WENÉNÉ LE JAN A GYE (Évangile selon Jean) 19 - Kazambale lé Sebe Sauunu 1979

¹ Yé Pilat léé, ’wo Jézu bla wɛsɛné nya.

² Sunyanu léli vuru ékema yé wa wo a ’wuo ma alé tɔkoro nya yé wo galunaa sɔ zén a ta.

³ Yé wo bié a sɔnɔ yé wo léé: Juifinu nwiinzan blɛn, i nyɔn‐o. Yé wo vo a blin gyɛna.

⁴ Pilat bɔra é ziin yé é lé Juifinu lɛ léé: Ka yé loo? Maa da a nya béera, kalé a gi dɔɔle we ma lé maa ’ka wenyané do kpen ye lɛ a ma lo.

⁵ Yé Jézu bɔra, ’té lélikoro a a ’wuo ma, ’té galunaa sɔ a é zénle a ta. Yé Pilat lé wo lɛ léé: Yee kalé mio, yee lo.

⁶ Balebanmunu segelenu valé sunyanu a ye aan wo, wo siaa léé: ’Ka a gyɛ yiliblan ta! ’Ka a gyɛ yiliblan ta! Pilat lé wo lɛ léé: ’Ka a sia kaboan yé ’ka a gyɛ yiliblan ta, naa, maa ’ka wenyané ye lɛ a ma lo.

⁷ Juifinu lé a lɛ léé: Kolé bélidɔwe do a, yé kolé bélidɔwe ’ko yɛrama é a lé mi ’ko ’é ga. É ’ébo kɛlɛ Kazambale Be nya, azama.

⁸ Pilat dére ’ko ’ma aan wo, kana taa zén a gi é ziin.

⁹ É wɔra é ziin weblekɔn gi, yé é lé Jézu lɛ léé: Fɛ kyɛnna lé i sii? Naa, Jézu ’ka a zi do kpen vɔ lɛ a lɛ lo.

¹⁰ Pilat lé a lɛ léé: An zi lé i tadɔɔ? I ’ka a gi dɔɔa léé, a se a an lɛ léé, maa i gyɛ yili la loo? Yé a se a an lɛ léé, an daan i ma loo?

¹¹ Jézu lé a lɛ léé: Dé wo ’ka a se kɛlɛ lɛ i lɛ lagi loru lo, i ’ka bɔa we do kpen kɛlɛle lɛ an lɛ lo. Bɛwemalé, mi lé é an nɔ i lɛ, alé wenyané blɛn mini izé ta.

¹² É sia ’bɛ bléyi va, Pilat a kwa kulina léé, ’é daan Jézu ma. Naa, Juifinu siaa léé: Dé i daan a ma ’té i péli ’ka Sézaa va lo. Dé miomian ébo kɛlɛ minwiinzan blɛn nya, ’té é a Sézaa ’léé wɛɛna.

¹³ Pilat dére ’konu ’ma aan wo, é go Jézu nya béera yé é nyana fɛana lé woo we blé, ana. Wo fɛkona laama Pavé, yé wa laama Ébru dére gi, Gabata.

¹⁴ É a Taboyi lé fɛnu ma’lɛrɛ yi nya, dé yiéyi bléyi léé? a zo. Yé Pilat lé Juifinu lɛ léé: Ka nwiinzan blɛn lé ke ’ko.

¹⁵ Naa, wo siaa léé: ’Bé gyɛ, ’bé gyɛ! ’Bé gyɛ yiliblan ta! Pilat lé wo lɛ léé: Maa ka nwiinzan blɛn gyɛ yiliblan taa? Balebanmunu segelenu léé: Sézaa ɛ ke ko nwiinzan blɛn nya é do kpen.

¹⁶ Yé Pilat a nɔ wo lɛ, a gyɛle yiliblan ta we ma. Yé wo Jézu sia yé wo go a nya.

Wo Jézu gyɛ yiliblan ta

¹⁷ Jézu élé yiliblan sia yé é goan, yé é bɔ miwuowɔlɛ lé fɛna, wa laama Ébru dére gi Gɔlgɔta.

¹⁸ Ana lé wa gyɛ yiliblan ta, mi fié nya é va, a do a a bɛyilazia yé a do a a bɛbolazia, yé Jézu a wo worona.

¹⁹ Pilat sɛbɛ do gyɛ yé é a pa yiliblan ta loru. É a gyɛ a ta léé: Nazarɛtzan Jézu, Juifinu nwiinzan blɛn lé.

²⁰ Fɛana lé wo Jézu gyɛ yiliblan ta é a fla sɔnɔ, bɛwemalé Juifinu kiɛre sɛbɛ ’ko ta fe. É a é gyɛle Ébru dére koo, Latɛn dére koo, Grɛki dére koo, wo gi.

²¹ Juifinu lé Balebanmunu segelenu lé Pilat lɛ léé: Té i sɛbɛ gyɛ léé, Juifinu nwiinzan blɛn, lo; naa, bé gyɛ léé, é a fe léé, ’é a Juifinu nwiinzan blɛn nya.

²² Pilat lé wo lɛ léé: We lé maa a gyɛ, yee lé ke bɛ.

