WENÉNÉ LE JAN A GYE (Évangile selon Jean) 7 - Kazambale lé Sebe Sauunu 1979

Jézu zuanénu ’ka é pale Jézu ta lo

¹ ’Bɛ zuo, Jézu gié Galilé tɛrɛ la. É ’ka sɔ lɛ a lɛ léé, é gié Judé tɛrɛ la lo, ’bɛna Juifinu a kwa kulina léé, ’wa gya, azama.

² Juifinu lé fɛti lé wa kɛla yɔlaaban wuo, é bɔ é pu.

³ Yé a zuanénu lé a lɛ léé: ’I si ’ko yé ’i go Judé tɛrɛ la yé i zuomunu é ziin ’wo i panyanamanu ye.

⁴ Dé é sɔ mi lɛ léé, munu ’é dɔɔ, é ’ka we kɛla kyeen gi lo baa? Dé i a we ’konu kɛlɛna, ’ibozen nagɔɔn munu lɛ.

⁵ Naa, a zuanénu boen‐oo, ’bɛnu ’ka é pale a ta lo.

⁶ Jézu lé wo lɛ léé: Anzé bléyi ’ka tan bɔ lɛ lo, naa, kazé bléyi a é bɔle yifaama.

⁷ Tɛrɛlamunu ’ka bɔa ka za pale lɛ lo. Maa wo ma we fe léé, wo kɛlɛwenu a é naané, amalé an za a wo gi.

⁸ Kanu ’é go fɛti ’ko kɛlɛ. Anzé bléyi lɛ ’ka tan sɔɔ lɛ lo, bɛwemalé maa ’ka gona lo.

⁹ We ’ko fele wo lɛ zuo, é vo Galilé tɛrɛ la.

Jézu go fɛti kɛlɛ lɛ yɔlaaban wuo

¹⁰ A zuanénu go aan wo fɛti kɛlɛ lɛ, yeebozen é ziin é go ana munu ma trɔnné va. É ’ka ébo gɔɔn lɛ munu lɛ léé, ’yee lo, lo.

¹¹ Juifinu vo a ginina fɛti kɛlɛna, yé wo léé: É a kyɛɛn?

¹² Mi gu worona munu vo za kiɛre vɔna a ta. Mi kenu léé: Mi zin lé. Yé a kenu léé: Gba, é a munusaanzan nya.

¹³ Naa, wa kanana Juifinu lee, amalé mi do kpen ’ka é dére bié lɛ a nya lo.

¹⁴ Yi sɔraa fɛti lé; dé é bɔ é worona, Jézu go Balebangikɔn gi yé é kun we paale ma munu gi.

¹⁵ Yé Juifinu gi vuru yé wo léé: Mi lé é ’ka sɛbɛ draan lɛ monomono lo, é kɛlɛ kaa yé é Bale lé sɛbɛ dɔɔ?

¹⁶ Jézu lé wo lɛ léé: We lé maa a paama munu gi, é ’ka sié an va lo. Naa, mi lé é an pa zia, ’bɛzan va lé éé sié.

¹⁷ Dé é sɔ mian lɛ léé, é ’bɛzan lé blibɔmawe kɛlɛ, we lé maa a paama munu gi, dé yee Kazambale va lé é sioo, dé maabozen va lé é sioo, ’bɛzan é dan a gi dɔɔ lɛ.

¹⁸ Mi lé é ke we fena ébo dére nya abozen tɔbɔle lé é ke a ginina; naa, mi lé é ke é nwunvɔzan tɔbɔle ginina, ’bɛzan lé wefele a tegele yé weple do kpen ’ka ’bɛzan gi lo.

¹⁹ Moizi ’ka bélidɔwe nɔ lɛ ka lɛ loo? Yé ka va mi do kpen ’ka a kɛlɛna lo. Mɛmalé ka a kwa kulina léé, ka an gyaa?

²⁰ Mi gu lé a lɛ léé: Yo a i gi. Mi kyɛn ɛ ke kwa kulina léé, ’é i gyaa?

²¹ Jézu lé wo lɛ léé: An we do kɛlɛ, yé é ka faa gi vuru.

²² Moizi gane dɔle we paa ka gi. Naa, Moizi ’ka we ’ko pélisiana ye lɛ lo, ka tranu ɛ pélisia, yé ka mi gane dɔa flinyi nya, yee kaan loo?

²³ Dé ka mi gane dɔa flinyi nya, té ’wo Moizi lé bélidɔwe sɛrɛ lo we gi, mɛmalé dé an mi do béli tata flinyi nya, yé ka bli fli an maa?

²⁴ ’Ka we va sina ye faa yé ’ka we gi bɔi ’é bɔina.

Krist an ke ’ko loo?

²⁵ Jérusalɛm mi kenu léé: Mi lé wa kwa kulina léé, ’wa gya, yeean ke bɛ loo?

²⁶ Ka yua mun, é a we fena gɔrɔ la, yé wo ’ka we do kpen si lɛ a ta a zi lo. É a mi segelenu gi webozen nya léé, Krist lé lɛɛ?

²⁷ Mi ’ko, fɛana lé é si, ko a dɔɔ duowo, naa, dé Krist a dana yian ma, mi do kpen ’ka dan a sina dɔɔ lɛ lo.

