WENÉNÉ LE JAN A GYE (Évangile selon Jean) 20 - Kazambale lé Sebe Sauunu 1979

Jézu nwale

¹ Dimansi nya bladi, dé tu ’ka tan kini lɛ é zima lo, Magadala le Mari da gɔlɛkoro na; yé é a ye léé, gɔlɛ a é sile gɔlɛkoro ’léé.

² É vlan buru yé é go Simɔn Piɛri valé Jézu zuozan bɛ lé ’bɛ sɔ Jézu lɛ, wo va. Yé é lé wo lɛ léé: Wo Mizan si gɔlɛkoro gi, yé fɛana lé wa pa, ko ’ka ana dɔɔa lo.

³ Piɛri valé zuozan ’ko bɔra yé wo go gɔlɛkoro na.

⁴ Wo fiénu go vlan nya ékeva, naa, Piɛri bɔluzan lé vlan?-?burule mini Piɛri zé ta yé ’bɛ bɔ é vinin gɔlɛkoro na.

⁵ ’Bɛ tua, yé ’bɛ sɔbɛnu ye tɛrɛ va, naa, é ’ka wɔra lɛ ana lo.

⁶ Simɔn Piɛri lé, ’bɛ ke a zuo, dé ’bɛ bɔ yé ’bɛ wɔra gɔlɛkoro gi. Yé sɔbɛnu lé wo ke tɛrɛ va, é ’bɛnu ye,

⁷ é valé sɔ lé wa vuru Jézu ’wuo ma, é a ye. ’Bɛ ’ka sɔbɛnu ’ko va lo, naa, a po a é pale ’té é a é plale é yɛrama.

⁸ Yé zuozan ’ko lé, ’bɛ bɔ lao é vinin gɔlɛkoro na, ’bɛ wɔra é ziin yé ’bɛ a ye, yé ’bɛ bɔn‐in kini sin yé ’bɛ léé: Weboen lé.

⁹ Naa, we lé é ke é gyɛle Kazambale lé sɛbɛ gi léé, é a lé Jézu é nwa gamunu va, wo ’ka tan ’bɛ gi ’ma lɛ lo.

¹⁰ Yé Jézu zuozannu si ’bɛna yé wo go ’wolé kɔn ’léé.

Jézu bɔra Magadala le Mari va

¹¹ ’Té Mari a é dɔle duowo béera gɔlɛkoro sɔnɔ, ’té éé wuvɔa. É a wuvɔna aan wo, yé é tua guru gi naginile we ma,

¹² yé é lanjenu fié ye, sɔ fu nya ’wo ta, é nyanale fɛana lé wo Jézu gale pa, ana, a do a a ’wuo vɔna zia, yé a do a a gane vɔna zia.

¹³ Wo lé a lɛ léé: Lezan, mɛmalé i ke wuvɔnaa? É a zi pa wo lɛ léé: Wo anzan si yé fɛana lé wa pa, maa ’ka ana dɔɔa lo, azamalé.

¹⁴ Dé é a we ’ko fena é nɔla yé é Jézu ye é dɔle, naa, é ’ka a gi dɔɔ lɛ léé, Jézu lé, lo.

¹⁵ Jézu lé a lɛ léé: Lezan, mɛmalé i ke wuvɔnaa? De lé i ke a nagininaa? É dɔ a gi léé, zian féipazan lé, yé é lé a lɛ léé: Anzan, dé bii ɛ go a nya, fɛana lé bé pa, bé fe an lɛ yé maa a sia.

¹⁶ Jézu lé a lɛ léé: Mari. É nɔla yé é lé a lɛ Ébru dére gi léé: Rabuni, ’bɛ gi léé, anzan blɛn.

¹⁷ Jézu lé a lɛ léé: Té i buvɔ an ma lo. Maa ’ka tan go lɛ an Ti va lo. Naa, ’i go an zuanénu va; bé fe wo lɛ léé, maa a gona kaa Ti lé é ke kaalé Bale nya, a va.

¹⁸ Magadala le Mari go a fe lɛ zuomunu lɛ léé: An Mizan ye, yé we lé é a fe an lɛ, yee lé ke ’ko.

Jézu bɔra é zuomunu va

¹⁹ Yee dimansi duo nya é nyanadi, wo kanale Juifinu lee we ma, wo kɔn lɛ tan ’wo ta, yé Jézu da yé é dɔ wo méléna, yé é lé wo lɛ léé: ’Ka vo drɔɔ ma.

²⁰ É we ’ko fe aan wo wo lɛ, é bɛlaanu valé é sɛe gi nagɔɔn wo lɛ. Dé zuomunu Mizan ye, wo gi nana.

²¹ Jézu lé é ziin wo lɛ léé: ’Ka vo drɔɔ ma. Fɛan zo lé an Ti an nwunvɔ, a zo duo lé maa ka nwunvɔa é ziin.

²² Dére ’konu fele zuo, é wo suu é ’léé fu nya, yé é lé wo lɛ léé: ’Ka Léli Sauun ye ma.

²³ Mi lé ka a ma we vo alé wenyanénu lé we ma, wo ma we ’é vo; yé mi lé ka alé wenyanénu vo a nwiin, é dan vo lɛ a nwiin.

Tɔmas ’ka dɔ lɛ Jézu nwale ta lo

²⁴ Tɔmas lé wo wo yaa fiané nya, ’té é ke mi vu ta fié va mi do nya, bléyian va lé Jézu da a bɔlunu va, ’té yee ’ka ana lo.

²⁵ Zuomunu pɔnénu lé a lɛ léé: Ko Mizan ye. Naa, é lé wo lɛ léé: Dé maa ’ka pɔnténu pagi ye lɛ a bɛlaanu ma lo, yé dé maa ’ka an bɛnwɔlɛ wɔra lɛ pɔnténu pagi lo, yé dé maa ’ka an bɛ wɔra lɛ a sɛe gi lo, maa do ’ka dɔa we ’ko ta monomono lo.

²⁶ ’Bɛ zuo yi sɔraa, Jézu zuomunu ke aan wo é ziin kɔn gi, ’té Tɔmas a wo va. ’Té kɔn lɛnu a é tanle. Jézu da, yé é dɔ wo méléna yé é léé: ’Ka vo drɔɔ ma.

²⁷ Yé é lé Tɔmas lɛ léé: ’I bɛnwɔlɛ bié ze yé ’i an bɛlaanu nagini a nya. ’I bɛ bié é ziin yé bé wɔra an sɛe gi. I bli ’é vo we lɛ, té i kɛlɛ wezavɔzan nya lo.

²⁸ Tɔmas lé a lɛ léé: Anzan valé anzé Bale.

²⁹ Jézu lé a lɛ léé: I an ye sin, amalé bé nyi si. Munu lé wo ’ka an ye lɛ lo, yé wa nyi si bɛ, wozé a néné.

Wean ma lé Jan élé sɛbɛ gyɛ

³⁰ Gyɛzorowe bɛnu kiɛre lé Jézu a kɛlɛ é zuomunu yuɛ va, maa ’ka wo gyɛ lɛ sɛbɛ ’ko gi lo.

³¹ Naa, maa we ’konu gyɛ sɛbɛ gi ka bli vole a lɛ we ma léé, Jézu ɛ ke Krist nya, Kazambale Be nya, yé dé ka bli vo a lɛ yé ka béli a tɔ ma.