WENÉNÉ LE JAN A GYE (Évangile selon Jean) 4 - Kazambale lé Sebe Sauunu 1979

Jézu valé Samari le

^1-3 Farizimunu a ’ma léé, Jézu a munu yena é zuomunu nya ’té éé wo batizéwoo é mini Jan zé ta, dɔlé ’té Jézu bozen ’ka munu batizéwona lo, naa, a zuomunu ɛ ke a kɛlɛna. Mizan Jézu we ’ko gi dɔɔ, amalé é si Judé tɛrɛ la yé é a nɔlana Galilé tɛrɛ la.

⁴ Yé é a lé é Samari tɛrɛ kini,

⁵ yé é bɔ Samari lé fla do la, wa laama Sikaa, féi lé Jakɔb a nɔ é be Jozɛfu lɛ, a sɔnɔ.

⁶ Ana lé Jakɔb lé ’yiguru ke. Jézu wɔlɛ gi nyaa tawole nya yé é nyana ’yiguru ta. Dé yiéyi bléyi léé? a nya.

⁷ Samari le do da ’yi tɔ lɛ. Jézu lé a lɛ léé: ’I ’yi nɔ an lɛ maa mini.

⁸ ’Té a zuomunu go fla fɛblele lɔ lɛ.

⁹ Samari le lé a lɛ léé: É kɛlɛ kaa yé bii lé i ke Juifi mi nya, i mini’yi laa maa lé, an ke Samari le nya, an lee? Juifinu valé Samarinu ’ka é nanale lo.

¹⁰ Jézu lé a lɛ léé: Dé é vo léé i Kazambale lé blɛ dɔɔ, yé maa lé maa a fe i lɛ léé: ’I ’yi nɔ an lɛ maa a mini, dé é vo léé, i an dɔɔ kɔɔn, ’té biibozen é dan mini’yi laa lɛ an lee, yé an dan mibéli’yi nɔ lɛ i lɛ.

¹¹ Lezan lé a lɛ léé: Mizan, fɛ do kpen ’ka i lee ’yitɔfɛ nya lo, yé ’yiguru gi a baa. I dan mibéli’yi ’ko ye lɛ fɛ kyɛnnaa?

¹² Ko tra Jakɔb lé, é ’yiguru ’ko nɔ ko lɛ, ’té yeebozen koo, a benu koo, alé trubɛnu koo, wo ’yi mini a gi bɛ, i blɛn mini a lɛɛ?

¹³ Jézu lé a lɛ léé: Dé miomian é ’yi ’ko mini, ’yiminilɔrɔ é dan a gyɛ lɛ é ziin.

¹⁴ Naa, ’yi lé maa dan a nɔ lɛ munu lɛ, dé mian é ’bɛ ’yi mini, ’yiminilɔrɔ ’ka dan ’bɛzan gyɛ lɛ é dɛrɛ lo. Yé ’yi lé maa dan a nɔ lɛ ’bɛzan lɛ, é dan kinin lɛ ’yi’wuo nya a bɔn gi, yé é dan vo lɛ duunna fɔɔ yé é kɛlɛ munubélifɛ nya, yé wo vo é yuɛma ’té ’bɛ glɛ ’ka dɔa lo.

¹⁵ Lezan lé a lɛ léé: Mizan, ’i yee ’yi nɔ an lɛ ma, ’té ’yiminilɔrɔ ’ka an gya é dɛrɛ lo, yé an ’ka dan ’yi tɔ lɛ ’ko é dɛrɛ lo.

¹⁶ Jézu lé a lɛ léé: ’I go i zana laa, ’ka da a nya ze.

¹⁷ Lezan léé: An zana ’ka lo. Jézu lé a lɛ léé: Wezen lé bé fe léé, ’é zana ’ka lo.

¹⁸ Naa, é kyɛn ’té i zana a soru, yé a koɛ lé i ke ’bɛ lee sin bɛ, i zana ’ka ’bɛ nya lo. ’Bɛ nya lé i wezen fe.

¹⁹ Lezan lé a lɛ léé: Mizan, maa a ye léé, bii a balelayezan nya.

²⁰ Ko tranu Kazambale bɔ gɔ ’ko ɛ nwiin, yé ka léé, é a lé ’wo Kazambale bɔ Jérusalɛm ɛ na.

²¹ Jézu lé a lɛ léé: Lezan, maa fe i lɛ webozen nya, bléyi do é dan bɔ lɛ, ’bɛ bléyi va ka ’ka dan Ti bɔ lɛ gɔ ’ko nwiin lo, yé ka ’ka dan a bɔ lɛ Jérusalɛm lo.

²² Fɛ lé ka ’ka a dɔɔa lo, yee lé ka bɔa; naa, ko, fɛan ko dɔɔ, yee lé ko bɔa. Naa, mi sile we gi éé sié Juifinu va.

²³ Naa, bléyi do é dan bɔ lɛ yé é bɔ sin, a nya lé Balebɔmunu bozennu wo dan Ti bɔ lɛ léli valé webozen nya. Balebɔmunu lé, Ti ke wo naginina, wo lé ke bɛ.

²⁴ Kazambale a léli nya, yé munu lé woo Kazambale bɔa, é a lé wa bɔ léli valé webozen nya ma.

²⁵ Lezan lé a lɛ léé: Maa a gi dɔɔ léé, Mɛsi é dan da lɛ, yee lé wa laama Krist. Dé é da, é dan we faa fe lɛ ko lɛ.

²⁶ Jézu lé a lɛ léé: Maa lé ke wefena i lɛ ’ko, maa ɛ ke a nya.

