WENÉNÉ LE JAN A GYE (Évangile selon Jean) 2 - Kazambale lé Sebe Sauunu 1979

Wo le sile lé fɛti kɛlɛ Kana

¹ ’Bɛ zuo yi yaa wo lesile lé fɛti kɛlɛ Kana, Galilé tɛrɛ la. ’Té Jézu bu ana mi,

² yé wo Jézu valé é zuomunu laa yee lesile lé fɛti kɛlɛna é ziin.

³ Dɔrɔ nyaa, yé Jézu bu lé Jézu lɛ léé: Dɔrɔ nyaa wo lee.

⁴ Jézu lé a lɛ léé: Lezan, mɛmalé i we anlé we maa? Anzé bléyi ’ka tan bɔ lɛ lo.

⁵ A bu lé miwuomunu lɛ léé: Dé é weowean fe ka lɛ, ’ka a kɛlɛ ma.

⁶ ’Té gɔlɛbɔ suiɛdo ana, Juifinu gane ma foli ’yi dɔra bɔnu nya, dé suo nya fié léé, dé yaa léé, é sɔa wo do do gi.

⁷ Yé Jézu lé wo lɛ léé: ’Ka ’yi fan gɔlɛbɔ ’konu nya. Yé wo ’yi fan wo nya fɔɔ yé é bɔ wo tɔné ma.

⁸ Yé Jézu lé wo lɛ léé: ’Ka a koli sin, yé ’ka go a nya fɛtizan lɛ. Yé wo go a nya.

⁹ Fɛana lé dɔrɔ ’ko si, fɛtizan ’ka a gi dɔɔa lo, naa, miwuomunu lé wo ’yi ’ko koli kɔɔn, wa dɔɔ é zima. ’Yi lé é nɔla dɔrɔ nya, fɛtizan a lɛdan aan wo, é lesizan laa,

¹⁰ yé é lé a lɛ léé: Munu faa éé dɔrɔ zima no munu lɛ é vinin. ’Bɛ zuo dé dɔrɔ gié wo yuɛ ma, yé yee lé é ’ka é zima tegele lo, yé wa no wo lɛ, naa, bii, i dɔrɔ zin tadɔ fɔɔ bléyi ’ko va.

¹¹ ’Bɛ zo lé Jézu élé gyɛzorowe vinin kɛlɛ Kana, Galilé tɛrɛ la. É élé fua tagɔɔn, yé a zuomunu pa a ta.

¹² ’Bɛ zuo, yee koo, a bu koo, a zuanénu koo, a zuomunu koo, wo go Kapɛnaum yé wo yi sɛ kɛlɛ ’bɛna.

Jézu Balebangikɔn ma’lɛrɛ

¹³ Juifinu lé Taboyi bɔ aan wo é pu yé Jézu go Jérusalɛm.

¹⁴ Yé diridan?-?zannu koo, ’bladanzannu valé plawuodanzannu koo, gɔɔlitavɔɔzannu lé wo ke é nyanale koo, é wo ye Balebangikɔn gi.

¹⁵ É bawɔrɔ kɛlɛ plén nya yé é wo faa bɔra a nya Balebangikɔn gi, ’blanu valé dirinu koo é ziin, yé é gɔɔlitavɔɔmunu lé tablénu zana a gi.

¹⁶ Yé é lé plawuodanzannu lɛ léé: ’Ka wo sia fɛkona. Té ka an Ti lé kɔn kɛlɛ yaawokɔn nya lo.

¹⁷ Yé a sele dɔ a zuomunu gi léé, é a é gyɛle Bale lé sɛbɛ gi léé: Ilé kɔn lé we a an gi blɛn, fɔɔ yé anbo faa no a we ma.

¹⁸ Juifinu ’kun wozé fele ma yé wo lé a lɛ léé: Mɛ fɛ ɛ ke i lee yé i we ’konu kɛla a zoo?

¹⁹ Jézu a zi pa wo lɛ léé: Dé ka Balebangikɔn ’ko zana, maa dan a dɔ lɛ é pa gi yi yaa.

²⁰ Yé Juifinu léé: Lɛɛ yɔ boen fié wɔlɛ suiɛdo nya lé wo Balebangikɔn ’ko dɔ, yé bii léé, ’é dan a dɔ lɛ é ziin yi yaa?

²¹ Naa, Balebangikɔn lé é ke a kɔlɛ nya, ’bɛlé we lé é ke a fena.

²² Bɛwemalé, dé é nwa gamunu va a sele dɔ a zuomunu gi léé, é we ’ko fe yé wo bli vo Kazambale lé sɛbɛ valé dére lé Jézu a fe, wo lɛ.

Jézu mi faa dɔɔ

²³ Jézu a Jérusalɛm bléyian va, Taboyi lé fɛti yinu nya, gyɛzorowenu lé é ke a kɛlɛna, munu a ye, yé wo va mi kiɛre wo bli vo a tɔ lɛ.

^24-25 Naa, Jézu wo faa dɔɔ, yé a mawe ’ka a gi léé, mi do é bɔluzan ma we fe ’é lɛ lo, bɛwemalé é ’ka pa lɛ wo ta lo. We lé é ke mi gi, yeebozen a dɔɔ éboan.