WENÉNÉ LE JAN A GYE (Évangile selon Jean) 21 - Kazambale lé Sebe Sauunu 1979

Jézu bɔra é zuomunu sɔrafié va

¹ ’Bɛ zuo, Jézu ébo nagɔɔn é ziin é zuomunu lɛ Tibériad wɛyi gɔ la. Yé ébo nagɔɔn fɛan zo, yee lé é ke ’ko.

² Simɔn Piɛri koo, Tɔmas lé wo wo yaa fiané nya koo, Galilé tɛrɛ la Kanazan Natanaɛl koo, Zébédé benu koo, Jézu zuomunu va mi bɛ fié koo, wo ana ékeva.

³ Simɔn Piɛri lé wo lɛ léé: An go pɔ gyɛ lɛ. Wo lé a lɛ léé: Ko é ziin, ’ko go i zuo. Wo bɔra yé wo vɔ ’yitagoro kiéné gi, yé ’bɛ yi duo nya é béli wo ’ka fɛ do kpen ye lɛ lo.

⁴ Bladi pa aan wo, ’té Jézu a é dɔle wɛyi gɔ la. Naa, a zuomunu ’ka a gi dɔɔ lɛ léé, Jézu lé, lo.

⁵ Jézu lé wo lɛ léé: Anlé nénu, fɛ do kpen ’ka ka lee blefɛ nya loo? Yé wo lé a lɛ léé: Iin.

⁶ Yé é lé wo lɛ léé: ’Ka pɔgyɛséli nwɛɛn ’yitagoro bɛyilazia, yé ka dan pɔ gyɛ lɛ. Yé wa nwɛɛn yé séli gi pɔ kiɛre lé we ma lé wo ’ka bɔalɛ léé, wo séli gana lo.

⁷ Yé Jézu zuozan lé é sɔ Jézu lɛ, é lé Piɛri lɛ léé: Mizan lé. Simɔn Piɛri a ’ma aan wo léé, Mizan lé, ’té é a é porole, tɔɔn yé é sɔ vɔ é tɛrɛ la yé é vɔ ’yi va.

⁸ Zuomunu pɔnénu da ’yitagoro gi, yé pɔgyɛséli lé é ke é fanle pɔnu nya, wa gana. Wo ’ka é sile gɔɔn ma baa lo, dé mɛtrɛ yɔ soru léé? a zo.

⁹ Wo bɔra aan wo gɔ la yé wo tɛɛn kyɛ ye, ’té pɔ a kyɛ ma, yé buru ana.

¹⁰ Jézu lé wo lɛ léé: Pɔnu lé ka wo gyɛ lao bɛ, ’ka da a ke nya.

¹¹ Simɔn Piɛri vɔ ’yitagoro gi yé pɔgyɛséli lé é ke é fanle pɔ blɛnblɛn yɔ sɔrafié wɔlɛ vu ta yaa nya, é a gana gɔ la. Pɔ a dioo, pɔgyɛséli ’ka fia lɛ wo ma duowo lo.

¹² Jézu lé wo lɛ léé: ’Ka da fɛ ble. A zuomunu a gi dɔɔ léé, Mizan lé, bɛwemalé é ’ka dɔ lɛ wo va mi do gi léé, é we laa a lee léé: De ɛ ke i nyaa? lo.

¹³ Jézu bié, yé é buru si, yé é a nɔ wo lɛ, yé é pɔ nɔ wo lɛ é ziin.

¹⁴ É sia Jézu nwale ma gamunu va, abo nagɔɔnle é zuomunu lɛ gɔnɔ yaazan lé ke bɛ.

Jézu léé: ’I fɛblele nɔ anlé ’blanu lɛ

¹⁵ Wolé fɛblele zuo, Jézu lé Simɔn Piɛri lɛ léé: Jonas be Simɔn, an sɔ i lɛ é mini an sɔ i bɔlunu ’konu lɛ fɛan zo, a taa? É lé a lɛ léé: Iin, Mizan, bé gi dɔɔ léé, i sɔ an lɛ. Jézu lé a lɛ léé: ’I fɛblele nɔ anlé ’blanénu lɛ.

¹⁶ É lé a lɛ a gɔnɔ fiézan nya léé: Jonas be Simɔn, an sɔ i lɛɛ? Piɛri lé a lɛ léé: Iin, Mizan, bé gi dɔɔ léé, i sɔ an lɛ. Jézu lé a lɛ léé: ’I fɛblele nɔ anlé ’blanu lɛ.

¹⁷ É lé a lɛ a gɔnɔ yaazan nya léé: Jonas be Simɔn, an sɔ i lɛɛ? É a fe aan wo Piɛri lɛ a gɔnɔ yaazan nya léé: An sɔ i lɛɛ? yé Piɛri bli kyɛ dɔ. Yé é lé a lɛ léé: Mizan, i we faa gi dɔɔ. Bii a gi dɔɔ léé, i sɔ an lɛ. Jézu lé a lɛ léé: ’I fɛblele nɔ anlé ’blanu lɛ.

¹⁸ Maa fe i lɛ kyɔ webozen nya, dé i a mi boroné nya, biibozen ɛ ilé kyɛsidi dɔa i gyɛn, yé fɛ lé ana sɔ i lɛ yé i go ana. Naa, dé i kɛlɛ segele, i dan i bɛ nwa lɛ, yé mi bɛ é dan ilé kyɛsidi dɔ lɛ, yé fɛana ’ka sɔ lɛ i lɛ lo, yé é go i nya ’bɛna.

¹⁹ É we ’ko fe, Piɛri é dan ga lɛ fɛan zo Kazambale tɔ kɛlɛle blɛn we gi, a gɔɔnle we ma. É we fe aan wo ’ko zo, yé é lé a lɛ léé: ’I da an zuo.

Jézu zuozan lé é sɔ Jézu lɛ

²⁰ Piɛri nɔla, yé zuozan lé é sɔ Jézu lɛ, é a ye dana ’wo zuo, mi lé é tɛn Jézu ma ’té wa fɛ blena yi la bɛ yé é léé: Mizan, de ɛ dan i pa lɛ munu lee? yee lé.

²¹ Piɛri a ye aan wo, é lé Jézu lɛ léé: Mizan, mi ’ko, mɛ we ɛ dan bɔ lɛ ’bɛ maa?

²² Jézu lé a lɛ léé: Dé é sɔ an lɛ léé, ’é vo ana fɔɔ yé an da, ’bɛ mɛ ɛ kɛla i lɛɛ? Bii, ’i da an zuo.

²³ ’Bɛ zuo, we ’ko gun gyɛle sɔɔla bwenu méléna léé, Jézu zuozan ’ko, é ’ka dan ga lɛ lo, dɔlé té Jézu ’ka a fe lɛ Piɛri lɛ léé, é ’ka dan ga lɛ lo lo; naa, é léé, dé é sɔ an lɛ léé, ’é vo ana fɔɔ yé an da, ’bɛ mɛ ɛ kɛla i lɛɛ?

²⁴ Jézu zuozan ’ko ɛ ke we ’konu nayezan nya, yé é wo gyɛ sɛbɛ gi. Yé ko a gi dɔɔ léé, a dére a webozen nya.

²⁵ Jézu we bɛnu kiɛre kɛlɛ é ziin. É dɔ an gi léé, dé wa faa gyɛ sɛbɛnu gi do do, ’té sɛbɛnu ’ka dan sɔ lɛ tɛrɛ bozen ta lo.