WENÉNÉ LE JAN A GYE (Évangile selon Jean) 18 - Kazambale lé Sebe Sauunu 1979

Wo Jézu kun

¹ We ’konu fele zuo, Jézu valé é zuomunu go Sédrɔn yuu zi, fɛana lé zian féi ke, ana, yé é wɔra yee féi gi, yee valé é zuomunu nya.

² Jézu valé é zuomunu éé zén‐é ana ékeva é kyɛn, bɛwemalé Judas lé ’bɛ a pa munu lee, ’bɛ fɛkona dɔɔ.

³ Yé Judas sunya palu do si, é valé sunyanu lé Balebanmunu segelenu valé Farizimunu wo pa zia, wo nya, yé wo da ana kyɛbɔnu koo, sonakyɛnu koo, gulidanfɛnu koo, wo nya ’wo lee.

⁴ We faa lé é dan bɔ lɛ Jézu ma, é a gi dɔɔ. Jézu bié, yé é lé wo lɛ léé: De lé ka ke a nagininaa?

⁵ Yé wo lé a lɛ léé: Nazarɛtzan Jézu lé. Jézu lé wo lɛ léé: Maa lo. ’Té Judas lé ’bɛ a pa munu lee, ’té ’bɛ a é dɔle wo va.

⁶ Jézu a fe aan wo wo lɛ léé, ’yee lo, wo dia ’wo zuozia tɛrɛ va.

⁷ Yé Jézu a laa é ziin wo lee léé: De lé ka ke a nagininaa? Yé wo léé: Nazarɛtzan Jézu lé.

⁸ Jézu léé: Maa lé ka lɛ léé, maa lo. Dé maa lé ka ke an naginina, maa lo, ’ka zi nɔ munu ’konu lɛ, ’wo go.

⁹ É we ’ko fe, dére lé é a fe é kyɛn, a lɛsɔɔle we ma; é léé: Munu lé i wo nɔ an lɛ, wo va mi do kpen ’ka san lɛ an lee lo.

¹⁰ Gwɔun a Simɔn Piɛri lee. É a so é kɔlɛ gi yé é a vɔ Balebanmunu ’lɛzan wuozan ma yé é a bɛyila tɔné bɔi. Wuozan ’ko wa laama Malkus.

¹¹ Jézu lé Piɛri lɛ léé: ’Ilé gwɔun wɔra é kɔlɛ gi é ziin. Kana lé an Ti a nɔ an lɛ, i léé, té maa a gifɛ mini loo?

Wo go Jézu nya Balebanmunu ’lɛzan va

¹² Sunya palu do valé wo ’lɛzan koo, Juifinu lé sunyanu koo, wo Jézu kun yé wa yere.

¹³ Wo goan é vinin Ane va. ’Bɛ lɛɛ ’ko gi, Ane lu zana Kaifu kɛlɛ Balebanmunu ’lɛzan nya.

¹⁴ Yee Kaifu ɛ we pla Juifinu lɛ yi la a fele nya léé: A fila vɔ lé mi do ’é ga munu lé we ma.

Piɛri sɔn vɔ Jézu ma

¹⁵ Jézu zuozan Simɔn Piɛri valé Jézu zuozan bɛ, wo go Jézu zuo. Balebanmunu ’lɛzan Jézu zuozan bɛ ’ko dɔɔ, amalé yee valé Jézu wɔra Balebanmunu ’lɛzan lé gɔrɔ gi;

¹⁶ naa, Piɛri vo é dɔle béera gɔrɔ ’léé sɔnɔ. Yé yee Jézu zuozan bɛ lé, Balebanmunu ’lɛzan ’bɛ dɔɔ, é bɔra, yé é we fe gɔrɔ ’léé tabin le lɛ, yé é da Piɛri nya gɔrɔ gi.

¹⁷ Yé wuole ’ko lé éé gɔrɔ ’léé tabin‐é, é lé Piɛri lɛ léé: Bii é ziin, i ’ka mi ’ko zuomi do nya loo? Yé é léé: Maa ’ka a nya lo.

¹⁸ Dunu a, bɛwemalé wuozannu valé sunyanu lé wo ke é dɔle ana bɛ, wo tɛɛn kyɛ bi, yé wo dɔ a zi. Piɛri a é dɔle wo va yee kyɛ zi.

Balebanmunu we laa Jézu lee

¹⁹ Balebanmunu ’lɛzan we laa Jézu lee, a zuomunu lé we koo, abozen lé wepaale koo, wo ma.

²⁰ Jézu lé a lɛ léé: Maa we fe munu lɛ gɔrɔ la, ’té an we paan munu gi yifaama bazorokɔn valé Balebangikɔn gi, fɛana lé Juifinu éé zén‐é ékeva, ana; yé maa ’ka we do kpen fe lɛ kyeen gi lo.