²³ Jézu gyɛle yiliblan ta zuo, sunyanu alé sɔnu sia yé wa lɛ pla ziɛn yé sunyanu a sia do do. Alé varɔ grɔgrɔ lé a bééna ’ka lo, ’té wa tan sɔ do kpen nya, é sia loru yé é zun tɛrɛ, sunyanu a si. Yé wo lé ’wo ke lɛ léé:

²⁴ Té kaa a fia lo, naa, kaa ’munnu zun a ma, dé de ɛ dan a gyɛ lɛɛ? We ’ko bɔ dére lé ke é gyɛle Kazambale lé sɛbɛ gi, a lɛsɔɔle we ma, léé: Wo anlé sɔnu guli ’wo ke ma, Yé wo ’munnu zun anlé varɔ grɔgrɔ ma. We lé sunyanu a kɛlɛ, yee lé ke bɛ.

²⁵ Jézu bu koo, a bu zuané koo, Klopas na Mari koo, Magadala le Mari koo, wa é dɔle Jézu gyɛ ta yiliblan sɔnɔ.

²⁶ Jézu é bu ye aan wo, ’té a zuozan lé é sɔ a lɛ, ’té ’bɛ a é dɔle a bu sɔnɔ, yé é lé é bu lɛ léé: Lezan, i be lé ke bɛ.

²⁷ ’Bɛ zuo yé é lé é zuozan lɛ léé: I bu lé ke bɛ. É sia ’bɛ bléyi ’ko va, a zuozan go lezan nya élé kɔn ’léé.

Jézu gale

²⁸ ’Bɛ zuo, Jézu a ye léé, we faa kɛlɛle lɛ sɔɔ, yé é léé: ’Yiminilɔrɔ a an gyɛna. É ’bɛ fe Kazambale lé sɛbɛ giwe lɛsɔɔle we ma.

²⁹ ’Bɛna mi, bɔ do ana é fanle dɔrɔ tɔndɔle nya. Yé wo nézurufɛ si yé wa vɔ a va, yé wa pa izopéyilibɛ ’léé, yé wa dɔ Jézu lɔ ma.

³⁰ Jézu a gi dɔrɔ tɔndɔle mini aan wo, é léé: We faa lɛ sɔɔ. Yé é ’wuo tua, yé a lɛ bo.

Wo Jézu sɛe fɔn

³¹ É a Taboyi lé fɛnu ma’lɛrɛ yi nya; flinyi ’ko a yi blɛn nya, bɛwemalé Juifinu a fe Pilat lɛ léé, munu lé wo wo dun yiliblan ta bɛ, ’i wo ganenu yéli yé ’i wo si yiliblan ta, dé wo kɔlɛnu é da vo yiliblan ta flinyi nya.

³² Sunyanu go yé wo a vininzan gane yéli yé ’bɛ bɔluzan lé wo ’bɛ gyɛ a va yiliblan ta, wo ’bɛzé yéli.

³³ Wo da Jézu va yé wa ye é gale, amalé wo ’ka a gane yéli lɛ lo.

³⁴ Naa, sunya do a sɛe fɔn din nya. Tɔɔn nyɛ valé ’yi bɔra a gi.

³⁵ Maa lé maa ana ye, maa ɛ fe, yé we lé maa a fe, é a webozen nya. Yé maabozen a gi dɔɔ léé, maa a fe webozen nya, ka dɔle a ta we ma é ziin.

³⁶ We ’konu bɔ, we lé wa gyɛ Kazambale lé sɛbɛ gi, a lɛsɔɔle we ma; wo léé: Wo ’ka dan a wɔlɛ do kpen yéli lɛ lo.

³⁷ Yé é a é gyɛle Kazambale lé sɛbɛ gi fɛ bɛna é ziin léé: Mi lé wa fɔn, wo dan a ye lɛ.

Jézu pale

³⁸ ’Bɛ zuo, Arimatézan Jozɛfu lé é ke Jézu zuozan nya kyeen gi kanale Juifinu lee we ma, é zi laa Pilat lee léé, ’é Jézu gale si. Yé Pilat a nyi si. Bɛwemalé é go, yé é Jézu gale si.

³⁹ Nikodɛm lé, ’bɛ da é vinin Jézu va é béli bɛ, ’bɛ da é ziin lianu lé wa vɔɔ, wo nya. Yee lianu tɔ lé miré valé aloɛ; wo kilo sia yɔ fié wɔlɛ ziɛn.

⁴⁰ Yé wo Jézu gale sia yé wo sɔbɛnu vuru a ma yé wo lia ginzannu zén a ma. Wa kɛlɛ Juifinu va mipabɛ gi.

⁴¹ ’Té zian féi a fɛana lé wo Jézu gyɛ yiliblan ta, ana. Zian féi ’ko gi, mi pa gɔlɛkoro dɛrɛ do ana. Wo ’ka tan mi vinin pa lɛ a gi lo.

⁴² Mi pa gɔlɛkoro ’ko ’ka baa lo, amalé wo Jézu pa a gi, Juifinu lé fɛnu ma’lɛrɛ yi lé we ma.