WENÉNÉ LE JAN A GYE (Évangile selon Jean) 6 - Kazambale lé Sebe Sauunu 1979

Jézu fɛ nɔ mi baa fié mi wuru soru lɛ

¹ ’Bɛ zuo, Jézu go Galilé tɛrɛ la wɛyi lé, wa laama Tibériad, a zi.

² Gyɛzorowenu lé Jézu ke a kɛlɛna gyɛamamunu lɛ, munu a ye, amalé mi gu blɛn go a zuo.

³ Jézu gɔ gié yé yee valé é zuomunu nyana gɔ nwiin.

⁴ ’Té Taboyi lé fɛti bɔ é pu, Juifinu zé lé.

⁵ É yara nwa yé é mi gu blɛn ye dana ’é va, yé é lé Filip lɛ léé: Fɛ kyɛnna lé ko dan buru lɔ lɛ munu ’konu blefɛ nyaa?

⁶ We lé é dan a kɛlɛ lɛ, é a gi dɔɔ, naa, é we ’ko fe Filip gi danle we gi.

⁷ Filip lé a lɛ léé: Dé wo buru lɔ moné sɔraa nyanama ma gɔɔli nya, dé wa nɔ wo lɛ kiéné boenwo‐oo, é ’ka dan sɔ lɛ wo faa ma lo.

⁸ A zuomi do, Simɔn Piɛri zuané André lé a lɛ léé:

⁹ Gɔné kporoné do ana ’ko, sɔnmlén buru soru valé pɔ fié a ’bɛ lee, ’naan, ’bɛ a mɛ fɛ nya mi kiɛre ’konu zé nyaa?

¹⁰ Jézu léé: ’Ka wo nyana. Lu a fɛkona di. Yé wo nyana, dé mi baa fié wuru soru léé?

¹¹ Jézu burunu si, yé é Bale bɔ vɔ, yé wo lé wo ke é nyanale, é a guli wo ma. Yé é pɔ nɔ wo lɛ a zo é ziin, fɛan zo lé é sɔ wo lɛ, a zo.

¹² Wo kan aan wo, é lé é zuomunu lɛ léé: Buru kurunu lé wo vo, ’ka wo sia, té a do kpen é san lo.

¹³ Yé wa sia, yé sɔnmlén buru soru lé munu a ble bɛ, wo kyɛɛné vu ta fié fan a kurunu lé wo vo, wo nya.

¹⁴ Gyɛzorowe lé Jézu a kɛlɛ bɛ, dé munu ’konu a ye, wo léé: Balelayezan lé, wo léé, é dan da lɛ tɛrɛ la, yee lé é ke mi ’ko nya webozen nya.

¹⁵ Yé Jézu a gi dɔɔ aan wo léé, wo dan ’é si lɛ yé wo ’é dɔ ’wo nwiinzan nya, é si wo va é ziin yé é go gɔ nwiin é do kpen.

Jézu tawo wɛyi ta

¹⁶ Nyanadi pa aan wo, a zuomunu go wɛyi ba gi.

¹⁷ Wo vɔ ’yitagoro gi, yé wo go Kapɛnaum vazia; ’bɛ a wɛyi zi. Gunu dɔra, ’té Jézu ’ka tan da lɛ wo va lo.

¹⁸ Fu blɛn a giéna, yé wɛyi ma a nyɔɔnna.

¹⁹ Wa ’yitagoro vɔna payili nya, yé wo bɔ dé kilo soru suiɛdo léé, a ta, yé wo Jézu ye tawona wɛyi ta, yé é bié ’yitagoro sɔnɔ. Yé kana zén wo gi.

²⁰ Naa, Jézu lé wo lɛ léé: Maa lé; té ka kana lo.

²¹ Amalé wa nyi si léé, Jézu é vɔ wo va ’yitagoro gi yé kele tɔɔn ’yitagoro bɔ fɛana lé wo ke gona, ana.

Munu Jézu nagini

²² ’Bɛ é tu kini, mi gu lé wo vo é dɔle wɛyi zi, wa gi dɔɔ léé, ’yitagoro do kpen ɛ ke yese ana, naa, Jézu ’ka vɔ lɛ ’bɛ gi é zuomunu va lo; wo go wo saa.

²³ Naa, ’yitagoro bɛnu si Tibériad yé fɛana lé munu buru ble Mizan lé Bale bɔvɔle zuo, wo bɔ ’bɛna sɔnɔ;

²⁴ mi gu a ye aan wo léé, wo ’ka aan wo Jézu valé é zuomunu yena lo, wobozen wo vɔ ’yitagoro ’konu gi, yé wo go Kapɛnaum Jézu naginile we gi.

Jézu a mibéliburu nya

²⁵ Wo Jézu ye aan wo wɛyi zi, yé wo lé a lɛ léé: Kozan, bléyi kyɛn va lé i da ’koo?

