zia é a an va; a sɔlɛwe lé maa kɛla yifaama, amalé é ’ka an voo an do lo.

³⁰ Jézu lé wefele a zo lé we ma léé, mi kiɛre bli vo a lɛ.

Webozen é dan ka kɛlɛ lɛ minénu nya

³¹ Yé Juifinu lé wo bli vo a lɛ bɛ, é lé wo lɛ léé: Dé ka tawoo an dére ta, ’té ka a an zuomunu nya webozen nya,

³² yé ka dan webozen dɔɔ lɛ, yé webozen é dan ka kɛlɛ lɛ minénu nya.

³³ Wo lé a lɛ léé: Ko a Abraam kulunu nya, yé ko ’ka mi do kpen lé luunu nya monomono lo. É kɛlɛ kaa yé i léé, ko dan kɛlɛ lɛ minénu nyaa?

³⁴ Jézu lé wo lɛ léé: Maa fe ka lɛ kyɔ webozen nya, dé miomian éé wenyané kɛla, ’bɛzan a wenyané lé luu nya.

³⁵ Naa, luu ’ka nyanaan yifaama kɔn gi lo, kɔnzan be éé nyanaan yifaama a gi.

³⁶ Dé maa Bale Be ka kɛlɛ minénu nya, ka dan vo lɛ kaboma webozen nya.

³⁷ Maa a gi dɔɔ léé, ka a Abraam kulunu nya. An dére ’ka voo ka gi lo, bɛwemalé ka a kwa kulina léé, ka an gya.

³⁸ We lé maa a ye an Ti va, yee lé maa ke a fena, yé ’kaa, we lé ka a ’ma ka ti ta, yee lé ka ke a kɛlɛna.

Ka ti a yo nya

³⁹ Wa zi pa a lɛ léé: Ko ti lé ke Abraam nya. Jézu lé wo lɛ léé: Dé é vo léé, ka a Abraam lé nénu nya, ’té Abraam kɛlɛwenu lé ka kɛla.

⁴⁰ Naa, an webozen ’ma Kazambale va, yé maa a fe ka lɛ, yé sin, ka a kwa kulina léé, ka an gya. Abraam ’ka ’bɛ kɛlɛ lɛ lo.

⁴¹ Ka a ka ti kɛlɛwenu kɛlɛna. Wo lé a lɛ léé: Ko ’ka bwɛlanénu nya lo. Ko ti a do kpen, Kazambale nya.

⁴² Jézu lé wo lɛ léé: Dé é vo léé, Kazambale ɛ ke ka ti nya, ’té an dan sɔ lɛ ka lɛ. Kazambale gi lé an si, yé an da; an ’ka da lɛ anbo ’wuo gi lo, naa, yee ɛ an pa zia.

⁴³ Mɛwemalé ka ’ka an dére gi maan loo? Ma a wewɔlɛ boen fena, amalé.

⁴⁴ Ka ti a yonufaatagɔné nya, yé é sɔ ka lɛ léé, ka ka ti lé blibɔmawe kɛlɛle lɛ sɔɔ. A pélisia bléyi va fɔɔ kyɔ é a migyɛzan nya yé é ’ka dɔa wezen zuo lo. Wezen ’ka a gi lo, ’bɛzama. É a viéwozan nya, yé é a vié faa ti nya, bɛwemalé dé é a vié wona, ’té é a ébo dére vɔna.

⁴⁵ Yé maa a wezen fena, amalé ka ’ka dɔna an dére ta lo.

⁴⁶ Ka va mi kyɛn ɛ an bɔn‐in kinié léé, maa wenyané kɛlɛɛ? Dé maa webozen fé, mɛwemalé ka ’ka dɔa an dére ta loo?

⁴⁷ Mi lé é ke Kazambale zé nya, éé tɔné dɔa Kazambale dérenu lɛ. Ka ’ka Kazambale lé munu nya lo, bɛwemalé ka ’ka ka tɔné dɔa a dére lɛ lo.

Dé Abraam ’ka tan lo, maa ana

⁴⁸ Juifinu lé a lɛ léé: Dé ko a fe léé, bii a Samari mi nya yé yo a i gi, ’té ko ’ka wezen fe lɛ loo?

⁴⁹ Jézu lé wo lɛ léé: Yo ’ka an gi monomono lo, naa, maa an Ti tɔ bɔa, ’té ka an tɔ sɛra.

⁵⁰ Maa ’ka an tɔbɔle naginina lo; mi lé ’bɛ an tɔbɔle naginian, ’té ’bɛ a va sié, ’bɛzan ana.

⁵¹ Maa fe ka lɛ kyɔ webozen nya, dé mian éé tawoo an dére ta, é ’ka dan ga lɛ monomono lo.

⁵² Juifinu lé a lɛ léé: Sin, ko a gi dɔɔ léé, yo a i gi. Abraam ga, yé balelayemunu ga é ziin, yé bii léé, dé mian tawo ’é dére ta, ’bɛzan ’ka dan ga lɛ monomono loo?

⁵³ Ko tra Abraam lé ’bɛ ga, i blɛn mini ’bɛ taa? Yé balelayemunu é ziin, wo ga. Bii a ibo kɛlɛna de ɛ nyaa?

⁵⁴ Jézu a zi pa wo lɛ léé: Dé maa anbo tɔ kɛla blɛn, ’té an tɔbɔle a we pla nya. An Ti ɛ an tɔ kɛla blɛn, yee lé ka léé, é a ’wolé Bale nya.

⁵⁵ Ka ’ka a dɔɔa lo; dé é a maa nya, maa a dɔɔ. Yé dé maa a fe léé, maa ’ka a dɔɔa lo, ’té maa kɛlɛ viéwozan nya bélé ka zo. Naa, maa a dɔɔ, yé an tawoo a dére ta.

⁵⁶ Ka tra Abraam gi nana léé, é dan an dayi na ye lɛ, yé é a ye, yé a gi nana.

⁵⁷ Juifinu lé a lɛ léé: I lɛɛ ’ka tan yɔ fié wɔlɛ vu bɔ lɛ lo ’naan, yé i Abraam yee?

⁵⁸ Jézu lé wo lɛ léé: Maa fe ka lɛ kyɔ webozen nya, bléyian va lé Abraam ’ka lo, ’té maa ana.

⁵⁹ ’Bɛ ta lé wo gɔlɛnu sia léé, wa vuli a va, naa, Jézu ta saan yé é bɔra Balebangikɔn gi.