²¹ Mɛwemalé i we laa an lee? Munu lé wo an dére ’ma, we lé wa ’ma a gi, bé gi laa wo lee. We lé maa a fe, woo munu ’ko a dɔɔ.

²² Dére ’konu ta lé sunya do lé é ke é dɔle ana bɛ, é Jézu blin gyɛ, yé é léé: I we fé Balebanmunu ’lɛzan lɛ ’bɛ zoo?

²³ Jézu lé a lɛ léé: Dé maa wenyané fe, we lé maa a fe é wenyané nya, bé gɔɔn. Yé dé maa we fe é zima, mɛmalé i fɛ duun an lɛɛ?

²⁴ Ane a pa zia Balebanmunu ’lɛzan Kaifu lɛ, ’té bale a é vɔle a ma.

Piɛri sɔn vɔ Jézu ma é ziin

²⁵ ’Té Simɔn Piɛri a duowo é dɔle kyɛ zi. Yé wo lé a lɛ léé: Bii é ziin, i ’ka a zuomi do nya loo? É gba vɔ yé é léé: Béé, maa kaan lo.

²⁶ Balebanmunu ’lɛzan wuozan do, mi lé Piɛri a tɔné bɔi bɛ, ’bɛ lele lé, ’bɛ lé Piɛri lɛ léé: Maa ’ka i ye lɛ a va zian féi loo?

²⁷ Piɛri gba vɔ é ziin yé ’bɛna tɔɔn, manegɔné we.

Wo go Jézu nya Pilat va

²⁸ Wo si Jézu nya Kaifu va, yé wo go a nya weblekɔn gi é bladi. Wobozen ’ka wɔra lɛ weblekɔn gi lo, dé wo da Taboyi sɔnné sɛrɛ yé wo ’ka bɔa Taboyi lé fɛ blele lɛ lo.

²⁹ Bɛwemalé Pilat bɔra yé é go wo va yé é léé: Mɛ we lé mi ’ko a kɛlɛɛ?

³⁰ Yé wo lé a lɛ léé: Dé é ’ka wenyanékɛlɛzan nya lo ’naan, ’té konɔ dan a nya i lɛ ’koo?

³¹ Bɛwemalé Pilat lé wo lɛ léé: ’Ka goan kaboan yé ka alé we ble kalé bélidɔwe yɛrama. Juifinu lé a lɛ léé: A se ’ka ko lɛ léé, ko ga dɔ mi do nwiin lo.

³² Wo we ’ko fe, we lé Jézu a fe é kyɛn léé, é dan ga lɛ fɛan zo, a lɛ sɔɔle we ma.

³³ Pilat wɔra é ziin weblekɔn gi yé é Jézu laa, yé é lé a lɛ léé: Bii ɛ ke Juifinu nwiinzan blɛn nyaa?

³⁴ Jézu lé a lɛ léé: Biibozen ɛ we ’ko fe laa, mi bɛnu ɛ an ma we fe i lɛɛ?

³⁵ Pilat lé a lɛ léé: Maa a Juifi mi nyaa? I bɛnnu valé Balebanmunu segelenu ɛ i nɔ an lɛ. Mɛ we lé bé kɛlɛɛ?

³⁶ Jézu lé a lɛ léé: Maa ’ka minwiinzan blɛn nya tɛrɛ la ’ko lo. Dé maa a minwiinzan blɛn nya kɔɔn tɛrɛ la ’ko, ’té an wuomunu ɛ nɔ an ma guli daan léé, té wo an nɔ Juifinu lɛ lo, naa, sin maa ’ka minwiinzan blɛn nya béera ’ko lo.

³⁷ Pilat lé a lɛ léé: ’Té i a minwiinzan blɛn nyaa? Jézu léé: Yee lé bé fe bɛ. Maa a minwiinzan blɛn nya. Wo an yaa, yé maa da tɛrɛ la webozen ma we fele we ma. Miomian é ke webozen va, éé an dére maan.

³⁸ Pilat lé a lɛ léé: Mɛ lé ke webozen nyaa? We ’ko fele zuo, Pilat bɔra é ziin yé é go Juifinu va, yé é lé wo lɛ léé: Maa ’ka wenyané do kpen yé a ma lo.

Wo ga dɔ Jézu nwiin

³⁹ Naa, ka vawe lé é ke léé, woo bokɔngizan do bɔraan ka lɛ Taboyi lé fɛti yi la. É sɔ ka lɛ léé, maa Juifinu nwiinzan blɛn bɔra ka lɛɛ?

⁴⁰ Yé wo faa siaa é ziin léé: Gbaoo, gba! ’Bɛ kaan lo. Barabas lé. Naa, Barabas a kyeenwozan nya.