WENÉNÉ LE JAN A GYE (Évangile selon Jean) 3 - Kazambale lé Sebe Sauunu 1979

Jézu valé Nikodɛm

¹ Naa, gɔné do ana, é a Farizi mi nya wa laama Nikodɛm; Juifimi segele lé.

² É da Jézu va é béli, yé é lé a lɛ léé: Anzan, ko a gi dɔɔ léé, bii a wepaamigizan lé é si Kazambale va, a nya. Gyɛzorowenu lé bé kɛla ’ko, dé Kazambale ’ka mi va lo, é ’ka bɔa wo kɛlɛle lɛ lo.

³ Jézu lé a lɛ léé: Maa fe i lɛ kyɔ webozen nya, dé wo ’ka mi yaa lɛ é dɛrɛ lo, é ’ka dan kɛlɛ lɛ munu lé Kazambale ke é plale wo nwiin, wovazan do nya lo.

⁴ Nikodɛm lé a lɛ léé: Dé mi a segele, wo bɔa a yaale lɛ kaa? Mi é bɔaléé, ’é wɔra é bu bɔn gi é ziin, yé wa dɛrɛ yaa?

⁵ Jézu lé a lɛ léé: Maa fe i lɛ kyɔ webozen nya, dé wo ’ka mi yaa lɛ ’yi valé Kazambale Léli nya lo, é ’ka bɔa gole lɛ Kazambale lé fla lo.

⁶ Fɛ lé wa yaa mi ma, ’bɛ a mi nya, yé fɛ lé wa yaa léli ma, ’bɛ a léli nya.

⁷ Dé maa a fe i lɛ léé, é a lé wo ka yaa é dɛrɛ, té ’bɛ i gi vuru lo.

⁸ Fɛana sɔ fu lɛ, ana lé éé giéan. Yé bé vun ’ma, naa, dé é si kyɛɛn? dé é go kyɛɛn? i ’ka wona dɔɔa lo. Mi faa lé wo wo yaa Kazambale Léli ma, a zo lé wolé we ke.

⁹ Nikodɛm a laa a lee léé: We ’ko, é bɔa kɛlɛle lɛ kaa?

¹⁰ Jézu lé a lɛ léé: Bii lé i we paan Izraɛlnu gi ’naan, yé bii ’ka we ’konu dɔɔa loo?

¹¹ Maa fe i lɛ kyɔ webozen nya, we lé ko dɔɔ, yee lé ko fé, yé we lé ko ana ye, yee lé ko fé, yé ko dére ’ka goo ka ’wuo gi lo.

¹² Dé maa tɛrɛlawenu fe ka lɛ, dé ka ’ka dɔ lɛ ’bɛ ta lo, dé maa lagiwenu fe ka lɛ, ka dan dɔ lɛ ’bɛ ta kaa?

¹³ Mi vinin ’ka tan go lɛ la gi lo, ’té dé é ’ka mi lé é si la gi, maa blami Be lé an ke la gi mi, an nya lo.

¹⁴ Yé fɛan zo lé Moizi méné dun bwi gi, a zo duo lé é a lé wo maa blami Be dun é ziin,

¹⁵ léé, dé miomian bli vo an lɛ, é dan vo lɛ é yuɛma lɛɛfaama ’bɛ glɛ ’ka lo.

¹⁶ Naa, Kazambale bli bɔ tɛrɛlamunu ma é baba, amalé é ’é Be wɔlɛ do kpen nɔ wolé we gi, léé, dé miomian bli vo a lɛ, é ’ka zamaga woo monomono lo, naa, é dan vo lɛ é yuɛma lɛɛfaama, ’bɛ glɛ ’ka lo.

¹⁷ Kazambale ’ka é Be pa lɛ zia léé, ’é da tɛrɛlamunu lé we ble lo, naa, é a pa zia léé, ’é tɛrɛlamunu si we gi.