²⁶ Jézu lé wo lɛ léé: Maa fe ka lɛ kyɔ webozen nya, gyɛzorowenu yele saa lé we ma‐an ka ke an naginina lo. Naa, ka buru ble yé ka kan, bɛwemalé ka ke an naginina.

²⁷ Té ka nyanama pa fɛblele lé é dan gié lɛ bɛ, ’bɛ lé we ma lo. ’Ka a pa yee lé é vo vole é yuɛma lé a glɛ ’ka lo, azé nya, alé we ma; yee lé maa blami Be é dan a nɔ lɛ ka lɛ. Naa, Tibale ézé tɔmase pa maa ɛ ma.

²⁸ Wo lé a lɛ léé: É a lé ko kɛlɛ kaa yé ko Kazambale lé nyanama paa?

²⁹ Jézu lé wo lɛ léé: Kazambale lé nyanama lé ke ’ko: maa lé é an pa zia, ka bli vole an lɛ lé.

³⁰ Wo lé a lɛ léé: Naa, mɛ we lé bé kɛla yé ko ye yé ko bli é vo i lɛɛ? Mɛ fɛ lé bé kɛlaa?

³¹ Ko tranu mana ble bwi gi, é a é gyɛle sɛbɛ gi fɛan zo, a zo, léé: É lagi buru nɔ wo lɛ fɛblele nya.

³² Jézu lé wo lɛ léé: Maa fe ka lɛ kyɔ webozen nya, Moizi ’ka lagi buru nɔ lɛ ka lɛ lo; naa, an Ti ɛ lagi buru bozen no ka lɛ.

³³ Naa, Kazambale lé buru lé é ke maa lé an si la gi yé an zun tɛrɛ la, an nya, vole é yuɛma lé a glɛ ’ka lo, maa ɛ a no tɛrɛlamunu lɛ.

³⁴ Wo lé a lɛ léé: Mizan, ’i buru ’ko nɔ ko lɛ yifaama ma.

³⁵ Jézu lé wo lɛ léé: Maa lé ke mibéliburu nya. Mi lé é da an va, lɔrɔ ’ka dan a gyɛ lɛ monomono lo, yé mi lé a bli vo an lɛ, ’yiminilɔrɔ ’ka dan a gyɛ lɛ monomono lo.

³⁶ Naa, maa lé ka lɛ léé, ka an ye, yé ka bli ’ka vona an lɛ lo.

³⁷ Munu faa lé an Ti éé wo no an lɛ, wo dan da lɛ an va, yé mi lé é da an va, an ’ka dan sɔn vɔ lɛ a ma monomono lo.

³⁸ An ’ka si lɛ la gi yé an da anbo lé blibɔmawe kɛlɛle we ma lo, naa, an si la gi yé an da, mi lé é an pa zia, alé blibɔmawe kɛlɛle we ma.

³⁹ Yé mi lé é an pa zia, alé blibɔmawe lé é ke léé, munu faa lé é wo nɔ an lɛ, té wo va mi do kpen é san an lee lo, naa, ’maa wo nwa gamunu va yi voélazan nya.

⁴⁰ An Ti lé blibɔmawe lé é ke ’ko: dé miomian é an ye a Be nya, yé a bli vo an lɛ, vole é yuɛma lé a glɛ ’ka lo, é wɔra ’bɛ gi, yé maa dan a nwa lɛ gamunu va yi voélazan nya.

⁴¹ É a fe aan wo léé, buru lé é si la gi, yee ɛ ke ’yee nya, amalé Juifinu vo gun gyɛna a ma.

⁴² Yé wo léé: Mi ’ko ’ka Jozɛfu be Jézu nya loo? Ko a ti valé a bu dɔɔ. É kɛlɛ kaa yé é léé, ’é si la gi yé ’é daa?

⁴³ Jézu lé wo lɛ léé: Té ka gun gyɛ ka ke méléna lo;

⁴⁴ an Ti lé é an pa zia, dé é ’ka mi sia lɛ ana lo, mi do kpen ’ka bɔa dale lɛ an va lo; naa, mian é da an va, maa dan ’bɛzan nwa lɛ gamunu va yi voélazan nya.

⁴⁵ Balelayemunu a gyɛ wolé sɛbɛ gi léé: Kazambale é dan we paa lɛ wo faa gi. Dé miomian é an Ti dére ’ma, yé é alé we paale nyi si, ’bɛzan ɛ dan an va.

⁴⁶ É ’ka kɛlɛ lɛ léé, mi do kpen an Ti ye lo, ’té dé é ’ka maa lé an si Kazambale va, an nya lo; maa ɛ an Ti ye.

⁴⁷ Maa fe ka lɛ kyɔ webozen nya, mi lé a bli vo an lɛ, vole é yuɛma lé a glɛ ’ka lo, é wɔra ’bɛ gi.