²⁷ A zuomunu da ’bɛ bléyi va yé wo gi vuru alé wefele ma lezan lɛ. Naa, mi do kpen ’ka a fe lɛ a lɛ léé: I a mɛ fɛ ma laanaa? taa, mɛmalé ka we fé lezan nyaa? lo.

²⁸ ’Bɛna tɔɔn, lezan élé bɔ vo bɛ yé é go fla, yé é lé munu lɛ léé:

²⁹ Mi lé é an kɛlɛwe faa zuo fe an lɛ, ’ka da ’ka ye. Yeean ke Krist nya loo?

³⁰ Wo si fla yé wo go Jézu va.

³¹ ’Bɛ bléyi va, a zuomunu a a ma kyɛ dɔna léé, ’é fɛ ble. Yé wo léé: Kozan, ’i fɛ ble.

³² Naa, é lé wo lɛ léé: Fɛblele lé é ke an lee, ka ’ka a dɔɔa lo.

³³ Yé a zuomunu lé ’wo ke lɛ léé: Mi do da fɛblele nya a lɛɛ?

³⁴ Jézu lé wo lɛ léé: Mi lé é an pa zia, alé blibɔmawe kɛlɛle koo, alé nyanama pale lɛsɔɔle koo, wo lé ke anlé fɛblele nya.

³⁵ Ka ’ka a fena léé, é vo moné ziɛn yé wo ’sa gyɛ bɛ loo? Ka yua bɛ, ’ka yara nwa yé ka féinu nagini. Wa é tanale wo gyɛle yɛrama.

³⁶ Woo ’sagyɛzan gooli paan, yé éé féi ma tɔnɔ yé vole é yuɛma lé a glɛ ’ka lo, azé nya, ’savɔzan valé ’sagyɛzan gi nanale ékeva we gi.

³⁷ We lé wa fé we ’ko gi, ’bɛ a webozen nya. Wo léé: Mi do éé fɛ vɔa yé mi bɛ a gya.

³⁸ Fɛ lé ka ’ka a nyanama pana ye lɛ lo, maa ka nwunvɔ a gyɛle we gi. Mi bɛnu a nyanama pa, yé ka tɔnɔ ye wolé nyanama ma.

³⁹ Dére lé lezan a fe léé: É an kɛlɛwe faa zuo fe an lɛ, ’bɛ dére ’ko lé we ma lé fla ’ko la Samarinu kiɛre wo bli vo Jézu lɛ.

⁴⁰ Yé dé Samarinu da a va, wo zanté vɔ a lɛ léé, ’é vo ’wo va. Yé é yi fié ’té kɛlɛ wo va.

⁴¹ A dére lé we ma lé mi kiɛre bli vo a lɛ é ziin,

⁴² yé wo lé lezan lɛ léé: Ko bli ’ka vo lɛ a lɛ we lé bé fe bɛ, ’bɛ saa ma lo. Kobozen a dére ’ma koboan, yé ko a gi dɔɔ léé, é a tɛrɛlamunu faa siéwegizan nya webozen nya.

Jézu minwiinzan bɛgizan be béli

⁴³ Yi fié ’konu zuo, Jézu si ’bɛna yé é go Galilé tɛrɛ la.

⁴⁴ Naa, yeebozen a fe é kyɛn léé, wo ’ka balelayezan lɛdɔama ébo lé fla lo.

⁴⁵ É bɔ aan wo Galilé tɛrɛ la, a dale sɔ Galilé munu lɛ é baba. ’Bɛnu go fɛti kɛlɛna Jérusalɛm, yé we faa lé Jézu a kɛlɛ fɛtiyinu nya, ’bɛnu a ye é ziin, amalé a dale sɔ wo lɛ.

⁴⁶ É nɔla é ziin Kana, Galilé tɛrɛ la, fɛana lé é ’yi nɔla dɔrɔ nya, ana. Minwiinzan bɛgizan do ana Kapɛnaum, gyɛ a a be gyɛna.

⁴⁷ É a ’ma aan wo léé, Jézu si Judé tɛrɛ la yé é da Galilé tɛrɛ la, é go a va, yé é zanté vɔ a lɛ léé, ’é go é be lé a gale bɔ é pu ’é a béli.

⁴⁸ Jézu lé a lɛ léé: Dé ka ’ka gyɛzorowenu valé we blɛnblɛnnu kɛlɛle ye lɛ lo, ka bli ’ka vo an lɛ monomono lo.

⁴⁹ Minwiinzan bɛgizan lé a lɛ léé: Mizan, ’i da é kele, dé anlé né é da ga i ’lɛ.

⁵⁰ Jézu lé a lɛ léé: ’I go, i be a é yuɛma. Yé dére lé Jézu a fe, mi ’ko bli vo a lɛ yé é go.

⁵¹ É a gona aan wo, a leezannu da a si lɛ zia, yé wo alé né tawe fe a lɛ léé: Ilé né a é yuɛma.

⁵² É a laa wo lee léé: Alé gyɛ fila vɔ bléyi kyɛn vaa? Yé wo lé a lɛ léé: Yese yiéyi lé, a kɔlɛ gi kyɛ dɔle si.

⁵³ A sele dɔ né ti gi léé, ’bɛ bléyi ’ko va lé Jézu a fe ’é lɛ léé: I be a é yuɛma. Yé yee valé élé kɔngimunu faa pa Jézu ta.

⁵⁴ Bléyian va lé Jézu si Judé tɛrɛ la yé é go Galilé tɛrɛ la, ’bɛ bléyi va lé é gyɛzorowe fiézan ’ko kɛlɛ.