¹⁸ Mi lé a bli vo Bale Be lɛ, wo ’ka dan alé we ble lɛ lo; naa, mi lé a bli ’ka vo a lɛ lo, wo alé we ble é kwakwa. A bli ’ka vo lɛ Kazambale Be wɔlɛ do kpen tɔ lɛ lo, azama.

¹⁹ Wean ma lé woo munu lé we blé, yee lé ke ’ko: wo kɛlɛwenu a lɛrɛlɛrɛ; bɛwemalé san da aan wo tɛrɛ la, gunutinu sɔ wo lɛ é mini san ta.

²⁰ Miomian éé wenyané kɛla, san za a a gi yé é ’ka dan san va monomono lo, dé wo da é kɛlɛwenu ye;

²¹ naa, mi lé éé we kɛla webozen yɛrama, yee ɛ dan san va, a nagɔɔnle we gi léé, ’é kɛlɛwenu a Kazambale lé blibɔmale nya.

É a lé Jézu ’é kɛlɛ blɛn yé an kɛlɛ kiéné

²² ’Bɛ zuo, Jézu go é zuomunu nya Judé tɛrɛ la; ana lé yee valé ’bɛnu nyana, yé é vo munu batizéwona.

²³ Énɔn lé é ke Salim sɔnɔ, ’yi kiɛre a ’bɛna, amalé Jan ke munu batizéwona ’bɛna. Munu da ’bɛna, ’wo batizéwole we gi.

²⁴ ’Bɛ bléyi va ’té wo ’ka tan Jan vɔ lɛ bokɔn gi lo.

²⁵ Yé zavɔle nwa Jan zuomunu valé Juifi mi do méléna, mi kɛlɛle é zima lé we ma.

²⁶ Yé wo da Jan va, yé wo lé a lɛ léé: Kozan, mi lé é ke turu i va Juudɛn yuu zi, ’té bé mawe fe, é a munu batizéwona, ’té wo faa éé goo a va.

²⁷ Jan léé: Dé Bale ’ka fɛ nɔ lɛ mi lɛ lo, é ’ka bɔa fɛ yele lɛ lo.

²⁸ Kabozen, ka a anlé wenayezannu nya léé, maa a fe léé, maa ’ka Krist nya lo, naa, wo an pa é wo zia a ’lɛ.

²⁹ Mi lé le dɛrɛ ke a lee, yee ɛ ke lesizan nya; naa, lesizan béé lé, ’bɛ ke é dɔle ana, ’té ’bɛ éé tɔné dɔa lesizan dére lɛ bɛ, ’bɛ gi éé nanaan lesizan dére lé we ma; yé é ziin, gi nanale ’ko lé é ke anzé nya, ’bɛ lɛ a é sɔɔle.

³⁰ É a lé yee ɛ kɛlɛ blɛn yé maa ɛ kɛlɛ kiéné.

Mi lé é si la gi

³¹ Mi lé é si loru, é a fɛ faa nwiin; mi lé é si tɛrɛ va, é a tɛrɛlami nya, yé éé we fé tɛrɛ la wefebɛ gi. Yé mi lé é si la gi, é a fɛ faa nwiin;

³² yé we lé é a ye, é valé we lé é a ’ma, yee lé éé a fé yé a dére ’ka goo mi do kpen ’wuo gi lo.

³³ Mi lé é ’wuo dɔ a dére wuo, ’bɛzan léé: Kazambale a webozen nya.

³⁴ Naa, Kazambale ’ka ’é Léli nɔle glɛ dɔ lɛ a lɛ lo; bɛwemalé, mi lé Kazambale a pa zia, Kazambale dérenu lé éé a fé.

³⁵ Be sɔ Ti lɛ, yé é we faa bɛ pa a lee.

³⁶ Mi lé éé bli voo Be lɛ, é dan vo lɛ é yuɛma lɛɛfaama, ’bɛ glɛ ’ka lo, naa, mi lé éé Be lɛgaanma, é ’ka dan vo lɛ é yuɛma lo, naa, Kazambale bli é dan vo lɛ flina a ma. A zo lé Jan a fe wo lɛ.