⁴⁸ Maa lé ke mibéliburu nya.

⁴⁹ Ka tinu mana ble bwi gi yé wo ga.

⁵⁰ Buru lé é si la gi, yee lé an nya ’ko, yé mi lé éé an blé, é ’ka gaan monomono lo.

⁵¹ Maa a mibéliburu lé é si la gi, a nya. Dé mi buru ’ko ble, é dan vo lɛ é yuɛma lɛɛfaama, a glɛ ’ka dɔa lo. Yé buru lé maa dan a nɔ lɛ a lɛ, an wi lé, yee lé maa dan a nɔ lɛ tɛrɛlamunu bélifɛ nya.

⁵² ’Bɛna tɔɔn, Juifinu vo zavɔna ’wo ke méléna, yé wo léé: É bɔa é wi nɔle lɛ ko lɛ fɛblele nya kaa?

⁵³ Jézu lé wo lɛ léé: Maa fe ka lɛ kyɔ webozen nya, dé ka ’ka maa blami Be wi blé lo, dé ka ’ka an nyɛ minian lo, ka ’ka voo é yuɛma monomono lo.

⁵⁴ Mi lé éé an wi blé yé éé an nyɛ minian, vole é yuɛma lé a glɛ ’ka lo, é a azé nya, yé maa dan a nwa lɛ gamunu va yi voélazan nya.

⁵⁵ Naa, an wi a blefɛ bozen nya; yé an nyɛ a minifɛ bozen nya.

⁵⁶ Mi lé éé an wi blé yé éé an nyɛ minian, éé voo an gi, yé maa voo ’bɛzan gi.

⁵⁷ Fɛan zo lé an Ti lé é ke é yuɛma é an pa zia, yé an voo é yuɛma alé we ma, a zo duo lé mian éé an blé é dan vo lɛ é yuɛma anlé we ma.

⁵⁸ Buru lé é si la gi, yee lé é ke an nya ’ko. Buru lé ka tranu a ble yé wo ga, an ’ka bélé ’bɛ zo lo. Mi lé éé buru ’ko blé, é dan vo lɛ é yuɛma lɛɛfaama, a glɛ ’ka dɔa lo.

⁵⁹ Jézu we ’konu fe bazorokɔn gi, ’té é a we paana Kapɛnaum munu gi.

Dérenu lé wo ke vole é yuɛma nya

⁶⁰ A zuomunu we ’ko ’ma aan wo, wo va mi kiɛre léé: Dére ’ko a plɛplɛ; de ɛ bɔa é tɔné dɔle lɛ ’bɛ lɛɛ?

⁶¹ Jézu a gi dɔɔ léé, é zuomunu a gun gyɛna we ’ko ma, yé é lé wo lɛ léé: We ’ko éé ka keleéé?

⁶² Yé dé ka maa blami Be ye gona fɛana lé an ke é kyɛn, ana nii?

⁶³ Léli ɛ mi vo é yuɛma; mi kɔlɛ lé we tɔnɔ ’ka lo. Dérenu lé maa wo fe ka lɛ bɛ, wa léliwe nya yé wo ɛ mi vo é yuɛma.

⁶⁴ Naa, mi kenu ana ka va, yé wolé blipale ’ka monomono lo. Naa, a pélisiana, munu lé wo bli ’ka dan vo lɛ Jézu lɛ lo, é wo dɔɔ yé mi lé ’bɛ é dan a pa lɛ munu lee, é ’bɛzan dɔɔ.

⁶⁵ Amalé é we taa fe wo lɛ léé: Bɛwemalé maa lé ka lɛ léé, dé an Ti ’ka zi nɔ lɛ mi lɛ lo, é ’ka bɔa dale lɛ an va lo.

⁶⁶ É sia bléyi ’ko va, a zuomunu kiɛre diéra, yé wo ’ka go lɛ a zuo é ziin lo.

⁶⁷ Amalé Jézu lé mi vu ta fié lɛ léé: Ka é ziin, ka ’ka a va léé, ka go loo?

⁶⁸ Simɔn Piɛri lé a lɛ léé: ’I, Mizan, de ɛ va lé ko dan go lɛɛ? Vole é yuɛma lé a glɛ ’ka lo, a dérenu a i ’léé,

⁶⁹ yé ko a gi dɔɔ léé, bii a Krist nya, Kazambale lé Mi Sauun nya, yé ko dɔ ’bɛ ta.

⁷⁰ Jézu lé wo lɛ léé: An ’ka ka si lɛ munu va loo? ’Kaa mi vu ta fié; yé ka va mi do a yo nya.

⁷¹ Kariɔtzan Simɔn be Judas lé we lé é ke a fena bɛ; yee ɛ ke mi vu ta fié va mi do nya, yé yee ɛ dan Jézu pa lɛ munu lee.