WENÉNÉ LE JAN A GYE (Évangile selon Jean) 5 - Kazambale lé Sebe Sauunu 1979

Jézu mi béli ’yiguru sɔnɔ

¹ ’Bɛ zuo, Juifinu lé fɛti do bɔ, yé Jézu go ana Jérusalɛm.

² ’Té ’yiguru do a Jérusalɛm, ’blanu bɔrana zi ’léé sɔnɔ, wa laama Ébru dére gi Bétɛsɛda. Ban soru a é dɔle a zi.

³ Yé gyɛgyɛmunu koo, yuɛwiizannu koo, ganesuruzannu koo, furuagyɛzannu koo, wo kiɛre a é yiale yee bannu wuo. Wa ’yi nyɔɔnle lɛbɛnna.

⁴ Yi ke nya lanje do é zunwo ’yiguru va yé ’yi é nyɔɔn. Dé ’yi nyɔɔn, mian éé vɔa a va é vinin, éé bélié. Dé gyɛogyɛan é ke a ma, éé sié a ma.

⁵ Mi do ana mi, gyɛ a a ma, a lɛɛ yɔ do wɔlɛ vu ta sɔraa bɔ.

⁶ Jézu a ye aan wo é yiale, é a gi dɔɔ léé, alé gyɛ namɔn yé é lé a lɛ léé: É sɔ i lɛ léé, i bélii?

⁷ Gyɛkɛlɛzan lé a lɛ léé: Mizan, dé ’yi nyɔɔn, mi do kpen ’ka an lɛ yé ’bɛ an vɔ ’yi va lo; yé dé maa a gona bléyian va, mi bɛ éé vɔa a va an ’lɛ.

⁸ Jézu lé a lɛ léé: ’I nwa, ’ilé yialafɛ sia, yé ’i tawo.

⁹ Yé kele tɔɔn, mi ’ko béli, yé élé yialafɛ sia yé é tawo.

¹⁰ Jézu mi ’ko béli flinyi nya. Amalé mi lé é béli bɛ, Juifinu lé a lɛ léé: Flinyi lé kyɔ, a se ’ka i lɛ léé, i go ilé yialafɛ nya lo.

¹¹ É lé wo lɛ léé: Mi lé é an béli, yee ɛ fe an lɛ léé: ’Ilé yialafɛ sia yé ’i tawo.

¹² Yé wa laa a lee léé: Mi kyɛn ɛ fe i lɛ léé, ilé yialafɛ sia yé i tawoo?

¹³ Mi kiɛre ana, amalé Jézu ta san. Bɛwemalé mi lé é béli bɛ, é ’ka ’é bélizan dɔɔ lɛ lo.

¹⁴ ’Bɛ zuo, Jézu a ye Balebangikɔn gi yé é lé a lɛ léé: I a yé loo? I béli; té i wenyané kɛlɛ é dɛrɛ lo, we lé é ke tɔntɔn é mini a koɛ ta, dé ’bɛ é da bɔ i ma.

¹⁵ Mi ’ko go yé é lé Juifinu lɛ léé: Mi lé é an béli, Jézu lé.

¹⁶ Jézu we ’ko kɛlɛ flinyi nya, bɛwemalé Juifinu kun nyané pale ma Jézu ta.

¹⁷ Naa, Jézu lé wo lɛ léé: An Ti a nyanama pana fɔɔ kyɔ; yé maa a anzé pana é ziin.

¹⁸ Bɛwemalé Juifinu nwa a ma taawo plɛplɛ, léé, wa gyɛ, flinyi sɛrɛle saa lé we ma kaan lo, naa, ébo dan Kazambale ma ’bɛ laale nya ébozen ti, amalé.

A se a Bale Be lɛ

¹⁹ Bɛwemalé Jézu kun wefele ma é ziin, yé é lé wo lɛ léé: Maa fe ka lɛ kyɔ webozen nya, maa Bale Be, an ’ka bɔa we do kpen kɛlɛle lɛ anbo ’wuo gi lo; we lé maa an Ti ye a kɛlɛna, yee saa lé maa a kɛla. Yé we faa lé an Ti ke a kɛlɛna, yee duo lé maa a Be ke a kɛlɛna é ziin.

²⁰ Naa, maa Bale Be, an sɔ an Ti lɛ, yé we faa lé an Ti ke a kɛlɛna, é wo gɔɔn an lɛ, yé koɛnu lé wo ke blɛn é mini a ’konu ta, é dan wo gɔɔn lɛ an lɛ, yé ’bɛ é dan ka ’léé ma lɛ ka ma.

²¹ Naa, fɛan zo lé an Ti éé munu nwaan gamunu va ’té éé wo bélié, a zo duo lé mi lé é sɔ an lɛ léé, maa a béli, ’bɛzan lé maa a bélié.

²² An Ti ’ka mi do kpen lé we blé lo, naa, maa lé an ke a Be nya, é weblele faa bɛ pa maa ɛ lee,

²³ léé, fɛan zo lé woo an Ti tɔ bɔa, wo maa, a Be, tɔ bɔ a zo. Mi lé é ’ka maa Bale Be tɔ bɔa lo, an Ti lé é an pa zia, é ’ka ’bɛ tɔ bɔa lo.