²⁸ Jézu a we paana aan wo munu gi Balebangikɔn gi, yé é siaa yé é léé: Ka an dɔɔ, yé fɛana lé an si, ka ana dɔɔ. Maa ’ka da lɛ anboan lo, naa, mi lé é an pa zia, é a webozen nya, yé ka ’ka a dɔɔa lo.

²⁹ Naa, maa a dɔɔ; a va lé an si, yé yee ɛ an pa zia.

³⁰ Wa kwa kulina a ma léé, ’wa kunwo, naa, azé bléyi ’ka tan bɔ lɛ lo, amalé mi do kpen ’ka é bɛ mane lɛ a ma lo.

³¹ Mi gu va mi kiɛre pa a ta yé wo léé: Dé Krist da yian ma, ’bɛ é dan gyɛzorowenu kɛlɛ lɛ kiɛre yé ’bɛ é mini mi ’ko zé taa?

Wo sunyanu pa zia Jézu kunna

³² Gun lé munu ke a gyɛna Jézu ma, Farizimunu a ’ma. Yé Balebanmunu segelenu valé Farizimunu sunyanu pa zia a kunna.

³³ Jézu léé: Maa dan vo lɛ ka va bléyi sɛ nya é ziin; ’bɛ zuo, yé maa dan go lɛ, mi lé é an pa zia, a va.

³⁴ Ka dan an gini lɛ, yé ka ’ka dan an ye lɛ lo; yé fɛana lé maa dan kɛlɛ lɛ, ka ’ka bɔa gole lɛ ’bɛna lo.

³⁵ Bɛwemalé Juifinu lé wo ke lɛ léé: Fɛ kyɛnna lé é dan go lɛ, yé ko ’ka dan a ye lɛ loo? É dan go lɛ munu lé wo ke é sɔɔlale Grɛkinu suiɛ gi do do, wo vaa? Yé é dan we paa lɛ Grɛkinu gii?

³⁶ Dére lé é a fe léé, ka dan ’é gini lɛ yé ka ’ka dan ’é ye lɛ lo, yé fɛana lé ’é dan kɛlɛ lɛ, ka ’ka bɔa gole lɛ ’bɛna lo, ’bɛ gi lé nɔɔ?

Yuunu lé woo munu bélié

³⁷ Fɛti yi nyaana nya, yee lé é ke fɛti yi blɛn nya, Jézu dɔ loru, yé é siaa léé: Mian ’yiminilɔrɔ ke a gyɛna, ’é da an va ma, yé ’é ’yi mini ma.

³⁸ Mi lé é é bli voo an lɛ, mibéliyuunu é dan si lɛ a gi, ’té woo yoroan, fɛan zo lé Bale lé sɛbɛ a fe, a zo.

³⁹ É we ’ko fe munu lé wo dan ’wo bli vo lɛ a lɛ, Kazambale Léli lé wo dan a ye lɛ, alé we ma. Jézu ’ka tan wɔra lɛ élé fua gi lo; bɛwemalé Bale ’ka tan ’é Léli nɔ lɛ munu lɛ lo.

Munu gi bɔi

⁴⁰ Mi gu vamunu dére ’konu ’ma aan wo, wo léé: Mi ’ko a balelayezan‐o nya webozen nya.

⁴¹ Mi kenu léé: Krist lé; yé a kenu léé: Galilé tɛrɛ la lé Krist é dan si lɛ webozen nyaa?

⁴² Kazambale lé sɛbɛ ’ka a fe lɛ léé, David kulu gi lé é dan si lɛ loo? Krist ’ka dan si lɛ Bɛtléɛm, fɛana lé David ke é vinin, ana loo?

⁴³ Alé we ma lé mi gu vamunu gi bɔi.

⁴⁴ É sɔ wo va mi kenu lɛ léé, ’wa kun, naa, mi do kpen ’ka é bɛ mane lɛ a ma lo.

Minwiinmunu ’ka dɔ lɛ a ta léé, Jézu a balelayezan nya lo

⁴⁵ Amalé sunyanu nɔla ’wo pa gi Balebanmunu segelenu valé Farizimunu va. Yé ’bɛnu lé wo lɛ léé: Mɛmalé ka ’ka da lɛ a nya loo?

⁴⁶ Yé sunyanu léé: Mi vinin ’ka tan we fe lɛ bélé mi ’ko zo monomono lo.

⁴⁷ Farizimunu lé wo lɛ léé: ’Kaanu é ziin, é ka saan lɛɛ?

⁴⁸ Mi segelenu valé Farizimunu va mi do pa a taa?

⁴⁹ Naa, mi gu ’ko lé wo ’ka bélidɔwe dɔɔa lo, bale a é pale wo ma.

⁵⁰ Nikodɛm lé, ’bɛ da Jézu va é béli, ’té ’bɛ ke wo va mi do nya bɛ, ’bɛ lé wo lɛ léé:

⁵¹ Dé wo ’ka tan mi dére ’ma lɛ lo, yé dé wo ’ka tan a kɛlɛwenu dɔɔ lɛ lo ’naan, kolé bélidɔwe éé we dɔa a nwiin é plaa?

⁵² Wa zi pa a lɛ léé: Bii é ziin, i a Galilé mi nyaa? ’I go ’i sɛbɛ gi gini do, yé i dan a ye lɛ léé, balelayezan do kpen ’ka dan si lɛ Galilé tɛrɛ la lo.

Lezan lé wa kun gɔné ginina

⁵³ Yé wo faa go wolé kɔn ’léé do do.