²⁴ Maa fe ka lɛ kyɔ webozen nya, mi lé éé an dére maan, yé éé bli voo mi lé é an pa zia, a lɛ, vole é yuɛma lé a glɛ ’ka lo, é a ’bɛzan gi, yé wo ’ka dan alé we ble lɛ monomono lo; naa, é so ga lee, yé é wɔra vole é yuɛma gi.

²⁵ Maa fe ka lɛ kyɔ webozen nya, a bléyi é dan bɔ lɛ yé é bɔ sin, ’bɛ bléyi va gamunu é dan maa Kazambale Be dére ’ma lɛ, yé woan wo dan a ’ma lɛ bɛ, wo dan béli lɛ.

²⁶ Fɛan zo lé an Ti bozen ke vole é yuɛma ’wuo nya, a zo duo lé é a se kɛlɛ maa é Be lɛ léé, an kɛlɛ vole é yuɛma ’wuo nya é ziin.

²⁷ Yé maa a blami Be nya; bɛwemalé é a se kɛlɛ an lɛ léé, an munu lé we ble.

²⁸ Té ka gi é vuru ’bɛ ma lo. A bléyi é dan bɔ lɛ yé yɛrɛgimunu faa é dan an dére ’ma lɛ, yé wo dan bɔra lɛ yɛrɛ gi;

²⁹ munu lé wo wezin kɛlɛ, wo dan nwa lɛ yé wo vo é yuɛma lɛɛfaama ’bɛ glɛ ’ka dɔa lo; naa, munu lé wo wenyané kɛlɛ, wo dan nwa lɛ wolé we blele we ma.

Jézu lé wenayezannu

³⁰ Maa ’ka bɔa we do kɛlɛle lɛ anbo ’wuo gi lo. We lé maa a maan, a yɛrama lé maa we blé; yé maa ’ka anbo lé blibɔmawe kɛlɛna lo; naa, mi lé é an pa zia, alé blibɔmawe lé maa ke a kɛlɛna, bɛwemalé an we blé tegele.

³¹ Dé maa a anbozen lé wenayezan nya, ’té an dére ’ka webozen nya lo.

³² Mi bɛ ɛ ke anlé wenayezan nya, yé maa a gi dɔɔ léé, an mawe lé é ke a fena, ’bɛ a webozen nya.

³³ Ka mi nwunvɔ Jan va, yé é webozen ma we fe.

³⁴ Dé é a anzé nya, an mawe ’ka a gi léé, mi an ma we zin fe lo, naa, maa a we ’ko fena ka sile we gi we ma.

³⁵ Jan ɛ ke kyɛbɔ lé é ke bina ’té éé blé, a nya, yé ka a a va léé, ’wo gi é nana a san va bléyi do nya.

³⁶ We lé ’bɛ an ma we fé, ’bɛ blɛn mini Jan lé an ma we fele ta; nyanamanu lé an Ti a nɔ an lɛ léé, maa wo pa, nyanama ’ko bozennu lé maa ke a pana, woo ɛ an ma we fé léé, an Ti ɛ an pa zia.

³⁷ Yé an Ti lé é an pa zia, yeebozen ɛ an ma we fe. Yé ka ’ka tan a dére ’ma lɛ monomono lo; yé ka ’ka tan a yara ye lɛ monomono lo,

³⁸ yé maa lé é an pa zia, ka ’ka ka bli vo lɛ an lɛ monomono lo, amalé a dére ’ka voo ka gi lo.

³⁹ É a ka gi léé, vole é yuɛma lé a glɛ ’ka lo, a ’wuo a Kazambale lé sɛbɛ nya, amalé ka ke a gi kulina. Kazambale lé sɛbɛ ’ko, ’bɛ ɛ an gɔɔn‐an ka lɛ.

⁴⁰ Yé é ’ka sɔ lɛ ka lɛ léé, ka da an va ka vole é yuɛma we gi lo.

⁴¹ Maa ’ka an tɔbɔle naginina munu va lo.

⁴² Naa, maa ka dɔɔ: maa a gi dɔɔ léé, Kazambale ’ka sɔ lɛ ka lɛ lo.

⁴³ Maa da an Ti tɔ gi, yé ka ’ka an si lɛ lo. Yé dé mi bɛ da ébo tɔ gi, ka ’bɛzan sié.

⁴⁴ Ka a ka ke tɔ bɔna, yé Kazambale lé ’bɛ ke Bale nya é do kpen, ka ’ka a va léé, ’bɛ é ’wo tɔ bɔ lo; ka bɔa ka bli vole lɛ an lɛ kaa?

⁴⁵ Té é dɔ ka gi léé, maa ɛ dan we dɔ lɛ ka nwiin an Ti va lo; mi lé é dan we dɔ lɛ ka nwiin, Moizi lé ka bli ke a lɛ bɛ, yee lé.

⁴⁶ Naa, Moizi anlé we gyɛ sɛbɛ gi, bɛwemalé dé ka a é pale Moizi ta weboen nya, ’té ka dan pa lɛ an dére ta é ziin.

⁴⁷ Naa, wenu lé é a gyɛ sɛbɛ gi, dé ka ’ka dɔ lɛ ’bɛ ta lo, ka dan dɔ lɛ an dérenu ta kaa?